Loen 59 - LAWA A BOO SONBORE

Ma tamaali Lawa nyankɔ ǹ loe

¹ LOE-saalin goledɛnaa loe mɛn lɔ. A nə n loe kɛnɛn: N baran toa n ziziɛ̃ wa. Davida a loe goon ne. Kii Sayulu bɛ́ á minin dia, mà ǹ wo Davida a kion lɛduə̃, ǹ ga li ǹ dɛ, a n loe lɛ loe bɛ wɔ gɔn la.

² Maa Lawa, ma si maa zɔ́ɔn la, ma tamaa maa yoo ma gialaa wolen kɛn-a.

³ Ma si sii baraa-zɛnaalin kɛn la, n ma kirisibaa mà-kaali bɔbɔnɛɛn kɛn-a.

⁴ Ǹ nə́ ke, ǹ nə́ n duru ǹ nə́ gɔn diɛ ma ganaa. Bɛa min babaraan kɛn lɛn man giɛ ma li, ǹ nə́ baraa zɛnɛɛ ma nɛ. A da yaa, ma sã ǹ sii kɔn la wa, ma sii baraa kɔn zɛnaa wa, Dɛnaa Lawa.

⁵ Ma sii kɔkɔrɔ kɔn zɛnaa wa. Sɛnɛ, maǹ baa sii n naɛ, ǹ nə́ kuu koe ma ganaa. Yoo n nə n dɔ ma lɛ, n da ma lɛ n ga dɛ!

⁶ Dɛnaa Lawa, n din lɛ n Pàãyiidɛnaa lɛa, n din lɛ n Izirayeli a Lawa lɛa. Yoo, n dɔlɔ bɔ kɛa tɔrɔ kooron kɛn ganaa. N baran makara bɔ kɛa minin kɛn-a wa. Boɛ̃ a bɔ minin li wole baraan manɛ. *Doa.

⁷ Wasamiɛ̃-n lɛn li, maǹ die ka ginin bɛ́ lɔn. Maǹ nə n lɛ dii, ǹ nə́ kiwi lɛ lɛnpɛnɛ.

⁸ Ǹ lɛ gɔ́ɔ̃ piɛ̃maa nɛ ka boo baraan nɛ. Ǹ boon lɛ n we ka gɔya a min fɔ̃ bɛ́ lɔn. Maǹ taasɛ mà min kɔn ba bɛ miɛ̃ wa.

⁹ Sɛnɛ Dɛnaa Lawa, nsɛ n yaa we ǹ ganaa, nsɛ n giɛ tɔrɔ kooron kɛn ganaa, yaa da ǹ mànan lɛa.

¹⁰ Lawa, masɛ n giɛ n din ganaa, n din nə ma pàã lɛa. Maa duru ǹ bǎã sonbore n ka n din ni.

¹¹ Maa Lawa mɛn a minin narɛ bɛ́ gole, bɛ á re die ma li, á re toɛ ma maa zɔ́ɔn yɛ fɔ̃ gɔ́ɔ̃ nɛ.

¹² N baran ǹ dɛ n nə ǹ yɔyɔrɛ sisia wa. Bɛ bie wa, ma tɔrɔ minin kɛn yiri á re boe n gɔ̀lɔ̀baa kɛ nɛ. Dɛnaa, n din nə wɔa goóro lɛa. Bìn da ǹ ganaa ka pàã gole ne, n toa ǹ mɛnaa.

¹³ Ǹ boo bɔbɔnboɛɛn tumaa n sɔ lɛa, ǹ nə́ koe n ganaa. Toa ǹ din gole kɔ lɛ nə ǹ dinin kũ, ka kan bɛ́ lɔn. A giala ǹ sii tumaa n doa-n kɛ ganaa, boo baraa diɛ laanka soɛ-bɔ.

¹⁴ N foo-busii gɔ́ɔ̃ nɛ, ǹ dɛ miɛ̃, ǹ dɛ, min baran ǹ yɛ doo wa. Bɛ gɔ́ɔ̃ nɛ, ǹ tá re doɛ̃, yǎa kanaa paǹ tumaa ganaa, mà Lawa tan, á n kii lɛa Izirayeli mìi la. Doa.

¹⁵ Wasamiɛ̃-n lɛn li, maǹ die ka ginin bɛ́ lɔn. Maǹ nə n lɛ dii, ǹ nə́ kiwi lɛ lɛnpɛnɛ.

¹⁶ Maǹ giɛ paǹ din tumaa li, màn li ǹ tá bii. Bɛ̀ ǹ màn yɛ á ǹ kã wa, maǹ zùũzùũ sii.

¹⁷ Sɛnɛ, masɛ á re n pàã kɛ pii ka loe ne. Baayɛlɛ gɔrɔ, ma á re n bǐɛ̃ duduu kɛ kalɛɛ, ka loe ne. A giala, n din nə ma tamaali lɛa, n din nə maa duru ǹ bǎã lɛa, bɛ̀ ma á fuu gɔ́ɔ̃ nɛ.

¹⁸ Lawa, masɛ n giɛ ma n tɔ bɔ. N din nə ma pàã lɛa. Maa duru ǹ bǎã sonbore n ka n din ni. N din mɛn bɛ́ Lawa lɛa, n nə́ bǐɛ̃ gole zɛnɛɛ ma nɛ.