Loen 57 - LAWA A BOO SONBORE

Lɛ dia Lon a Lawa gole la ǹ loe

¹ LOE-saalin goledɛnaa loe mɛn lɔ. A nə n loe kɛnɛn: N baran toa n ziziɛ̃ wa. Davida a loe goon ne. A bɛ́ á baa si, á woo n dɔ yala kɔrɔ nɛ, màn mɛn bɛ́ toɛ, a la kii Sayulu la, Davida n boo diɛ bɛ wɔ gɔn la.

² Makara bɔ ma ganaa, Lawa! Makara bɔ ma ganaa. A giala, man má n din lɛ bɔ duru ǹ bǎã lɛa. Ma nə n duri n din li, ka koon nɛ bɛ́ lɔn ǹ dan nyàa giulun, yǎa nɔmaa kɛ kiɛ̃.

³ Man lɛ diɛ Lon a Lawa Gole kɛ la, Lawa mɛn bɛ́ re sii tumaa zɛnɛɛ ma a lɛa.

⁴ Ma na a nyankoe, máa a n toa lon a ma kirisibaa. Máa a die a sìi da ma nɔmaa-wɔle lɛ ganaa. *Doa Máa Lawa die a na a kɔn-narɛɛ gole kɛ nyaa ma nɛ, ka a bǐɛ̃ duduu kɛ dɔ nɛ. Doa

⁵ Man min baraan bii. Maǹ baraa ka yàra min-sɔ̃lin bɛ́ lɔn. Ǹ sɔn man pɛpɛnɛ ka sɛmiɛ̃n bɛ́ lɔn, pɛpɛnɛ ka kiɛn dɔn bɛ́ lɔn. Ǹ lɛwɔn dɔ n lɛ boe ka gɔya sa bɛ́ lɔn.

⁶ Lawa, n golebaa kɛ nyaa. N golebaa mɛn bɛ́ á la lon ne. Toa n gugurubaa kɛ yɛ. Toa a yɛ kanaa paǹ tumaa ganaa.

⁷ Ǹ nə́ biɛ koa maa kiɛ̃ ǹ zii la. Sɛnɛ, má n mìi zuməə má kiɛ̃. Ǹ nə́ ma kũ ǹ yala fɔ̃ ma nyɛɛnɛ. Sɛnɛ, ǹ dininmaan nə́ mɛnaa a nɛ. Doa

⁸ Á ke, ma foo á doa nɛ, Lawa, ma foo á doa nɛ. Man die loe loe, ma n tɔ bɔ nɛ.

⁹ Haya ma foo, yoo. Ka dɔn nə yoo, tùtun laanka kɔnkoɛ̃nɛn lɛn, masɛ n die yui wasa nyɛɛnɛ.

¹⁰ Man die barka diɛ n nɛ tɔrɔn bii, Dɛnaa, man die loe loe, ma n tɔ bɔ tɔrɔ kɔsɔn bii.

¹¹ A giala, n kɔn-narɛɛ gole kɛ n yui yǎa lon, n bǐɛ̃ duduu kɛ dɔ n doe labaran ganaa.

¹² Lawa, n golebaa kɛ nyaa. N golebaa mɛn bɛ́ á la lon ne. Toa n gugurubaa kɛ yɛ. Toa a yɛ kanaa paǹ tumaa ganaa.