Loen 35 - LAWA A BOO SONBORE

Zɛ̀rɛbaãnaa a gòa-kũ da Lawa ganaa ǹ loe

1 Davida a loe n ke.

¹ Davida a loe n ke. Dɛnaa Lawa, min mɛnɛn bɛ́ ma zɛ̀rɛ biɛ, bɛn zɛ̀rɛ baa, min mɛnɛn bɛ́ zia diɛ ma ganaa, zia da bɛn ganaa.

² Yoo, n goóro saa, a gole laanka a boɛɛn nɛ, n da n dɔ ma lɛ.

³ Min mɛnɛn lɛn bɛ́ ma kio lui, sɛmiɛ̃ wɛ̃, n sɛ̀miɛ̃ saa, n pipiri ǹ li. A pɛ ma nɛ: Ma din nə n kirisibaali lɛa.

⁴ Min mɛnɛn bɛ́ giɛ li ǹ ma nyin bɔ, sìi da ǹ ganaa, n zín bɔ ǹ nɛ. Min mɛnɛn bɛ́ giɛ li ǹ bɔ̀n da ma ganaa, toa sìi bɛn kũ, ǹ wusoo ka ǹ kio ne.

⁵ Dɛnaa Lawa, bɛ̀ n lon a dia dí-a wole kɛ tá baa diɛ ǹ gòã li, ǹ baa ka kaã bɛ́ lɔn kiɛ̃ piɛ̃ li.

⁶ Dɛnaa Lawa, bɛ̀ n lon a dia dí-a wole lɛ tá ǹ lui, zii tii ǹ ganaa, n na a zɔrɔn kɔ ǹ gòã li.

⁷ Ǹ nə́ yala fɔ̃, ǹ nə́ kan koa ma nɛ kooro, maǹ nə́ fɔ̃, ǹ nə́ giɛ mà ǹ ma nyin bɔ kooro.

⁸ Toa bɔ̀n gole da ǹ dinin lɛn tɔwaa tán, ǹ biɛ mɛn koa, toa a ǹ dinin kũ. Ǹ yala mɛn fɔ̃, toa ǹ dinin nə mɛnaa a nɛ.

⁹ Bɛ̀ ń zɛnaa miɛ̃, ma foo á re kɔɔ̃n koe ka n sii ni, Dɛnaa Lawa. Ma á re n nyɛnyɛɛ, a giala n din nə ń ma kirisibaa.

¹⁰ Ka ma foo tumaa nɛ, ma á re pii: máa Dɛnaa Lawa, die n ka n bɛ́ lɔn? N din nə pàãwɛɛnaa sii pàãdɛnaa la, n din nə pàãwɛɛnaa laanka doobaa sii ǹ piɛ̃-bɔle la.

¹¹ Minin man die ǹ nə́ soɛ diɛ ma la, ma bɛ́ ma a sii mɛn doɛ̃ wa, maǹ bɛa nɔ̀n diɛ ma la.

¹² Maǹ maa bǐɛ̃ sarɛɛ ka baraa nɛ, ma á ke bii-a, min ba ma la wa.

¹³ Sɛnɛ, ǹ bɛ́ ǹ ba lon wa, masɛ n má foo-ziziɛ̃ ǹ mɔnaa wɔ ma din-a. Má n lɛ sɔɔ, má n din gisĩ, má Lawa nyan kɛ kɔ, má kɔ, má kɔ.

¹⁴ Giã ǹ bǎã goã ma la wa, ka n pɛ mà maa giaára a sii ni, ka n pɛ mà ma dɔɔ̃n a sii ni. Man má goã yɔrɔ-kɔsiɛ gɔ́ɔ̃ nɛ, ka n pɛ mà ma dan na á gã.

¹⁵ Sɛnɛ, bɛ̀ masɛ mɛnaa, ǹsɛn manə n lɛ soekɔn, bɛ̀ ǹ na a yaa wɔ. Ǹ nə́ yoo ma gialaa, ma sii mɛn la, ma a doɛ̃ wa. Tiin nə́ n lɛ kaa kun, ǹ nə ǹ ma pɔpɔsɛ, ǹ ba nyɛɛ wa.

¹⁶ Soɛ-bɔlen babaraan kɛn man ma diɛ yaa lɛa baraabaraa, maǹ nə n lɛ sɔsoɛ̃ ma li.

¹⁷ Dɛnaa Lawa, n nə n die n lɛ tiɛ̃, n ga bɛ ganaa kɛnɛn yǎa biĩ? Ma kanbaa ǹ basaã gole kɛ ganaa, ma gɔsɛ n ma bɔ yàran kɛn gɔn.

¹⁸ Ma á die bɛa barka diɛ n nɛ zaman gole kɛ yɔrɔ-a, ma á die n tɔ bɔ ǹ loe loe zaman kɛ bii.

¹⁹ Min mɛnɛn bɛ́ ma biɛ zɔ́ɔ kooro, n nyan toa bɛn nə yaa wɔ ma-a wa. Ma tìĩ bɛ́ á bɔ min mɛnɛn nyin ni kooro, n nyan toa bɛn nə n yii kɛmɛ ma li, bɛ̀ ǹ woɛn da ma-a wa.

²⁰ Boo sonbore goon ba boe ǹ lɛ-n wa. Gána lɛ a min mɛnɛn bɛ́ là nyantoro la, maǹ soɛ babaraa diɛ bɛn la woone.

²¹ Maǹ nə́ n lɛ dii ma ganaa kɔsɛkɔsɛ mà haya, haya, mà ǹsɛn dinin yii sɔɔ̃n!

²² Haya Dɛnaa Lawa, n yii bɛ́ á yɛ. N nyan nə n lɛ tã kɛ ganaa wa, n nyan nə n wɔlɔ lui ma ganaa wa,

²³ Yoo, n golee, Dɛnaa, n maa sonbore pɛ. Maa Lawa, maa Dɛnaa Lawa, maa zia gii da.

²⁴ N peperebaa gɔ́ɔ̃ nɛ, Dɛnaa Lawa, maa Lawa, n din masɛ a sonbore pɛ. N nyan toa maa zɔ́ɔn kɛn nə yaa wɔ ma ganaa wa.

²⁵ «Wɔsɛn wɔa kɛnɛn», n nyan toa ǹ bɛ pɛ wa, «wɔ gɔn dɔ-a kəni», n nyan toa ǹ bɛ pɛ wa.

²⁶ Min mɛnɛn tumaa bɛ́ maa bɔ̀n yaa we, toa sìi gole nə ǹ kũ, ǹ puusə kɔ. Min mɛnɛn tumaa bɛ́ ǹ dinin koɛ ma ganaa, toa sìi nə ǹ kũ, ǹ yii kiɛɛrɛ kɔ.

²⁷ Min mɛnɛn bɛ́ ǹ nə́ goã giɛ li sonbore yɛ ma lon, bɛn tá re foo kɔɔ̃nbaa ǹ lɛ dii, ǹ pɛ duduu: mà Lawa tɔ nə n saa lon, asɛ mɛn bɛ́ giɛ li a bɛ̀rɛgiĩ goã là nyantoro la.

²⁸ Ma á die n bɔlɔgoondɛnaabaa kɛ pii, bɛ̀ ma timəə la, ma á die loe loe baraabaraa, bɛ̀ ma n tɔ bɔ nɛ.