Loen 30 - LAWA A BOO SONBORE

Barka da Lawa nɛ ǹ loe

¹ Lawa a kion a zɔ́n loe. Davida a loe.

² Dɛnaa Lawa ma nə n din tɔ siɛ lon, a giala, ń wusoo ń ma kaka kɔ, n toa maa zɔ́ɔn nə́ n nyɛnyɛɛ ma la wa.

³ Dɛnaa Lawa, maa Lawa, má n lɛ dɛ n ganaa, ń ma kirisibaa.

⁴ Dɛnaa Lawa, ń ma si gɛ̀ la, má gã má nya, n din nə ń wusoo ń yiikoonaabaa kɔ ma la.

⁵ Lawa a min sonboren lɛn, ka loe lɔ ka Dɛnaa Lawa tɔ bɔ nɛ. Ka a tɔ bɔ, bɛ̀ ka tá a siĩnbaa kɛ pii.

⁶ A foo a busi min li a belebɔ wa. A bǐɛ̃ kɛ na a tan biikoo tumaa li. Haalɛ ta tèlò tumaa wuu baa, baayɛlɛ, nyɛnyɛɛ nə n we.

⁷ Masɛ dɔ n giã-n kiĩni ma ń pii: máa màn kɔn ba re bìn diɛ ma ganaa wa.

⁸ Dɛnaa Lawa, n din nə ń bǐɛ̃ kɔ ma ganaa, ń maa gòãn doa ǹ bǎã kaka kɔ. Sɛnɛ, ń nə́ n yɔrɔ duru ma la, bɛ lɛ n ke, nyɛ́ɛ gole ma kũ.

⁹ Dɛnaa Lawa, man má lɛ dia n din la, má gòã-kũ da n ganaa.

¹⁰ Dɛnaa Lawa, bɛ̀ ma gã, n tɔn wàa bɔ bɛ nɛ? N nə n wàa boe maa da yala-n nɛ? Tii á boe la a barka da n nɛ? Á boe la a n sonborebaa gole kɛ laakalaa?

¹¹ Dɛnaa Lawa, makara bɔ ma ganaa n nə n too kɔ! Dɛnaa Lawa, n din nə n baa maa dɔmalɛ wole lɛa!

¹² Ń maa foo-ziziɛ̃ lɛ bɔyaa ń baa bɛ̀ lɛa. Ń maa yɔrɔ-kɔsiɛ bɔyaa ń baa zɔ́n lɛa.

¹³ Bɛ lɛ n ke, ma á loe loe ka ma foo din tumaa nɛ, ma ba n lɛ tiɛ̃ wa. Dɛnaa Lawa, maa Lawa, man die barka diɛ n nɛ biikoo tumaa li.