Loen 37 - LAWA A BOO SONBORE

Min sonbore laanka min baraa a saraa

1 Davida a loe n ke.

¹ Davida a loe n ke. N foo baran busu min baraan zɛnaa ǹ sii a lɛa wa. N yii baran bɔ sii baraa-zɛnaalin zɛnaa ǹ sii li wa.

² Ǹ tá re bɛbɛnɛ ka buu bɛ́ lɔn, ǹ tá re laɛ ka màn buruu bɛ́ laɛ lɔn.

³ N foo doa Dɛnaa Lawa ganaa, n sii bǐɛ̃ zɛnaa, ń giɛ n tá goɛ̃ gána lɛ nɛ ka là nyantoro ne.

⁴ Toa Dɛnaa Lawa goã n foo dùũ sii lɛa, n bɛ́ giɛ màn mɛn li, á re bɛ koe n la.

⁵ N sii tumaa toa Dɛnaa Lawa gɔn, n foo doa a ganaa, á re n doe n lɛ.

⁶ Ǹ kɔn pinaa, á re n peperebaa nyɛɛ foaãnɛ, ka wɔlɔ bɛ́ fúli baayɛlɛ lɔn, á re sonbore koe n la, minin nə yɛ ka wasa bɛ́ lɔn penleen tiɛɛ̃n nɛ.

⁷ Giã kiĩni Dɛnaa Lawa li, n nə n foo doa a ganaa. Min mɛn a sii bɛ́ bǐɛ̃ koe, n foo baran busu li wa. Min mɛn bɛ́ yiri baraa boe a sii zɛnaa gɔ́ɔ̃ nɛ, n foo baran busu bɛ li wa.

⁸ Foo-yoo lɛ da, n kakaarɛbaa toa walan. Bɛ̀ n foo busu, bɛ lɛ n die ka sii baraa zɛnaa nɛ.

⁹ Lawa á re min baraan wɛɛ a ǹ bɔ gána kɛ nɛ, sɛnɛ, min mɛnɛn bɛ́ n foo doɛ Dɛnaa Lawa ganaa, gána lɛ á die bɛn wɔ biɛ.

¹⁰ Kànaa ka boɛɛn nɛ, min baraa á re papaɛ̃. Ta n ga li lɔn, n ba re a gòɛ̃ yii wa.

¹¹ Sɛnɛ, gána lɛ á die pàãwɛɛnaan wɔ biɛ. Ǹ tá re là nyantoro lɛpiɛ̃ yii.

¹² Min baraa n kuu koe min sonbore ganaa, a nə́ n lɛ sɔsoɛ̃ li.

¹³ Sɛnɛ, Dɛnaa Lawa n yaa we min baraa ganaa, a giala, a yii tá a bɔ̀n baa ǹ lɛawaa ganaa die.

¹⁴ Min baraan lɛn nə́ ǹ gɔya sa woɛ̃, ǹ nə́ ǹ sa dii, ǹ nə́ zoɛ̃ mà ǹ pàãwɛɛnaa laanka doobaa dɛ, ǹ nə́ zoɛ̃ mà ǹ tɔ pepere wɔle bɔlɔ kuru.

¹⁵ Sɛnɛ, ǹ gɔya sa lɛ á re ǹ dinin koron foɛ̃, ǹ sa dɔ á re yiɛ.

¹⁶ Màn boɛɛn mɛn bɛ́ min sonbore gɔn, á soɛ min baraa a pàãmabaa ǹ màn gigiã nɛ.

¹⁷ A giala min baraan pàã á re nyɛɛ, sɛnɛ, Dɛnaa Lawa á re n doe min sonboren lɛ.

¹⁸ Dɛnaa Lawa n giɛ min sonboren walan. Lawa màn mɛn kɔ ǹ la ǹ kíɛ̃ lɛa, bɛ na a tan yǎa duduu.

¹⁹ Bɛ̀ nɔmaa biikoo dɔ, sìi á re ǹ kuĩ wa. Bɛ̀ bòo kɔ lɛawaan mɛnɛn li, ǹsɛn tá re kiɛ̃.

²⁰ Min baraan tá re bɔ̀n biɛ. Dɛnaa Lawa a zɔ́ɔn kɛn, ǹ bɛ́ ka don a da buũn manɛ, ǹ tá re woe, ǹ papaã ka tɛmaa nɛ.

²¹ Min baraa n giɔ̀mɔ siɛ, a sarɛɛ wa. Sɛnɛ, min sonbore n min kɔsɔ makara doɛ̃, a gɔ ka màn nɛ.

²² Taãn nɛ, a barka da min mɛnɛn ganaa, gána lɛ á die bɛn wɔ biɛ. A barka bɔ min mɛnɛn nɛ, á re bɛn wɛɛ a ǹ bɔ a nɛ.

²³ Bɛ̀ min mɛn a zɛnaa ǹ sii tá kɔɔ̃n Dɛnaa Lawa ganaa, a n foo-doa koe bɛ la a zii tɔ-we gɔ́ɔ̃ nɛ.

²⁴ Ta á n gòã na, a mɛnɛɛ wa, a giala, Dɛnaa Lawa n kuĩ a gɔn ganaa.

²⁵ Má goã boɛɛn nɛ, má daa má zizi kɔ, ma bin yɛ duduu, mà Lawa min sonbore daa wa, ma bin na a nɛnyaanan yɛ màn-bii nyankoe wa.

²⁶ Min makara n min sonbore kuĩ lɛawaa tumaa li, a n giɔ̀mɔ diɛ baraabaraa. A nɛnyaanan dɔn man barkadɛnan lɛa.

²⁷ N bɔ sii baraa wɔlɔ li, n sii bǐɛ̃ zɛnaa. N tá re giã ǹ bǎã yii gána lɛ nɛ biikoo tumaa li.

²⁸ A giala, peperebaa n kɔɔ̃n Dɛnaa Lawa ganaa. Dɛnaa Lawa ba a minin kiɛ wa, a n giɛ ǹ walan baraabaraa. Sɛnɛ, min baraa tɔrɔn kɛn, á re bɛn wɛɛ a ǹ bɔ gána lɛ nɛ.

²⁹ Min sonboren tá re gána lɛ a dɛnan biɛ. Ǹ tá re goɛ̃ a-n yǎa duduu.

³⁰ Min sonbore n sii-doɛ̃ boo diɛ, peperebaa ǹ boon n soe a lɛwɔn la.

³¹ A n Lawa a landa siin kɛn guĩ a foo ne, a talɛɛ a n bɔ la wa.

³² Min baraa n kuu koe min sonbore ganaa, á n zoɛ̃ li mà a dɛ a gã.

³³ Sɛnɛ, Dɛnaa Lawa a toɛ ǹ gɔn dɔ a ganaa wa, a toɛ kiri kũ kiri kuru ǹ bǎã-n wa.

³⁴ N foo doa Dɛnaa Lawa ganaa, n kɔ a zii lɛ. Á re n koɛ gána lɛ a dɛnaa lɛa. N tá re yii min baraan kɛn wɛɛ ǹ boe a nɛ.

³⁵ Má min baraa yɛ a din a kakabaa nyɛɛ. N din nyɛɛ lon ka woren ka da gole kɔn nɛ.

³⁶ Sɛnɛ, ma bɛ́ má wusoo má bɔ walan, ma yɛ doo wa, má ga li, má fɔ̃.

³⁷ Min mɛn gɔ́ɔ̃ bɛ́ fu, a n min pepere lɛa, min mɛn bɛ́ giɛ là nyantoro li, bɛa dɛnaa tɔrɔn tá re goɛ̃.

³⁸ Sɛnɛ, Dɛnaa Lawa n piã-wɔlen tumaa bɔ̀n biɛ kun. A ba min baraan tɔrɔ koɛ wa.

³⁹ Dɛnaa Lawa n min sonboren kirisibiɛ. A din nə ǹ tamaɛ fuu-yɛ biikoo li.

⁴⁰ Dɛnaa Lawa nə n doe ǹ lɛ, a tá ǹ sii ǹ kiɛ. A nə ǹ kanbiɛ min baraan ganaa, a tá ǹ kirisibiɛ. A giala, maǹ nə́ kaa a din yele.