Loen 145 - LAWA A BOO SONBORE

Lawa a kiibaa boo

1 Davida a Lawa tɔ bɔ ǹ loe n ke.

¹ Davida a Lawa tɔ bɔ ǹ loe n ke. Maa Lawa, n din nə maa kii lɛa. Man die n din guguru koe, man die barka diɛ n din ni miɛ̃ duduu.

² Man die barka diɛ n nɛ lɛawaa tumaa li, man die n din tɔ boe miɛ̃ duduu.

³ Dɛnaa Lawa á gole, wɔ doamaa-n wɔ a guguru kɔ taãn-taãnɛ. Min ba boe la n na a golebaa kɛ lɛ-doa dɔ̃ wa.

⁴ Biikoo tumaa a minin tá re n nya ǹ dín kɛn boo diɛ ǹ nɛnyaanan manɛ. Ǹ tá re n boo sii la kɛ laakalɛɛ.

⁵ Ma á die n kaãbaa ǹ siin kɛn boo diɛ, ka n gugurubaa kɛ nɛ, ka n tɛ-pɛ a siĩnbaa kɛ nɛ.

⁶ Minin tá re n kaãbaa ǹ sii dadaran kɛn boo diɛ, ma á die n sii dadara zɛnaan kɛn laakalɛɛ.

⁷ Ǹ tá re n yiri koɛ n bǐɛ̃-zɛnaa dadaran kɛn nɛ, ǹ nə ǹ laakalaa. Ǹ tá re n nyɛnyɛɛ ǹ nə n peperebaa kɛ boo da.

⁸ Dɛnaa Lawa din nə Lawa bǐɛ̃ lɛa, a tá min makara doɛ̃. A foo a yui fufuu wa, kɔn-narɛɛ ná a foo pã.

⁹ Dɛnaa Lawa n bǐɛ̃ koe min tumaa ganaa, a na a màn-zɛnaan tumaa narɛ.

¹⁰ N màn-zɛnaan lɛn tumaa á die n tɔ boe, Dɛnaa Lawa, n minin tá re barka diɛ n nɛ.

¹¹ Ǹ tá re n kiibaa kɛa gugurubaa pii, ǹ tá re n boo sii la kɛ laakalɛɛ.

¹² Ǹ tá re n boo sii lan kɛn nyɛɛ minin manɛ, ǹ tá re n kiibaa kɛa gugurubaa nyɛɛ, ka a siĩnbaa kɛ nɛ.

¹³ N kiibaa lɛ a nyɛɛ wa, a na a tan yǎa duduu. N pàã lɛ n goɛ̃ yǎa duduu. Lawa n bɔlɔgoondɛnaa lɛa a da ǹ boo tumaa gɔ́ɔ̃ nɛ, a zɛnaa ǹ sii tumaa n siĩni.

¹⁴ Dɛnaa Lawa nə n doe bɔ a mɛnaa wolen tumaa lɛ. Min mɛnɛn bɛ́ zoɛ̃ maǹ talaa, a din nə bɛn kuĩ ǹ koɛ lon.

¹⁵ Min tumaa yii nə n din la, ǹ foo n doa nɛ n din ganaa. N din nə màn-bii koe ǹ la a biikoo li.

¹⁶ N din nə n gɔn lɛ buĩ, n tá màn yiikoonaa tumaa kiɛ̃ ka a dùũ màn-bii ni.

¹⁷ Dɛnaa Lawa a sii tumaa n pepere, a zɛnaa ǹ sii tumaa n siĩni.

¹⁸ Dɛnaa Lawa wɔlɔ á kunu a nyankɔlen tumaa ganaa. Min mɛnɛn tumaa bɛ́ a nyankoe ka ǹ parsiini, a wɔlɔ á kunu bɛn ganaa.

¹⁹ A na a nyɛ́ɛbaama-n wolen foo sii zɛnɛɛ ǹ nɛ. A nə n too koe ǹ lɛ-dɛ li, a tá ǹ kirisibiɛ.

²⁰ Min mɛn tumaa bɛ́ Dɛnaa Lawa narɛ, á re bɛn tamaɛ. Sɛnɛ, á re min baraan kɛn tumaa bɔ̀n biɛ.

²¹ Ma lɛ á re Dɛnaa Lawa tɔ boe. Màn tumaa die a barka da Dɛnaa Lawa sonbore kɛ nɛ, biikoo tumaa li yǎa duduu!