Loen 72 - LAWA A BOO SONBORE

Lawa nyankɔ kii a lɛa boo

1 Salomɔn a loe.

¹ Salomɔn a loe. Lawa! A kɔ kii lɛ la, a kiri siin yɔrɔ bɔ, ka n din wɔn bɛ́ lɔn. N din a kiri sii giala ma ǹ gɔn kɛ kɔ la.

² Toa a giã n zaman kɛ mìi la ka peperebaa nɛ, a kiri wɔ doobaan ganaa ka telebaa nɛ.

³ Toa gána lɛ paǹ tumaa nɛ, minin nə là nyantoro laanka peperebaa dɔ̃.

⁴ Toa kii lɛ sii sonbore zɛnaa, n din a tɔrɔ lɛ a doobaan manɛ, a n baa ǹ kirisibaali lɛa. Sɛnɛ, min mɛnɛn bɛ́ mɛnɛɛ doobaan la, toa a bɛn dɛ.

⁵ Toa min tumaa nyɛ́ɛ baa n din ni biikoo tumaa li, yǎa duduu.

⁶ Toa kii lɛ goã ka la mɛn bɛ́ kiɛ wuru-n, ka la mɛn bɛ́ kiɛ, a mu tán giɛɛra.

⁷ N din toa, a kiibaa wasa nɛ, peperebaa wɔlɔ gɔ̀nɔn bɔ. N toa màn-yɛ pàã gole kɔ biikoo tumaa li.

⁸ N din toa, a kiibaa lɛ goã gána lɛ mìi la, a bɔ kɔ̀ goon ganaa, a wo dɔ goon kɔsɔ dɔ ganaa. Toa a bɔ Efrati tà kɛ ganaa, a wo dɔ kanaa lɛ-doa ganaa.

⁹ Don gɔ́ɔ̃ minin tá re kiɛ tán a yɔrɔ-a. A zɔ́ɔn tá re mɛnɛɛ, ǹ nə n lɛ kɔ tán lɛ.

¹⁰ Tarsisi kiwi laanka gánan mɛnɛn bɛ́ mu bii, bɛn kiin tá re min gɔ ǹ mànan diɛ la. Saabaa laanka Seebaa gánan kiin tá re màn boboe, ǹ kɔ la.

¹¹ KIIN tumaa á re kiɛ tán a giulun, gánan tumaa á re lɛ koe a pàã ganaa.

¹² Nɔmaa-wɔle mɛn bɛ́ lɛ diɛ, n din toa a bɛ si sii la. Doobaa mɛn dɔ bɛ́ min ná a ba la wa, toa a n dɔ bɛ lɛ.

¹³ Á re makara boe pàãwɛɛnaa laanka nɔmaa-wɔle ganaa, a ǹ nyin si sii la.

¹⁴ Min mɛnɛn bɛ́ n kakaarɛ koe ǹ ganaa, ǹ nə́ ǹ nɔmɛɛ, á re ǹ sii bɛn la, a giala, mà ǹ nyin lɛ barka á gole a yii li.

¹⁵ Lawa die a nyin sasa kɔ kii lɛ la. Ǹ tá re Saabaa gána a sana koe la, a gɔ ǹ màn lɛa. Ǹ tá re Lawa nyankoe a lɛa biikoo tumaa li, ǹ Lawa bǐɛ̃ bíi li baraabaraa.

¹⁶ Lawa die a gána lɛ a màn-kɔsiɛ bǐɛ̃ kɔ parsiini. A toa a kele mìi ni ǹ wuru màn tumaa ma sɔnbɔraanɛ, ǹ bǐɛ̃ kɔ ka Liban gána a kelen kɛn bɛ́ lɔn. A die a toa kiwin lɛn dɔ nə pã ka minin ni, ka don bɛ́ piɛ̃ ka buu-n lɔn.

¹⁷ Lawa toa kii lɛ tɔ bɔ biikoo tumaa li, yǎa duduu. A tɔ-bɔ lɛ belebɔ ka wasa bɛ́ lɔn. Bɛ̀ minin tá Lawa bǐɛ̃ bíi kɔn li, ǹ die ǹ kii lɛ tɔ da li, gánan tumaa die ǹ pɛ, mà Lawa barka da kii lɛ ganaa.

¹⁸ Barka Dɛnaa Lawa, Izirayeli a Lawa. N dinsɔɔ̃ n kaãbaa ǹ sii zɛnɛɛ.

¹⁹ Barka tá Lawa Gole lɛ ganaa, yǎa duduu. Kanaa din tumaa die a pã ka a gugurubaa nɛ. A n baa miɛ̃, a n baa miɛ̃!

²⁰ Zesee a nɛgiĩ Davida a Lawa nyankɔ ǹ loen lɛn giala nyɔmɔɔ n ke.