Loen 147 - LAWA A BOO SONBORE

Min mɛnɛn sii bɛ́ kiɛ Lawa foo la

¹ Aleluya, ka Dɛnaa Lawa tɔ bɔ! Wɔ wɔa Lawa tɔ bɔ ka loe ne, bɛ lɛ n siĩni. Wɔ a tɔ bɔ ǹ loe lɔ sɔnbɔraanɛ, bɛ lɛ n kɔɔ̃nɛ.

² Dɛnaa Lawa n wusii Zeruzalɛmu doe. A n Izirayeli nɛnyaanan boe bɛ̀rɛbaa nɛ, ǹ soekɔn.

³ Min mɛnɛn foo bɛ́ busii ni, a din nə bɛn foo-busii nyɛɛ, a din nə foo-basiɛ̃ koe ǹ la.

⁴ A din nə leeren nimii, a tɔ kɔ ǹ gogoonmaa ganaa.

⁵ Wɔa Dɛnaa lɛ á gole, Pàãyiidɛnaa nɛ. A sii-doɛ̃ kɛ lɛ dan banban.

⁶ Dɛnaa Lawa nə n doe nɔmaa-wɔlen lɛ, á nə́ ǹ siɛ ǹ diɛ lon. Min baraan kɛn, a n bɛn gisĩ yǎa tán.

⁷ Ka loe lɔ ka barka da Dɛnaa Lawa nɛ. Ka loe lɔ ka tùtu da li, ka wɔa Lawa tɔ bɔ nɛ.

⁸ A din nə labaran koe lon lɛ. A din nə la mu zɛnɛɛ tán wɔ lɛa, a din nə buu diɛ bɔ ganaa kelen la.

⁹ A n màn-bii koe tɔɔn kɛn la, a n koe zankoo nɛn kɛn dɔn la, n lɛ dii li.

¹⁰ Sùi pàã bie a foo kɔɔ̃n koe wa, gòã kaka-a a sii zɛnaa bie kiɛ a foo la wa.

¹¹ Sɛnɛ, min mɛnɛn bɛ́ nyɛ́ɛ biɛ Dɛnaa Lawa nɛ, min mɛnɛn bɛ́ n foo doɛ a kɔn-narɛɛ gole kɛ ganaa, bɛn lɛn sii n kɔɔ̃n a ganaa.

¹² Zeruzalɛmu minin, ka Dɛnaa Lawa gugurukɔ, *Siɔn minin, ka loe lɔ ka Lawa tɔ bɔ nɛ.

¹³ A giala, kaa kiɛnlɛ-aǹ goon kɛn, a din na á ǹ fɔlɔ bàlàn baa kaka. A din na á barka da kaa nɛnyaanan ganaa kaa kiwi lɛ gɔ́ɔ̃ nɛ.

¹⁴ A din nə là nyantoro koe kaa gána la. A din nə ka toe ka tán-kɔsiɛ màn tumaa a sonbore ne.

¹⁵ A na a dí-pɛn diɛ kanaa minin la, a boo lɛ n woe ka baa nɛ, a gòã yii n fuu.

¹⁶ A din nə *mu nyuù-wɔle fu kiɛ, ka koara nɛ, a din nə burumu pɛsɛ̃ ka ton bɛ́ lɔn,

¹⁷ a n la gii kiɛ ka kɔlɔ bɛ́ lɔn. A bɛ́ nyan mɛn boe, die n boe la a si a ganaa?

¹⁸ Sɛnɛ, bɛ̀ Dɛnaa Lawa boo da, kɛ tumaa n yoe. Bɛ̀ á piɛ̃ bɔ, a tumaa n mu biɛ.

¹⁹ A din na a boo nyɛɛ Zakɔba tɔrɔn manɛ. A na a landan laanka a dí-pɛn koe Izirayeli minin la.

²⁰ A kɛ miã zɛnaa tɔrɔ kɔsɔ kɔn nɛ wa, Tɔrɔn mɛnɛn bɛ́ ǹ ba a dí-pɛn doɛ̃ wa. Aleluya, ka Dɛnaa Lawa tɔ bɔ!