Loen 21 - LAWA A BOO SONBORE

Gɔ̀lɔ̀baa yɛ ǹ barka diɛ loe

¹ LOE-saalin goledɛnaa loe mɛn lɔ. Davida a loe.

² E Dɛnaa Lawa! Kii lɛ nə n nyɛnyɛɛ ka n din pàã nɛ. N dɔmalɛ kɛ foo kɔɔ̃nbaa mɛn kɔ la, lɛ a pii wa.

³ N ná a foo sii zɛnaa nɛ, a lɛ màn mɛn pɛ, n nə n piã bɛ-n wa. *Doa

⁴ N din nə́ n da lɛ ka bǐɛ̃ sonboren ne. N din nə ń kiibaa ǹ bafolo wɔ a mìi-a, sana lɛa.

⁵ Á yiikoonaabaa nyankɔ n lon, ń bɛ kɔ la, ń nyin sasa kɔ la, bɛ ná a nyɛɛ wa.

⁶ N din a gɔ̀lɔ̀baa barka nɛ, á gugurubaa gole yɛ, n din nə ń siĩnbaa laanka golebaa kɔ la.

⁷ N din nə ń barka da-a yǎa duduu, n din nə foo kɔɔ̃nbaa koe la n din li.

⁸ Taãn nɛ, kii lɛ na á n foo doa Dɛnaa Lawa ganaa, Lon a Lawa a kɔn-narɛɛ gole kɛ pàã nɛ, màn kɔn ba re bìn diɛ a ganaa wa.

⁹ Kii, n gɔn tá re doe n zɔ́ɔn kɛn tumaa ganaa, n gɔn tá re doe n baa zɔ́ɔbaa wolen kɛn ganaa.

¹⁰ Bɛ̀ ń nə́ n parsii bɔ ǹ li ǹ mɛn pinaa, n tá re ǹ biɛ ka kùsì tɛ bɛ́ lɔn, nyii ǹ ni. Dɛnaa Lawa a foo yoo lɛ gɔ́ɔ̃ nɛ, a din tá re kiɛ̃ ǹ nɛ. Tɛ á re ǹ kuĩ a kiɛ̃ ǹ nɛ.

¹¹ Ǹ tɔrɔ papaã, n bɔ tán la, ǹ tɔrɔ papaã, n bɔ minbuiinin bii.

¹² Ǹ nə́ goã mà maǹ die sii baraa zɛnɛɛ n nɛ, ǹ nə́ taasiɛ baraa wɔ n wɔ paǹ li, sɛnɛ, a pàã ba re yii ǹ lon wa.

¹³ A giala, n bɛ́ re sa dii n koa ǹ ganaa, n tá re baa diɛ ǹ gòã li.

¹⁴ Dɛnaa Lawa, n din yoo n nə n pàã nyaa. Wɔsɛn man giɛ li wɔ loe saa, wɔ n pàãdɛnaabaa kɛ kalaa.