Loen 144 - LAWA A BOO SONBORE

Kii a gɔ̀lɔ̀baa loe

1 Davida a loe.

¹ Davida a loe. Maa barka á Dɛnaa Lawa ganaa. A din nə ma tamaɛ, a din nə ma darɛɛ ziabaa ganaa, a din nə pàã koe ma la zia la.

² A din nə maa dàã lɛa, ma gòãn doa ǹ bǎã kaka nɛ. A din nə ma tamaɛ, a din nə ma boe sii ni. Maa goóro ne, ma nə n duri a din li. A din na á tɔrɔ kɔsɔn kɛn kaa maa pàã giulun.

³ Dɛnaa Lawa, minbuiin nɛ n wàa lɛa, n tɔn nə n yiri koa li? Minbuiin nɛ n wàa lɛa, n tɔn nə n taasɛ ka a sii ni.

⁴ Minbuiin nɛ n ka piɛ̃ bɛ́ lɔn, a tá kanaa lɛ n kiɛ̃ ka lɛ̀ wúlu ni.

⁵ Dɛnaa Lawa, lon kɛ toɛ̃ n gisĩ, n gɔn da kelen-a, ǹ tɛmaa bɔ.

⁶ Paraa maa zɔ́ɔn kɛn li, n nə ǹ sasawaa kɔn. N kiɛn kɛn dia ǹ la, n nə ǹ kaa baa ganaa.

⁷ N toa lon, n nə n gɔn dia, n ma kirisibaa. Ma si koe kɛ la, die ma bii ka mu gole bɛ́ lɔn, ma si tɔrɔ kɔsɔ minin kɛn la.

⁸ Ǹ bɛ́ boo mɛn diɛ, soɛ nɛ. Maǹ nə n liɛ ǹ gusin nə́ Lawa la, sɛnɛ, ǹ ba koe ǹ da ǹ boo dɔ lɛ wa.

⁹ Lawa, man die tùtu nɛ fùdɛnaa dii, man die loe dii loe, ma n tɔ bɔ nɛ:

¹⁰ N din nə gɔ̀lɔ̀baa koe kiin la, n din nə Davida kirisibiɛ,

¹¹ ń nə́ n bɛ̀rɛgiĩ kirisibaa, gɔya sa gɛ̀-dɛli kɛ ganaa. Ma kirisibaa, n ma si tɔrɔ kɔsɔ minin kɛn la. Ǹ bɛ́ boo mɛn diɛ, soɛ nɛ. Maǹ nə n liɛ ǹ gusin nə́ Lawa la, sɛnɛ, ǹ ba koe ǹ da ǹ boo lɛ wa.

¹² Toa wɔa nɛgiĩn kɛn nə goã ka dan manɛ, ǹ yoo tán waáraa gɔrɔ, ǹ too pololo pololo. Toa wɔa nɛlɔn nə siĩn kɔ ka bìbìn bɛ́ lɔn, ǹ bɛ́ ǹ nə́ bìbìn mɛnɛn nyaǹ kɔ kiin kion.

¹³ Toa wɔa dɔǹɔn nə pã, toa ǹ pã ka màn tɔrɔ tumaa nɛ perepere. Toa wɔa tɔɔn nə bulu bɔ duu damata, toa ǹ mɔnaa duu damata, wɔa gána lɛ nɛ.

¹⁴ Toa wɔa diin nə kasã parsiini. Wɔ kanbaa bɔ̀n laanka goa a wo bɛ̀rɛbaa-n ganaa, wuu dɔ baran bɔ wɔa gána kɛ paǹ kɔn nɛ doo wa.

¹⁵ Bɛ̀ bɛa mànan kɛn lɛn tumaa tá tɔrɔ mɛn gɔn, bɛ foo á re kɔɔ̃n koe. Dɛnaa Lawa bɛ́ tɔrɔ mɛn a Lawa lɛa, bɛ wɔ na á bǐɛ̃ kɔ.