Loen 143 - LAWA A BOO SONBORE

Nɔmaa-wɔle a ga dɔmalɛ li boo

1 Davida a loe.

¹ Davida a loe. Dɛnaa Lawa, maa nyankɔ ma. N too kɔ, n maa gòã-kũ si. Ma lɛ si, n bɔlɔgoondɛnaabaa kɛ laanka n peperebaa kɛa lɛa.

² N baran kiri wɔ n bɛ̀rɛgiĩ lɛ-a wa, a giala, min kɔn ba pepere nsɛ yɔrɔ-a wa.

³ Maa zɔ́ɔ kɛ n fuu nyɛɛ ma nɛ. Á ma duwəə tán, á tɔtɔrɔ ma la. Á ma da wɔlɔ tì a giã li, ka min mɛn din a gɛ̀ bɛ́ á belebɔ lɔn.

⁴ Ma gù yii gã ma din-a, ma a boe sii kɔn din la doo wa.

⁵ Ma nə n yiri koe ka lɛlɛ ǹ siin kɛn nɛ, n sii mɛn tumaa zɛnaa, ma nə n taasɛ bɛ nɛ. N dí mɛn nya, ma nə n taasɛ bɛn nɛ.

⁶ Ma gɔn nə n din la, ma tá n nyankoe. N sii n ma ganaa, ka mu boro bɛ́ tán gere kuĩ lɔn. *Doa

⁷ N nanaa Dɛnaa Lawa, n ma lɛ si. Á ke ma gù yii gã ma din-a. N baran n wàã kɔ ma-n wa. Bɛ bie wa, maa wɔ na á nya.

⁸ Bɛ̀ lɛ̀ waa lɔn, n kɔn-narɛɛ gole kɛ nyaa ma nɛ, a giala, ma foo n doa nɛ n din ganaa. Ma doamaa bɛ́ ma zii mɛn saa, bɛ nyaa ma nɛ, a giala, ma yii nə n din la.

⁹ Dɛnaa Lawa, ma kanbaa maa zɔ́ɔn kɛn ganaa. A giala, man má kaa n din yele.

¹⁰ Ma daraa n foo sii zɛnaa ganaa, a giala, n din nə maa Lawa lɛa. N yiri sonbore kɛ die a ma da zii pepere la.

¹¹ N din tɔ kɛa gugurubaa taman yii, Dɛnaa Lawa, toa ma yii goã koo. N din a peperebaa taman yii, ma bɔ n ma bɔ fuu ni.

¹² N kɔn-narɛɛ lɛ á gole parɛ. Maa zɔ́ɔn kɛn lɛ naa, maa ziadɛnan kɛn tumaa dɛ. A giala, ma nə n din a bɛ̀rɛgiĩ lɛa.