Loen 146 - LAWA A BOO SONBORE

Dɛnaa Lawa a dɔmalɛ wolebaa loe

¹ Aleluya, ka Dɛnaa Lawa tɔ bɔ! Man die Dɛnaa Lawa tɔ boe, ka ma foo tumaa nɛ.

² Maa yiikoonaabaa tumaa gɔ́ɔ̃ nɛ, ma tá li ma Dɛnaa Lawa tɔ bɔ. Bɛ̀ ma yii á koo, man die loe loe, ma maa Lawa tɔ bɔ nɛ.

³ Ka baran n foo doa pàãdɛnan ganaa wa, minbuiin nɛn manɛ, ǹ ba boe la ǹ ka kirisibaa wa.

⁴ Ǹ fɔfoaã á re nyɛɛ, ǹ tá re wusii ǹ wo tii li. Bɛa pinaa, ǹ sii mɛn tumaa koa ǹ yiri ni, bɛ tumaa na á sàabaa.

⁵ Sɛnɛ, Zakɔba a Lawa kɛ bɛ́ min mɛn a dɔmalɛ wole lɛa, min mɛn bɛ́ n foo doɛ a Dɛnaa Lawa kɛ ganaa, bɛ wɔ na á bǐɛ̃ kɔ.

⁶ Dɛnaa Lawa na á lon laanka tán zɛnaa, kɔ̀ mu ni, ka mànan mɛnɛn tumaa bɛ́ li. A n bɔlɔgoondɛnaa lɛa biikoo tumaa li.

⁷ Ǹ bɛ́ boe min mɛn yii ni, a din nə sonbore koe bɛ la. A din nə màn-bii koe bòonaan la. A din nə kòso nɛn sii á ǹ kiɛ.

⁸ Dɛnaa Lawa n yii tere-an yii buĩ. A din nə talaa wolen kuĩ ǹ koɛ lon. A n min peperen narɛ.

⁹ A din nə gùlin tamaɛ. A nə n doe nɛ toenən laanka giɔɔrɔn lɛ. Sɛnɛ, a toɛ min baraan sii bǐɛ̃ kɔ wa.

¹⁰ Dɛnaa *Lawa a kiibaa ba nyɛɛ wa. *Siɔn kele minin lɛn, a n kaa Lawa lɛa yǎa duduu. Aleluya, ka Dɛnaa Lawa tɔ bɔ!