Loen 36 - LAWA A BOO SONBORE

Yiikoonaabaa a bɔ Dɛnaa Lawa li boo

¹ LOE-saalin goledɛnaa loe mɛn lɔ. Dɛnaa Lawa a dí-nyali Davida a loe.

² Min baraa a yii wɔ Lawa la ǹ boo ke, bɛ n die ma yiri ni. Asɛ yii li, min doamaa bie a nyɛ́ɛ baa Lawa nyɛɛn wa.

³ A giala, a n giɛ a din ganaa ka taasiɛ naarɛ nɛ, a ba a din a sã doɛ̃, a wusoo a kio wa.

⁴ Soɛ dinsɔɔ̃ laanka minin yiri sã ǹ boo na a lɛ-n. A din yii li, sii sonbore zɛnaa din là banban doo wa.

⁵ Bɛ̀ a tá a piì la, a nə n taasɛ ka sii kɔkɔrɔ zɛnaa dinsɔɔ̃ nɛ. Zii mɛn bɛ́ a siĩn wa, a nə n gɔn parɛɛ bɛ ganaa. A sii baraa kiɛ doɛ̃ wa.

⁶ Dɛnaa Lawa, n kɔn-narɛɛ gole lɛ n woe yǎa lon, n bǐɛ̃ duduu lɛ n woe yǎa labaran ganaa.

⁷ N peperebaa lɛ n yii ka kele dadaran bɛ́ lɔn. N kiri kurii lɛ n zuzulu ka nyankɔrɔ gole bɛ́ lɔn. Dɛnaa Lawa, n din nə minbuiinin laanka tɔɔn tamaɛ.

⁸ Lawa, n bǐɛbaa gole lɛ á siĩni. Minbuiinin man kiɛ n din nyaa giulun.

⁹ Maǹ nə́ ǹ dinin bundara piɛ̃, ka n kion a màn-bii gigiã nɛ. N sonborebaa kɛ n goon ka tà nɛ, n nə́ ǹ goe mu-n walan.

¹⁰ Yiikoonaabaa lɛ a bɔ ǹ bǎã n ka n din ni, n din a wɔlɔ fúlu lɛ n toɛ wɔ yii á wɔlɔ yii.

¹¹ Min mɛnɛn bɛ́ n doɛ̃, n kɔn-narɛɛ gole kɛ nyaa bɛn man miɛ̃ duduu. Min mɛnɛn gɔ́ɔ̃ bɛ́ fu, n bǐɛ̃ kɛ nyaa bɛn man miɛ̃ duduu.

¹² Dɛnaa Lawa, n nyan toa din gole kɔlen kɛn nə dɔ ma ganaa wa. N nyan toa min baraan kɛn nə ma loo wa.

¹³ Sii kɔkɔrɔ zɛnaalin lɛn nə́ ke ǹ nə́ kaa. Ǹ nə́ kaa ǹ làfu la, ǹ ba boe la ǹ tá yui wa.