Loen 58 - LAWA A BOO SONBORE

Lawa n dɔlɔ boe min baraan ganaa

¹ LOE saalin goledɛnaa loe mɛn lɔ. A nə n loe kɛnɛn: N baran toa n ziziɛ̃ wa. Davida a loe goon ne.

² Min golen lɛn, ka á boo diɛ ka peperebaa-n ya? Haayii, bɛ̀ ka á kiri we minin ganaa, peperebaa ba a-n wa.

³ Ka n kɔkɔrɔbaa siin zɛnɛɛ woone, ka n baraabaa siin lɛ boe kanaa kɛ gɔ́ɔ̃ nɛ.

⁴ Min baraan lɛn bɔlɔ-tii nə n giala koe ǹ yɛ waáraa gɔrɔ. Ǹ yɛ kio gɔrɔ, maǹ zii pepere diɛ, maǹ soɛ pɛsɛ̃.

⁵ Ǹ boo n goon ka miɛ̃ a sèwò ne. Maǹ nə́ n too tiɛ̃ ka miɛ̃ pipiã bɛ́ lɔn.

⁶ Miɛ̃ mɛn bɛ́ a ba n too koe a para-pɛlin loe li wa, haalɛ a para-pɛli zanbia kɛ dɔ din.

⁷ Haya Lawa! Ǹ sɔn yiɛ ǹ lɛ-n. Dɛnaa, ǹ sɔn kɛn ka yàran wɔn bɛ́ lɔn, bɛn yiyiɛ.

⁸ Toa ǹ papaã ka mu kiɛ̃ wole bɛ́ lɔn. Toa ǹ bɛbɛnɛ ka buu mɛn bɛ́ ǹ nə́ tɔtɔrɔ la.

⁹ Toa ǹ sii goã goon ka fɔrɔɔ nɛ, ǹ gã bɛ̀ ǹ mu n kiɛ. Ka nɔ̀ ziziɛ̃ bɛ́ lɔn, n baran toa ǹ yii wasa yɛ wa.

¹⁰ Ǹ nyan laan mà a n piɛ̃ a bún baa, Lawa a foo-busii á re ǹ goɛ, ka piɛ̃ gole bɛ́ lɔn, a kiɛ̃ ǹ nɛ.

¹¹ Min pepere á re n nyɛnyɛɛ, gɛ̀ dòo boe kɛ a yɛ gɔ́ɔ̃ nɛ. Á re kiɛ̃ lon, bɛ̀ a zɔ́ɔn nə́ mɛnaa tán.

¹² Minin tá re pii: «Taãn nɛ, min pepere lɛ n màn yii Lawa li. Lawa tá kanaa kɛ lɛ gɔ́ɔ̃ nɛ, á n kiri we.»