Loen 64 - LAWA A BOO SONBORE

Lawa bɛ́ min baraan kiɛ dòo diɛ lɔn

¹ LOE-saalin goledɛnaa loe mɛn lɔ. Davida a loe goon ne.

² Lawa, man maa busii pii n din ni. N too kɔ ma lon. Ma bɛ́ nyɛ́ɛ biɛ zɔ́ɔ mɛn nɛ, ma kanbaa bɛ ganaa.

³ Baraa-zɛnaalin man nə́ n giala kaa kun, min baraan man gɔn diɛ ma ganaa, ma kanbaa ǹ ganaa.

⁴ Ǹ lɛwɔn lɛ n ka gɔya sa bɛ́ lɔn, ǹ ná a lɛ boe. Ǹ basaã boon kɛn man ka kiɛn bɛ́ lɔn,

⁵ ǹ tá ǹ yɔrɔ boe, ǹ nə́ ǹ zuĩ min sonboren manɛ. Maǹ nə́ ǹ zuĩ, ǹ ba a giala pii bɔrɔ wa, a ba taasiɛ dɔ diɛ ǹ ganaa wa.

⁶ Ǹ dinin man kɔn foo taɛ̃, bɛa sii baraa zɛnaan kɛn lɛn gɔ́ɔ̃ nɛ. Ǹ bɛ́ re gɔn diɛ minin ganaa lɔn ka durii ni, maǹ bɛ boo diɛ kɛnɛn: Die n die boe bɛ siére-a?

⁷ Maǹ taasiɛ we kɔkɔrɔbaa siin ganaa. Maǹ pii mà ǹsɛn sii yɔrɔ bɔ á nya, mà minbuiin nɛ gɔ́ɔ̃ kɛ á zuzulu, min ba boe la a dɔ̃ wa.

⁸ Sɛnɛ, Lawa n die kiɛ zuĩ ǹ ni. Bǎã goon ne, a ǹ kũ.

⁹ Lawa n die ǹ kuĩ ǹ dinin lɛ gɔ́ɔ̃ ǹ boon li, a ǹ ziziɛ̃. Min mɛnɛn tumaa bɛ́ ǹ yii, bɛn tumaa á re ǹ puusə koe.

¹⁰ Bɛ á re nyɛ́ɛ diɛ min tumaa ganaa. Ǹ tumaa á re Lawa a nya ǹ dín laakalɛɛ, ǹ nə ǹ giala ma.

¹¹ Lawa bɔlɔ-silin kɛn sɛn tá re n nyɛnyɛɛ Dɛnaa Lawa taman yii. A giala, mà a nə ǹ duru ǹ bǎã lɛa. Lawa a min peperen kɛn tá re n dinin kalɛɛ ka bɛ nɛ.