Loen 33 - LAWA A BOO SONBORE

Lawa tɔ bɔ ǹ loe, a kanaa diɛ laanka a minbuiinin kirisibaa taman yii

¹ Min peperen lɛn, ka n lɛ dɛ, ka n nyɛnyɛɛ Dɛnaa Lawa ganaa. Min mɛnɛn gɔ́ɔ̃ bɛ́ fu, a gugurukɔ n niɛ̃ bɛn lɛn ganaa.

² Ka kɔnkoɛɛ̃n dɛ ka barka da Dɛnaa Lawa nɛ, ka tùtu nɛ fùdɛnaa dɛ ka a tɔ bɔ nɛ.

³ Ka loe dii lɔ ka a tɔ bɔ nɛ, ka foo kɔɔ̃nbaa ǹ lɛ dɛ, ka kaa bɛ̀-dɛ ǹ mànan wuu da li.

⁴ Dɛnaa Lawa a boo tumaa n taãn lɛa, min tá boe la a n foo doa a zɛnaa ǹ sii tumaa ganaa.

⁵ Sii mɛn bɛ́ pepere, a ná a zii la, bɛ́ n kɔɔ̃n a ganaa. Kanaa tumaa piɛ̃maa-n ka Dɛnaa Lawa a bǐɛ̃baa gole kɛ nɛ.

⁶ Dɛnaa Lawa na á lon zɛnaa ka a din a boo ne, a na á lon màn tumaa zɛnaa, ka a din lɛ gɔ́ɔ̃ ǹ piɛ̃ nɛ.

⁷ A din na á kɔ̀ mu sɔkɔn, a ná a lɛ zũ, mu nyankɔrɔ zuzulun kɛn, a din na á bɛn koa.

⁸ Kanaa tumaa n siĩni a nyɛ́ɛ baa Dɛnaa Lawa nɛ, kanaa minin tumaa doamaa nɛ, ǹ gɔ̀nɔn nə bìn da a nyɛɛnɛ.

⁹ A giala, asɛ bɛ́ á boo da, a sii na á n zɛnaa, a màn mɛn pɛ, a sii na á yɛ.

¹⁰ Tɔrɔ kɔsɔn nə sii mɛn yɔrɔ bɔ, Dɛnaa Lawa bɛ ziziɛ̃. Tɔrɔ kɔsɔ minin nə sii mɛn koa ǹ yiri ni, á bɛ sàabaa.

¹¹ Dɛnaa Lawa sɛ a sii yɔrɔ bɔ n goɛ̃ yǎa duduu, bɛ̀ á sii mɛn koa a yiri ni, bɛ lɛ n giala yii biikoo tumaa li.

¹² Dɛnaa Lawa bɛ́ tɔrɔn mɛnɛn Lawa lɛa, bɛn wɔ na á bǐɛ̃ kɔ. A bɛ́ á tɔrɔ mɛn a minin bɔ a din wɔn lɛa, á re barka diɛ bɛn ganaa.

¹³ Dɛnaa Lawa nə n toɛ lon á n giɛ, a yii tá minbuiin tumaa ganaa.

¹⁴ A nə n toɛ a giã ǹ bǎã nɛ, á n giɛ kanaa minbuiin tumaa ganaa.

¹⁵ A din na á ǹ gogoonmaa foo zɛnaa, a ba foɛ̃ ǹ zɛnaa ǹ sii kɔn ganaa wa.

¹⁶ Zia-baalin mɔnaabaa bie toɛ kii gɔ̀lɔ̀baa yɛ wa. Kakabaa bie toɛ zia-baali kirisibaa wa.

¹⁷ Bɛ̀ n tá li n gɔ̀lɔ̀ baa, bɛ̀ ń nə́ n foo doa sùi ganaa, kooro ne. A laanka a pàã kɛ lɛ tumaa nɛ, asɛ bie toɛ min la wa.

¹⁸ Sɛnɛ, min mɛnɛn bɛ́ nyɛ́ɛ biɛ Dɛnaa Lawa nɛ, ǹ nə́ n foo doɛ a kɔn-narɛɛ gole kɛ ganaa, Dɛnaa Lawa n giɛ bɛn walan.

¹⁹ A nə ǹ sii gɛ̀ la, a nə ǹ yii toɛ koo bòo biikoo li.

²⁰ Wɔsɛn dɔn manə n yii diɛ Dɛnaa Lawa la. Min mɛn bɛ́ n doe wɔ lɛ, á n wɔ tamaɛ, a din ni.

²¹ Wɔa foo kɔɔ̃nbaa n boe a din li, wɔ foo n doa nɛ a din tɔ sonbore sonbore kɛ ganaa.

²² Dɛnaa Lawa, wɔ bɛ́ wɔ́ n foo doa n din ganaa, toa n kɔn-narɛɛ gole kɛ goã wɔ li.