Loen 71 - LAWA A BOO SONBORE

Giĩ gole kɔn a Lawa nyankoe

¹ Dɛnaa Lawa, ma yii nə n din la ma tamaali lɛa. N baran toa maa foo doa n ganaa kɛ sìi baa duduu wa.

² N din a peperebaa gɔ́ɔ̃ nɛ, ma si sii la, n ma bɔ a nɛ. N too kɔ ma lon, n ma kirisibaa.

³ N din nə goã maa kele lɛa, man duru n kio. N goã maa giã ǹ bǎã lɛa, ma bɛ́ boe la ma kirisibaa bǎã mɛn nɛ. Sonbore, n din lɛ n ma tamaali lɛa, ka maa duru ǹ bǎã nɛ.

⁴ Maa Lawa, ma si min baraa la, ma si gɛ̀-dɛle baraan kɛn laanka min kakaarɛn kɛn la.

⁵ Dɛnaa Lawa, n din nə maa foo doa ǹ bǎã lɛa, ma foo n doa nɛ n din ganaa, a kũ maa boɛɛnmaa ganaa.

⁶ A kũ maa nɛnyaanmaa waáraa ganaa, ma nə n gòã koɛ n din la. N din nə́ n dɔ ma lɛ, má soo má n bɔ ma dan gɔ́ɔ̃ nɛ. Ma nə n din tɔ boe biikoo tumaa li.

⁷ Min gigiã yɔrɔ-a, man má goã gama-a ǹ màn lɛa, a giala, n din nə́ ń goã ma tamaali sonbore lɛa.

⁸ N tɔ dinsɔɔ̃ n ma lɛ-n loe lɛa. Baraabaraa, ma nə n gugurubaa kɛ boo diɛ.

⁹ Kanna má zizi kɔ, n baran ma daa wa. Ma pàã bɛ́ nyɛɛ, n baran n gɔn bɔ ma ganaa wa.

¹⁰ A giala, mà maa zɔ́ɔn man ma boo diɛ. Min mɛnɛn bɛ́ giɛ ma gɔn li, bɛn nə́ kɔn yɛ,

¹¹ maǹ pii: Lawa daa. Ka a lɛ gɛwaa, wɔ kũ, min kɔn ba re boe a-n wa.

¹² Lawa, n baran n wɔlɔ lui ma ganaa wa. Maa Lawa, da n dɔ ma lɛ fufuu.

¹³ Min mɛnɛn bɛ́ giɛ maa zɛ̀rɛbaa ǹ gɔn li, toa bɛn nə wo papaã sìi gɔn. Min mɛnɛn bɛ́ giɛ maa bɔ̀n li, toa bɛn nə puusə-kɔ yɛ taãn-taãnɛ.

¹⁴ Masɛ wɔ paǹ li, ma foo n tɔn doa nɛ. Man die n tɔ dɔ boe miɛ̃, ma wo-n nyɛɛnɛ.

¹⁵ Baraabaraa, n peperebaa boo kɛ n ma lɛ-a, ma nə n minin kirisibaa kɛ boo diɛ. Ma ba n bǐɛ̃-zɛnaa kɛ din lɛ doɛ̃, ma pɛ wa.

¹⁶ Dɛnaa Lawa, ma á re n Pàãyiidɛnaabaa kɛ laakalɛɛ. Ma á re n dinsɔɔ̃ a peperebaa kɛ boo diɛ.

¹⁷ Lawa! Ń ma daraa, a kũ maa boɛɛnmaa ganaa. Haalɛ ka pelo yii ni, ma nə n sii sonboren kɛn laakalɛɛ.

¹⁸ Lawa! A laanɛ má zizi kɔ kanna, ma mìi ka fulu, n baran n gɔn bɔ ma ganaa wa. N dɔ ma lɛ, ń giɛ ma tá n din a boo sii la laakalɛɛ sisia minin kɛn manɛ, ma n din a Pàãyiidɛnaabaa kɛ pɛ ǹ kiodɛnan tumaa nɛ.

¹⁹ Lawa! N peperebaa lɛ á gole, á la yii ni, ń dí dadaran dɔn nya. Lawa! N miã banban.

²⁰ N din a lɛa, má yɔrɔ-kɔsiɛ laanka nɔmaa gigiã yɛ. Sɛnɛ, n din tá re die n doe ma lɛ, n toa ma yii goã koo. N tá re die ma boe gɛ̀ li.

²¹ N tá re wusii n ma foo taã, n maa zín kɔ ma la doo.

²² Bɛ lɛ tɔ ganaa, ma á re n tɔ boe ka tùtu ni. Maa Lawa, ma á re loe loe ma n kɔn-narɛɛ gole kɛ laakalaa. Izirayeli a Lawa sonbore, ma á re n tɔ boe ka tùtu wuu ni.

²³ Man die maa loe lɔ ǹ mànan dii, ma n guguru kɔ nɛ. Ma á re n para pii, n din a ma si sii la kɛa lɛa.

²⁴ Biikoo tumaa li, man die n peperebaa kɛ boo diɛ, a giala, mà min mɛnɛn bɛ́ giɛ maa bɔ̀n li, sìi bɛn kũ, ǹ nə́ puusə-kɔ dɔ yɛ.