Loen 19 - LAWA A BOO SONBORE

Lawa a tɔ golebaa yɛ ǹ siin

¹ Davida a loe n ke.

² Lon nə Lawa a tɔ golebaa laakalɛɛ, lon gɔ̀nɔn na a nya ǹ dí nyɛɛ.

³ Lɛawaa na a boo diɛ biɛ̃ ǹ lɛawaa nɛ, tèlò na a boo diɛ biɛ̃ ǹ tèlò ne.

⁴ Ǹ boo-diɛ a miɛ wa, ǹ boo nɛ dɔ banban, too ba ǹ lɛn miɛ wa.

⁵ Sɛnɛ, ǹ bɛ́ sii mɛn nyɛɛ, bɛ nə n pɛsɛ̃ tán tumaa la, ǹ da ǹ boo n woe yǎa kanaa paǹ tumaa ganaa. Lawa kion doa lon á kɔ wasa la.

⁶ A n soe baayɛlɛ, ka lɔ tii ǹ zuũ bɛ́ soe a waa ǹ kion lɔn, a foo n kɔɔ̃nɛ ka gɔ̀lɔ̀ kɔn nɛ, á n yɔrɔ bɔ á n die baa sii, a kɔn daa ǹ baa sii.

⁷ A n soe lon paǹ goon ganaa, a wo a baa giala nyɔmɔɔ a paǹ kɔsɔ kɛ ganaa, a fuubaa ná a màn kɔn pusii wa.

⁸ Dɛnaa Lawa a landa lɛ n siĩni, a lɛ n piɛ̃ nɛ, á pàã koe min a yiikoonaabaa la. Dɛnaa Lawa a landa boo á kɔnboe ka foo doamaa nɛ, á yiri koe sii doɛ̃baã wole la.

⁹ Dɛnaa Lawa a minin doroo ǹ boon lɛn man pepere, ǹ tá min foo kɔɔ̃n koe. Dɛnaa Lawa a dí-pɛ lɛ n ka tɛ fúlu ni, a tá min yiri fúli.

¹⁰ Nyɛ́ɛ baa Dɛnaa Lawa-n lɛ n sii siĩn lɛa, bɛ lɛ n goɛ̃ yǎa duduu. Dɛnaa Lawa a sii yɔrɔ-bɔn man sonbore lɛa, a sii yɔrɔ-bɔ tumaa n pepere.

¹¹ Ǹ sii á min kuĩ á la sana nɛ, ǹ nə́ la sana sonbore gigiã nɛ. Ǹ tá kɔɔ̃nɛ ǹ nə́ la zoo ne, zoo mɛn din bɛ́ ǹ nə́ bɔ sisia.

¹² Man nə n gɔn wɛɛ ma dinmaa lɛ nɛ, Dɛnaa Lawa, masɛ mɛn bɛ́ n dí-nyali lɛa, n foo siin lɛn kɔmalɛ n là gole lɛa.

¹³ Die na a din a sã doɛ̃? N die n maa sãn toa ma nɛ.

¹⁴ Ka bɛ dɔ nɛ, ma kanbaa din gole-kɔlen kɛn ganaa, n nyan toa ǹ boo ma la wa. Bɛ lɛ n die toɛ maa sii lɛ pã, bɛ lɛ n die ma kanbiɛ sii baraa gole ganaa.

¹⁵ Dɛnaa Lawa, n din die n lɛ kɔ ma lɛ gɔ́ɔ̃ ǹ boon ganaa, ka ma gɔ́ɔ̃gɔ́ɔ̃ ǹ taasiɛn nɛ. N din lɛ n ma tamaali laanka ma nyin-sili lɛa.