Loen 17 - LAWA A BOO SONBORE

Nɔmaa-wɔle a lɛ-dɛ

1 Davida a Lawa nyankɔ.

¹ Davida a Lawa nyankɔ. Dɛnaa Lawa, sonbore pɛ n kɔ ma la! N too kɔ doɛ̃, n maa nyankɔ ma, ma nə n nyankoe ma gɔ́ɔ̃ n fu.

² Dɛnaa Lawa n din masɛ a kiri kuru. A giala n din yii n sonbore doɛ̃.

³ N din bɛ́ ń ma gɔ́ɔ̃ gɔsɛ, tèlò-n, ń ga maa sii ganaa, ń nə́ n da ma gɔ́ɔ̃ li, n bɛ́ n màn kɔn yɛ ma-a wa. Ma màn mɛn taasɛ, maa da ǹ boo kiɛ̃ bɛ la wa.

⁴ Ka n din pɛ lɔn, bɛ̀ má ga minbuiinin kɛn zɛnaa ǹ sii kɛ-a, ma nə n nyɛnɛɛ min kakaarɛn kɛn zɛnaa ǹ sii ni.

⁵ Man má kɔ n din gòɛ̃ lɛ, ma talaa wa.

⁶ Aa maa Lawa! Ma nə n bíi we, a giala n tá ma lɛ sii. N too da, n ma lɛ gɔ́ɔ̃ ǹ boo ma.

⁷ Min mɛnɛn bɛ́ kiɛ n yele, n din nə bɛn kirisibiɛ ǹ zɔ́ɔn ganaa. N kɔn-narɛɛ gole ke kaãbaa diɛ, bɛ nyaa.

⁸ N bɛ́ n din yii nàn tamaɛ lɔn, ma tamaa miɛ̃. Ma duru n din nyàa giulun.

⁹ Min baraan kɛn fuu nyɛɛ ma nɛ, ma kanbaa ǹ ganaa. Zɔ́ɔ babaraan kɛn ma lɛnpɛnɛ, ma si ǹ la.

¹⁰ Makara kɔn ba ǹ foo-n wa. Ǹ boo tumaa din koa ǹ boo.

¹¹ Ǹ nə́ kɔ ma lɛ, ǹ nə́ ma lɛnpɛnɛ kanna, maǹ giɛ maa bɔ a daa ǹ gɔn li.

¹² Maǹ ka yàra bɛ́ lɔn, bòo ná a ganaa, maǹ ka yàra ten bɛ́ lɔn, kuu koe.

¹³ Dɛnaa Lawa, n din yoo n nə n da ǹ lɛ, n nə ǹ dɛ n nə ǹ kaa tán. N din ma kirisibaa zɔ́ɔn lɛn ganaa, ka n gɔya sa kɛ nɛ.

¹⁴ Dɛnaa Lawa, n din gɔn ma kirisibaa kanaa minbuiinin kɛn ganaa! Ǹsɛn wɔ gii n ka kanaa kɛ nɛ. N màn mɛn koa, maǹ nə n nɔ̀ piɛ̃ ka bɛ lɛ nɛ. Ǹ nɛnyaanan dɔn man kiɛ̃ ka bɛ lɛ nɛ, man a gialakun din koɛ ǹ nɔ̀ɔnɔn manɛ.

¹⁵ Sɛnɛ, masɛ wɔ paǹ li, peperebaa gɔ́ɔ̃ nɛ, ma á re kɔn yii ka n din ni. Bɛ̀ má yoo lɔn, má kɔn yɛ ka n din ni, ma foo n nyɛɛ.