Loen 63 - LAWA A BOO SONBORE

Dɛnaa a kɔn-narɛɛ a golebaa loe

¹ Davida a loe, bɛ̀ a bɛ́ don sabii Zudaa gána nɛ.

² Lawa, n din nə maa Lawa lɛa. Baayɛlɛ lɛlɛ gɔrɔ, man giɛ n li ka ma foo tumaa nɛ. N din lɛ sii n ma ganaa, ma laadoo nə n ganaa taãn-taãnɛ, ka tán gere, gɔ́ɔ̃ kooro-a laadoo bɛ́ mu ganaa lɔn.

³ Sonbore, má ga n ganaa n kion sonbore kɛ nɛ, má n boo sii la laanka n gugurubaa yɛ.

⁴ Má goã loe loe n tɔ boe ne, a giala, n kɔn-narɛɛ gole ke, á soɛ yiikoonaabaa nɛ.

⁵ Man die barka diɛ n nɛ maa yiikoonaabaa tumaa gɔ́ɔ̃ nɛ. Man die ma gɔnɔn goɛ lon, ma n din nyankɔ.

⁶ Man die kiɛ̃ ka man má màn kɔɔ̃n bii. Yaa n die goɛ̃ ma lɛ-a, ma á re loe loe ma Dɛnaa tɔ bɔ nɛ.

⁷ Bɛ̀ ma á waa-n tán maa piì la, yǎa ma yiri gisĩ n ni, ma nə n taasɛ ka n din ni tèlò lɛ tumaa gɔ́ɔ̃ nɛ.

⁸ A giala, n din nə́ n baa masɛ a dɔmalɛ wole lɛa. Man die n toɛ n din nyàa giulun man nyɛnyɛɛ.

⁹ Man die damɛ n din lɛ ganaa ka ma foo tumaa nɛ, n din pàã kɛ n ma tamaɛ. N din nə ma tamaɛ ka n gusin a gɔn kɛ nɛ.

¹⁰ Min mɛnɛn bɛ́ zoɛ̃ ma li, mà ǹ ma nyin bɔ, toa bɛn nə wo bɔ̀n baa ǹ bǎã nɛ; toa ǹ wo tán giulun zuzulu kɛ nɛ.

¹¹ Toa ǹ nə ǹ dɛ ka gɔya sa nɛ; toa tolokan nə ǹ siĩ sɔ̃.

¹² Bɛa biikoo li, kii lɛ foo á re kɔɔ̃n koe, ka Lawa a zɛnaa ǹ siin ni. Bɛ̀ min lɛ kɔ ka sii ni, á Lawa baa a siére lɛa, bɛa dɛnaa foo á re kɔɔ̃n koe. Sɛnɛ, soɛ-bɔlen kɛn lɛ á re kuri ka kiĩni.