Loen 61 - LAWA A BOO SONBORE

Ma wusoo ma kunu kɔ Lawa a kion ganaa, bɛa loe n ke

¹ LOE-saalin goledɛnaa a loe goon ne. A nə n loe ka da loe li ǹ màn biɛdɛnaa nɛ. Davida a loe ne.

² Lawa, n too kɔ maa lɛ-dɛ li, n too kɔ maa nyankɔ li.

³ Bɛ̀ ma á sɔsɔɔ maa gána ganaa, má n ma a boe sii kɔn la wa, man lɛ diɛ n la. Ma din bɛ́ ma a doe kele mɛn mìi-n, man duru wa, wo ma-n walan.

⁴ N din nə masɛ tamaali sonbore lɛa, duru ǹ bǎã kaka lɛa, maa zɔ́ɔn yɔrɔ-a.

⁵ Á kɔɔ̃n ma ganaa, ma goã n kion yǎa duduu, ma duru ǹ bǎã yɛ n nyàa kan giulun.

⁶ Lawa, n din nə maa lɛ-kɔ ǹ boon kɛn miɛ̃. Min mɛnɛn bɛ́ n guguru koe, n din nə n bɛn wɔ gii kɔ ǹ la, gána sonbore kɛ nɛ.

⁷ Nyin sasa kɔ kii kɛ la, toa a goã a belebɔ taãn-taãnɛ.

⁸ Lawa, toa a goã kii lɛa n yɔrɔ-a yǎa duduu, toa n din a kɔn-narɛɛ gole kɛ laanka n bǐɛ̃ duduu kɛ tamaa.

⁹ Bɛ gɔ́ɔ̃ nɛ, ma á re n tɔ kɛ kalɛɛ biikoo tumaa li, ka maa loe ne. Man lɛ kɔ n la ka siin mɛnɛn dɔn nɛ, ma á re bɛn lɛ piɛ̃ baraabaraa.