Loen 32 - LAWA A BOO SONBORE

Sii toa ma nɛ a foo kɔɔ̃n kɔ ǹ loe

1 Davida a loe n ke. Minin doroo ǹ loe.

¹ Davida a loe n ke. Minin doroo ǹ loe. Bɛ̀ Lawa min mɛn a zɛ̀rɛ saa á bɔ a mìi ni, bɛ̀ á min mɛn a sii baraa toa nɛ, bɛa dɛnaa wɔ na á bǐɛ̃ kɔ.

² Dɛnaa Lawa bɛ́ a ba min mɛn kuĩ a sii baraa li wa, min mɛn bɛ́ a ba sii duri a gɔ́ɔ̃-n wa, bɛa dɛnaa wɔ na á bǐɛ̃ kɔ.

³ Ma lɛ bɛ́ á goã tiɛ̃-n maa sii baraa ganaa, bɛa biikoo li ma pàã tumaa na á goã nyɛɛ. Ginii kɛ n ma á we lɛawaa tumaa gɔ́ɔ̃ nɛ.

⁴ A giala, penleen laanka tèlò ne, má n gɔn lɛ yɛ, ma gɔ̀nɔn mu dama ka taãlan gòɛ̃ nɛ. *Doa.

⁵ Kanna, má maa sii baraa pɛ n nɛ, ma pii kɔ maa sã lɛ wa. Má pɛ máa: Ma á die ma zɛ̀rɛn piì Dɛnaa Lawa nɛ. Bɛ lɛ n ke, ń maa sii baraa a guĩ saa ń bɔ ma mìi ni. Doa.

⁶ Bɔlɔgoondɛnan tumaa doamaa nɛ ǹ nə n nyankɔ miɛ̃, bɛ̀ ǹ tá die ka ǹ laadoo siin ni n li ǹ mɛn pinaa. Haalɛ koe sii mɛn bɛ́ boe la a min bii ka mu gole bɛ́ lɔn, bɛa re doe ǹ ganaa wa.

⁷ N din nə ma duru ǹ bǎã lɛa ma zɔ́ɔn la, n din nə ma kanbiɛ fuu ganaa, n din nə toɛ ma á kirisibaa ǹ loe loe bǎã yii ni. Doa.

⁸ Dɛnaa Lawa pɛ ma nɛ: Ma á re n darɛɛ, n doamaa bɛ́ n kɔ zii mɛn lɛ, ma á re bɛ nyɛɛ n nɛ. Ma á re doree koe n la, ma ga n walan.

⁹ N nyan nə n mìi baa kaka wa. N nyan goã ka sùi hinlaa dundun bɛ́ lɔn, yǎa n karafɔ we a lɛ-n, n baɛ̃ a biɛn ganaa wa. Bɛ̀ n nə n baa miɛ̃ wa, sii kɔn ba re n yii wa.

¹⁰ Nɔmaa gigiã á re min baraa yii. Sɛnɛ, min mɛn bɛ́ n foo doɛ Dɛnaa Lawa ganaa, Dɛnaa Lawa a kɔn-narɛɛ gole kɛ á re bɛa dɛnaa lɛnpɛnɛ.

¹¹ Ka toa ka foo kɔɔ̃n kɔ Dɛnaa Lawa a lɛa, min peperen lɛn, ka n nyɛnyɛɛ. Ka min sonboren lɛn tumaa, ka foo kɔɔ̃nbaa ǹ lɛ dɛ!