Loen 60 - LAWA A BOO SONBORE

Izirayeli minin nə Lawa nyan mɛn kɔ, bɛ̀ ǹ bɛ́ ǹ nə́ fɔ̃ ǹ zɔ́ɔn li

¹ LOE-saalin goledɛnaa loe mɛn lɔ. Maǹ tùtu diɛ li. Davida a yiri gisĩ sii zizi ni ǹ loe goon ne. Minin daraa ǹ loe ne.

² Davida zia-baalin nyɛɛnaan bɔ lɔn, á woo Siirii minin kɛn gialaa, giã-n Mezopotamii gána nɛ ka Sobaa nɛ. Ǹ bɔyaa biikoo li, Zoabu Edɔmu gána a zia-baalin dɛ Yìsi Bǎã kɛ nɛ, ǹ nə́ woo dɔ min duu fulupaa:

³ Lawa, ń wɔ daa, ń wɔ nana kɔn. N laanka n foo-yoo lɛ tumaa nɛ, wusoo n nə n yɔrɔ da wɔ la.

⁴ Ń bìn da tán ganaa, ń yu papa nɛ. Wusoo n na a yu ǹ bǎãn lɛn zɛnaa, a giala a n talɛɛ.

⁵ Ń toa n tɔrɔ lɛ fuu dadaran yɛ, ń baa pàã lɛa wɔ ganaa, wɔ́ wɔ ma yii ni ǹ yɔ mi.

⁶ N din nə n gòon yiɛ, n bɔlɔ-silin ni, mà ǹ baa si, ǹ nə ǹ bɔ kiɛ-bɔlen kiɛn nyɛɛnɛ. *Doa

⁷ Wɔ kirisibaa ka n din pàã gole kɛ nɛ, n wɔa nyankɔ si, ń giɛ, n bɛ́ wɔsɛn mɛnɛn narɛ, wɔ á kirisibaa yii.

⁸ Lawa boo da á bɔ a kion sonbore kɛ nɛ, Gɔ̀lɔ̀baa n ma din wɔ lɛa. Ma á re Sisɛmu kiwi kɛ talɛ kɔn minin bii, ma á re Sukɔti bǎã kɛ gii.

⁹ Galaati n ma din wɔ lɛa, Manaasee dɔ n ma din wɔ lɛa. Ma mìi ganaa ǹ bafolo n ka Efrayimu ni, maa kii bàlà n ka Zudaa nɛ.

¹⁰ Haalɛ kaa zɔ́ɔn gánan kɛn, maǹ ma din wɔn lɛa. Moabu n maa zoo ǹ mu kaa ǹ màn lɛa. Ma din gòã n Edɔmu la. Man ziabaa ǹ lɛ wuu boe Filisiti gána gialaa.

¹¹ Die n die woe ma-n yǎa Edɔmu gána nɛ? Die n die a kiwi kaka kɛ kuĩ, a kɔ ma la,

¹² bɛ̀ n din Lawa bie wa? Sɛnɛ, ń wɔ daa, n ba wɔa zia-baalin diɛ zii doo wa.

¹³ Da n dɔ wɔ lɛ, n yoo wɔa zɔ́ɔn gialaa, a giala, minbuiinin dɔmalɛ lɛ ba a taãn lɛa wa.

¹⁴ Kun ka Lawa nɛ, wɔ á re gɔ̀lɔ̀ biɛ. A giala, asɛ n boe wɔa zɔ́ɔn la, a ǹ tɔ tán.