Loen 39 - LAWA A BOO SONBORE

Minbuiin nɛ a belebɔ kanaa baã sii

¹ LOE kɛ n boe loe-saalin goledɛnaa Yedutun a sɛ́wɔ nɛ. Davida a loe ne.

² Man má pɛ, máa man die yiri boe ma din li, màn mɛn bɛ́ toɛ, ma baran boo da ma sã wa. Bɛ̀ min baraan kɛn tá ma yɔrɔ-a lɔn, man die karafɔ we ma lɛ-n.

³ Bɛ lɛ n ke má giã kiĩni, ma boo da wa. Má n lɛ tã, sɛnɛ, ma là yɛ-a wa, màn din na á goã miɛ̃ maa nɔmaa li.

⁴ Ma foo na á goã pipi ma gɔ́ɔ̃ nɛ, maa ginii gogoonmaa n ka tɛ ma kuĩ, yǎa má n lɛ bũ má boo da:

⁵ Dɛnaa Lawa, ma nyin bɛ́ re nyɛɛ ǹ mɛn waáraa, bɛ pɛ ma nɛ. Ma bɛ́ tɔn lɛawaa lɛ mɛn zɛnɛɛ kanaa, bɛ pɛ ma nɛ. Ma á re doɛ̃ kəni, máa ma a màn kɔn lɛa wa.

⁶ Á ke, n lɛawaa lɛ mɛn kɔ ma la, a kiɛ̃ gɔn tìsì la wa. Maa belebɔ kanaa din ba màn kɔn lɛa n yii li wa. Sonbore, ta min din na a gòã la lɔn, a n ka piɛ̃ nɛ. *Doa.

⁷ Sonbore, minbuiin nɛ nə n binbirin boe, a n ka wúlu ni, a beleboe wa. Sonbore a nə n din didii, sɛnɛ kooro ne. A n gɔn màn soekɔn, sɛnɛ, a bɛ́ re min mɛn wɔ biɛ, a bɛ doɛ̃ wa.

⁸ Sisia, masɛ n giɛ wàa li doo, Dɛnaa? Dɛnaa, masɛ foo n doa nɛ n din ganaa.

⁹ Ma si maa sii baraan kɛn la, n nyan ma kɔ baãnaanan kɛn la, ǹ sɔ kɔ ma-a wa.

¹⁰ Sisia kəni, masɛ nə́ n lɛ tã, ma a n lɛ buĩ doo wa. A giala, n din nə die n wɔ nyɛɛ.

¹¹ N nyan ma dɛ doo wa, n dɛ mɛn wɔ ma ganaa, á ma pàã tumaa nya.

¹² Ma n minbuiin nɛ a sii baraa a dɔlɔ boe a ganaa, n tá doree. Màn mɛn sii bɛ́ kaka a ganaa, man bɛ lɛ ziziɛ̃, ka nyuun bɛ́ màn ziziɛ̃ lɔn. Sonbore, minbuiin nɛ tumaa n ka piɛ̃ kooro bɛ́ lɔn. Doa.

¹³ Dɛnaa Lawa, n too kɔ maa nyankɔ li, maa lɛ-dɛ ma. Ga ma yii mu kɛ-a. Masɛ n tii lɛa n li, man kiɛ̃ wole lɛa, ka ma digolon tumaa bɛ́ lɔn.

¹⁴ N yɔrɔ saa n bɔ ma la kəni, ma á re boe la ma yaa wɔ, bɛ̀ ma baa woe, ma papaã man bɔ kanaa.