Loen 41 - LAWA A BOO SONBORE

Busulə a Lawa nyankɔ boo

¹ LOE-saalin goledɛnaa loe mɛn lɔ. Davida a loe n ke.

² Min mɛn bɛ́ n yiri koɛ yii koe-yɛle li, Lawa á re barka diɛ bɛa dɛnaa ganaa. Bɛ̀ koe yɛ ǹ mɛn pinaa, Dɛnaa Lawa na a kirisibiɛ.

³ A na a nyin tamaɛ, a yii-nyɛɛ kɔ la tán kɛ la. A ba toɛ a zɔ́ɔn gɔn, ǹ basaã kɔ-n wa.

⁴ Bɛ̀ a lon wa, Dɛnaa Lawa nə n doe lɛ a piì la. Bɛ̀ busu tá a ganaa, a din na a piì lɛ giulun siɛ.

⁵ Man má goã pii, máa Dɛnaa Lawa, makara bɔ ma ganaa, n maa busu kɛ nya, a giala, man má sii la n din la.

⁶ Maa zɔ́ɔn man boo baraa diɛ ma ganaa, ǹ nə́ pii: A n die giɛ̃ biĩ a papaã a n bɔ wɔ yɔrɔ-a?

⁷ Bɛ̀ ǹ mɛn daa n yii kɔ ma ganaa, a na á daa sii kɔsɔ-a, a na á baraa taasɛ a din gɔ́ɔ̃ nɛ. Bɛ̀ á soo kanaa, a n bɛ lɛ pii.

⁸ Bɛ̀ maa zɔ́ɔn lɛn tá ma li, maǹ ma boo diɛ kɔn nɛ ǹ lɛ giulun. Maǹ taasiɛ baraa we maa wɔ paǹ li.

⁹ Maǹ pii, mà busu baraa n ke a ganaa dɛ! Mà bɛ̀ kɛ min kũ, a yui doo wa.

¹⁰ Haalɛ maa giaára ka tã mɛn din bɛ́ ma foo goã doa nɛ a ganaa, ǹ mɛn lɛ bɛ́ wɔ n màn bii kun, a din lɛ na á n bɔyaa ma li.

¹¹ Sɛnɛ, Dɛnaa Lawa, nsɛ die n ga ma makara-a, n bǐɛ̃ kɔ ma ganaa, n maa piì giulun saa, ma maa gɛ̀ dòo bɔ ǹ ganaa.

¹² Masɛ nə n bǐɛ̃ baa dɔ̃ màn mɛn li, bɛ n ka kɛ nɛ: maa zɔ́ɔn lɛn ba n lɛ dii doo, mà ǹsɛn nə́ gɔ̀lɔ̀baa yɛ wa.

¹³ N nə́ n dɔ ma lɛ, maa zɛ̀rɛbaabaã taman yii, biikoo tumaa li, n din nə ma tamaɛ n din yɔrɔ-a.

¹⁴ Barka tá Dɛnaa Lawa ganaa! Barka tá Izirayeli a Lawa ganaa, duduu yǎa duduu! A n miɛ̃! A die a n baa miɛ̃!