Loen 62 - LAWA A BOO SONBORE

Goã là nyɛɛ la kun ka Lawa-n loe

¹ LOE-saalin goledɛnaa loe mɛn lɔ. Yedutun na á lɔ. Davida a loe n ke.

² Man boe la ma goã là nyɛɛ la kun ka Lawa dinsɔɔ̃ nɛ, maa kirisibaa n boe a din li.

³ A dinsɔɔ̃ n maa kele lɛa, ma tá n duri a kio, ma bɛ́ boe la ma kirisibaa bǎã mɛn nɛ. Màn kɔn ba re bìn diɛ ma ganaa wa.

⁴ Ka tumaa n die n lɛ kiɛ kun yǎa biĩ, mà ka n yui min goon gialaa, ka n die, ka ǹ bɛ́ kungɔn talaa wole, hinlaa bìn dii wole die ǹ kaa lɔn?

⁵ Ka nə n doɛ mà yǎa ka boe a bǎã nɛ. Soɛ-bɔ n kɔɔ̃n ka ganaa. Ka n Lawa bǐɛ̃ bíi ka ka lɛ nɛ, sɛnɛ, ka n dì bíi ka gɔ́ɔ̃ nɛ. *Doa.

⁶ Yǎa ma giɛ là nyɛɛ li Lawa dinsɔɔ̃ li, a giala, a din nə ma foo doɛ.

⁷ A dinsɔɔ̃ n ma tamaali lɛa, ma bɛ́ boe la ma kirisibaa bǎã mɛn nɛ. Màn kɔn ba re bìn diɛ ma ganaa duduu wa.

⁸ Maa kirisibaa laanka maa guguru-kɔ n doa-n Lawa ganaa. A din nə maa kɔmalɛ wole kaka lɛa, maa duru ǹ bǎã nɛ.

⁹ Ma tɔrɔn lɛn, ka n foo doa Lawa ganaa yǎa duduu. Sii mɛn bɛ́ guguru ka ganaa, ka bɛ toa a gɔn, Lawa n wɔsɛn duru ǹ bǎã lɛa. Doa.

¹⁰ Minbuiin nɛ n ka piɛ̃ bɛ́ lɔn. Ta ǹ mɛn nə boɛɛn nɛ, ta ǹ mɛn na á tɔ gole yɛ, ǹ kɔn ba màn kɔn lɛa wa. Bɛ̀ n nə́ ǹ tumaa kaa kun, n nə́ ǹ gugurubaa zɔɔ̃, piɛ̃ din tá soɛ ǹ nɛ.

¹¹ Ka baran n foo doa baraabaa sii zɛnaa ǹ gɔnɔn ganaa wa, màn mɛn bɛ́ n sii ka pàã nɛ, ka baran n yiri koa màn kɔn ganaa bɛ gɔ́ɔ̃-n wa. Bɛ̀ kaa naforon tá mɔnɛɛ, ka baran n foo kɔ bɛn la wa.

¹² Má gunyin gigiã bɔ, bɛ̀ ma Lawa a boo kɛ ma kɛnɛn: mà pàã na asɛ din wɔ lɛa.

¹³ Dɛnaa, sonborebaa dɔ nə n din wɔ lɛa, a giala, man min tumaa kuĩ a din a nya ǹ dí li.