Loen 141 - LAWA A BOO SONBORE

Saa min baraan li baã boo

1 Davida a loe.

¹ Davida a loe. Aa Dɛnaa Lawa, ma nə n bíi we: Da ma la fufuu. Bɛ̀ ma á n bíi we, n too kɔ ma lon. Ma nə n bíi we, da n too kɔ ma lon!

² Toa maa nyankɔ dii n din li, ka nyɔɔ gìĩ kɔɔ̃n bɛ́ lɔn. Ma gɔn tá n la, ma gɔn si, ka wasamiɛ̃n a *wúlu màn bɛ́ lɔn.

³ Dɛnaa Lawa, n nyan toa ma lɛ sã a boo da wa, Dɛnaa Lawa, toa ma yiri bɔ maa da ǹ boo li.

⁴ Boo baraa diɛ kɛ bɔ, n bɔ ma yiri ni, n nyan toa ma kɔ min baraan kɛn zɛnaa ǹ sii lɛ wa. Ǹ zɔ́n màn-bii kɛ baran wɔ ma lɛ-n wa.

⁵ Min pepere á boe la a ma dɛ, a ma doroo ka giaárabaa nɛ. Sɛnɛ, min baraan kɛn giaárabaa ǹ siin kɛn, ma ba bɛn li wa. Man Lawa nyankoe dinin, máa Lawa ma kanbaa ǹ baraabaa kɛ ganaa.

⁶ Min mɛnɛn bɛ́ pii diɛ ǹ lon, bɛ̀ bɛn nə́ bɔ ǹ nə́ n tɔ tán kɔlɔ la ǹ mɛn waáraa, maa zɔ́ɔn kɛn tá re doɛ̃, mà maa boo lɛ n taãn lɛa.

⁷ Diin kána bɛ́ tii dii bɛ̀ a pɛsɛ̃ lɔn, maǹ nə́ wɔ wen pɛsɛ̃ yala lɛ-a miɛ̃.

⁸ Aa Dɛnaa Lawa, ma yii nə n din la. Man kiɛ n din yele, n nyan toa ma bɔ̀n baa wa.

⁹ Ǹ kan mɛn koa ma nɛ, ma kanbaa bɛ ganaa. Min baraan kɛn bɛ́ gɔn mɛn diɛ ma-a, ma kanbaa ǹ ganaa.

¹⁰ Toa min baraan kɛn kan nə ǹ dinin kũ, sɛnɛ, toa masɛ kanbaa a ganaa.