Loen 20 - LAWA A BOO SONBORE

Lawa nyan mɛn nə n kɔ kii ni

¹ LOE-saalin goledɛnaa loe mɛn lɔ. Davida a loe.

² Fuu pinaa, Dɛnaa Lawa die a n lɛ si. Zakɔba a Lawa kɛ die a n tamaa.

³ A die a n toa a din a kion sonbore kɛ nɛ, a dɔmalɛ dia n la. A die a n toa *Siɔn kele la, a n dɔ n lɛ.

⁴ N ná a guguru kɔ ka màn mɛn tumaa nɛ, a yiri die a goã bɛ li. N *wúlu màn mɛn kɔ la, a die a lɛ kɔ bɛ-a. *Doa

⁵ A die a n foo sii zɛnaa n nɛ. N bɛ́ màn mɛn li, a die a bɛ kɔ n la.

⁶ Bɛa biikoo li, wɔ á re n lɛ dii wɔ n nyɛnyɛɛ n gɔ̀lɔ̀baa kɛa lɛa, wɔ á re zanzan diɛ lon ka wɔa Lawa tɔ nɛ. N bɛ́ giɛ màn mɛn tumaa li, Dɛnaa Lawa die a bɛ kɔ n la.

⁷ Ma á doɛ̃ dinin gɔrɔ, máa Dɛnaa Lawa din kii mɛn bɔ á koa, á re gɔ̀lɔ̀baa koe bɛ la. A nə n toɛ a din a bǎã sonbore kɛ-n lon a tá a lɛ sii, a ná a lɛ sii ka a din a boo sii la pàã nɛ.

⁸ Kɛn mà ziabaa ǹ wotoron, kɛn mà ziabaa ǹ sùin, sɛnɛ wɔsɛn Dɛnaa Lawa tɔ ke, bɛ lɛ n wɔsɛn lɛ-n.

⁹ Ǹsɛn tá re niɛ̃ ǹ mɛnaa tán, wɔ dinin nə goã lon, wɔ piã.

¹⁰ Dɛnaa Lawa, gɔ̀lɔ̀baa kɔ kii la. Bɛ̀ wɔ́ n bíi lɔn, n wɔ lɛ si.