Loen 42 - LAWA A BOO SONBORE

Sɛ́wɔ paabaa ǹ wɔ ( LOE 42—72 ) Min mɛn bɛ́ tii lɛa bǎã kɔsɔ nɛ, bɛa Lawa nyankɔ n ke

¹ LOE-saalin goledɛnaa loe mɛn lɔ. Koore a minin doro ǹ loe.

² Ee Lawa, mu boro bɛ́ yuùn kuĩ lɔn, n dɔ sii n masɛ kuĩ miɛ̃.

³ Lawa yiikoonaa kɛ sii n ma ganaa. Man die we a kion kɛ-n biĩ doo, ma golee a yɔrɔ-a?

⁴ Bɛ̀ ǹ tá pii ma nɛ lɛawaa tumaa li, mà n Lawa lɛ á maa kəni? Penleen laanka tèlò ne, masɛ wɔ n ka yii mu ni.

⁵ Lɛlɛ, man má goã miɛ̃ zaman kɛ nyɛɛnɛ zɔ́n biikoo li. Man má goã woe koɛ yǎa Lawa a Kion. Maǹ nə́ goã foo kɔɔ̃nbaa ǹ loe loe, bɛ̀ ǹ Lawa tɔ bɔ. Bɛ̀ ma yiri gisĩ bɛ lɛ-n sisia, ma foo n ziziɛ̃.

⁶ Wàa na á baa ma foo á ziziɛ̃, má n ginii we kɛnɛn? Yǎa man foo doɛ Lawa ganaa. Taãn nɛ, ma á re wusii ma a tɔ bɔ, Lawa mɛn bɛ́ ma kirisibaali lɛa.

⁷ Ma foo ziziɛ̃ ma din li, maa Lawa. Bɛ lɛ n ke, ma bɛ́ Zurdɛ̃ tà mu a pìã lɛ-a, tenten bǎã nɛ, Ɛrmɔn kele la, ma nə n taasɛ ka n din ni.

⁸ Ma gɔ́ɔ̃ nə́ n lɔlɔkɔn ka mu bɛ́ lɔn. A wuu n boe lon bɛ̀ a kaa, a nə n duwii tán miɛ̃, a n birikəə̃. Bɛa foo-ziziɛ̃ lɛ, n din nə́ n toa a ma mui ka mu bɛ́ min mui lɔn.

⁹ Baayɛlɛ, Dɛnaa Lawa na á goã a bǐɛ̃baa nyɛɛ. Tèlò-n, man má goã loe loe ma tá a tɔ boe ne, man má goã Lawa nyankoe, asɛ mɛn bɛ́ yiikoonaabaa koe ma la.

¹⁰ Man li ma kɛ pɛ ma tamaali Lawa nɛ: Wàa na á baa n yiri bɔ ma nɛ? Wàa na á baa n toɛ ma á woe ka yɔrɔ-kɔsiɛ nɛ, maa zɔ́ɔn kɛn nə́ ma gialaa?

¹¹ Masɛ gù gã. Maa zɔ́ɔn kɛn man sɔ kiɛ ma la. Maǹ pii ma-n lɛawaa tumaa li, mà maa Lawa lɛ á maa?

¹² Wàa na á baa ma foo á ziziɛ̃, man ginii we kɛnɛn? Yǎa man foo doɛ Lawa ganaa. Taãn nɛ, ma á re wusii ma a tɔ bɔ, maa Lawa mɛn bɛ́ ma kirisibaali lɛa.