Loen 52 - LAWA A BOO SONBORE

Min mɛn bɛ́ n foo doɛ a naforo ganaa

¹ LOE-saalin goledɛnaa loe mɛn lɔ. Davida a loe.

² Edɔmun giĩ Dowɛgi bɛ́ á daa pɛ kii Sayulu ni mà Davida tá Akiimelɛki a Kion.

³ Hee, min kaka, wàa na á baa, n tá n din kalɛɛ sii baraa zɛnaa a lɛa? Lawa a kɔn-narɛɛ gole ke, lɛawaa tumaa wɔ nɛ.

⁴ Gɛ̀-dɛ boo nə n lɛ-n miɛ̃ɛ, n lɛwɔn nə́ lɛ boe ka kùn ni. Soɛ nə n dí lɛa bɛ̀ n bɔ.

⁵ Ma n sii baraa narɛ, á la a bǐɛ̃ nɛ, soɛ n kɔɔ̃nɛ n ganaa, á la sonbore ne. *Doa

⁶ Boo basaã n kɔɔ̃nɛ n ganaa, minin bebele ǹ boon-dali!

⁷ Bɛ lɛ n ke, Lawa á re n dii a n da tán, á re n kuĩ n kion kɛ nɛ, a n giɛraa a soo n ne kanaa, á re n gòɛ̃ boe a bɔ yiikoonaan kanaa kɛ nɛ. Doa

⁸ Min peperen tá re bɛ yii, nyɛ́ɛ á re bɛn kuĩ. Ǹ tá re yaa we a ganaa, ǹ pɛ:

⁹ Hee, din-kalaali lɛ á ke. A Lawa baa a foo doa ǹ bǎã lɛa wa, a na á n foo doa gɔn màn gigiã ganaa. A giala, sii baraa zɛnaa ná a gɔn si.

¹⁰ Sɛnɛ, masɛ n ka *olivie da bɛ́ lɔn, á luu pã, man giã-n Lawa a kion kɛ nɛ, ma foo n doa-n Lawa a kɔn-narɛɛ gole kɛ ganaa baraabaraa, yǎa duduu.

¹¹ Dɛnaa, maa barka a nyɛɛ n-a wa, a giala, ń nə́ n wɔ zɛnaa. N din a min sonboren kɛn yɔrɔ-a, ma nə n foo doɛ n ganaa, a giala, n tá siĩni.