Loen 65 - LAWA A BOO SONBORE

Kaa-piɛ zɔ́n loe

¹ LOE-saalin goledɛnaa loe mɛn lɔ. Davida a loe n ke.

² Lawa, n din nə *Siɔn kiwi kɛ nɛ, n doamaa nɛ min gogoonmaa nə n tɔ bɔ, min gogoonmaa nə n lɛ kɔ ka sii mɛn nɛ ǹ bɛ zɛnaa n wɔ paǹ li,

³ a giala, mà n tá minin nyankɔ lɛ sii. Minbuiinin tumaa n die n din li

⁴ ka ǹ sãn nɛ ǹ ganaa. Wɔa sãn lɛn man guĩ gugurun lɛa wɔ ganaa, sɛnɛ, nsɛ á boe la n nə ǹ papaã.

⁵ N bɛ́ lɛ koe min mɛnɛn ganaa, mà ǹ biikoo kɔn zɛnaa kunun n ni, bɛn wɔ na á bǐɛ̃ kɔ. Màn mɛn bɛ́ màn sonbore lɛa n din a kion, n din a kion kɛ nɛ, á kɔɔ̃n wɔ ganaa wɔ wɔa wɔ-gii yɛ bɛ nɛ taãn-taãnɛ.

⁶ Wɔ kirisibaali Lawa, n ba wusii n boo kio wa, ma n wɔa nyankɔn lɛ sii ka sii dadaran nɛ, nsɛ mɛn bɛ́ kanaa gùrù tumaa a minin nə́ n foo doɛ n ganaa, ka mu bii a gána sɔsɔɔn kɛn dɔn minin ni.

⁷ N din nə kelen doɛ ǹ bǎãn nɛ ka n pàã nɛ. Ka bɛa pàã lɛ nɛ,

⁸ n din nə yìsi mu a bìn diɛ tumaa lɛ kuĩ, ka tɔrɔ kɔsɔn giginii tumaa nɛ.

⁹ Kanaa gùrù tumaa a minin nə́ nyɛ́ɛ baa n kaãbaa ǹ sii dadaran kɛn yɛ gɔ́ɔ̃ nɛ. N din nə lɛ̀giala laanka lɛ̀nyɛɛn minin kiɛ nyɛnyɛɛ ganaa.

¹⁰ N din nə giɛ tán walan, ma n mu koe á boe sɔnbɔraanɛ, n nə́ piɛ̃ ka naforon ne. Lawa, nsɛ a pɛrɛ lɛ n piɛ̃-n ka mu ni. Ma n màn-bii bǐɛ̃ koe minbuiinin ni, n nə́ tán bǐɛ̃ koe sɔnbɔraanɛ.

¹¹ Ma n mu kiɛ a kɔsiɛ ziin ni, n ná a kòròn yui. Ma n mu kiɛ a ganaa á boe, n nə́ pàã koe màn nànan la ǹ bɔ tán.

¹² Ma n lɛ̀ lɛ zɛnɛɛ n tá a gɔn nyɔmiɛ̃ sɔnbɔraanɛ, bɛ̀ n bɔ bǎã mɛn nɛ, bɛ n nyɔɔ boe.

¹³ Tɔɔn màn-bii n yii bǎã geren tumaa nɛ, foo kɔɔ̃nbaa ǹ loen lɛ n boe tentenen lɛnpɛnɛ.

¹⁴ Tɔɔn man nyɔmaa nɛ buu sonbore bǎã kɛ nɛ, wuru sonbore bǎã kɛ tumaa gɔ́ɔ̃gɔ́ɔ̃ ǹ mànan man siĩni. Don gɔ́ɔ̃ kɛ tumaa nə n kalɛɛ, a tá n tɔ boe ka loe ne.