Loen 140 - LAWA A BOO SONBORE

Lawa a min tamaa laanka a kirisibaa boo

¹ LOE-saalin goledɛnaa loe mɛn lɔ. Davida a loe.

² Dɛnaa Lawa, ma si min baraan kɛn la, ma kanbaa min kakaarɛn kɛn-a,

³ min mɛnɛn lɛn bɛ́ ke, ǹ nə́ sii baraa taasɛ ǹ gɔ́ɔ̃ nɛ, ǹ nə́ zia yui baraabaraa.

⁴ Maǹ nə́ n lɛ loe sii baraa li, ka miɛ̃ bɛ́ lɔn, sèwò baraa nə n lɛ giulun, ka miɛ̃ baraa bɛ́ lɔn. *Doa

⁵ Dɛnaa Lawa, n nyan toa min baraan kɛn gɔn dɔ ma-a wa. Ma kanbaa min kakaarɛn kɛn ganaa, bɛn mɛnɛn bɛ́ giɛ maa bɔ a daa ǹ gɔn li.

⁶ Din-koalin nə́ kan koa ma nɛ. Ǹ nə́ biɛ laanka zɔ̀ɔ koa zii para-a, maǹ gɔn diɛ ma-a walan. Doa

⁷ Má pɛ Dɛnaa Lawa nɛ: N din nə maa Lawa lɛa. N too kɔ, n maa gòã-kũ si.

⁸ Dɛnaa Lawa, n din pàã kɛ n ma kirisibiɛ. Zia-baa pinaa, n din nə́ ń ma mìi tamaa.

⁹ Dɛnaa Lawa, n nyan toa min baraan kɛn gɔ́ɔ̃gɔ́ɔ̃ ǹ sii giala yɛ wa. Ǹ sii mɛn yɔrɔ bɔ, n nyan toa a giala yɛ wa, bɛ bie wa, ǹ tá re n dinin gole koe. Doa

¹⁰ Min mɛnɛn bɛ́ ma gialaa paǹ tumaa li, bɛn man boo baraa diɛ ma ganaa. Haya, toa ǹ boo baraa lɛ yu ǹ dinin mìi ni.

¹¹ Toa tɛ nàn nə kaa ǹ la, ǹ nyɛnaa ǹ nə ǹ zũ tɛ-n, n nə ǹ zũ nyankɔrɔ zuzulu kɛ nɛ, ǹ baran boo la ǹ soo duduu wa.

¹² Lɛwɔn babaraadɛnan kɛn doamaa bie ǹ giã gána lɛ-n wa. Min baraa mɛn bɛ́ kakaarɛbaa ǹ sii zɛnɛɛ, ka loo ka bɔ gána lɛ nɛ, ka nyan makara bɔ a-a wa.

¹³ Ma á doɛ̃, máa Dɛnaa Lawa din tá re koe-yɛle a sii yɔrɔ boe, a din tá re doobaa a sii yɔrɔ boe.

¹⁴ Sonbore, min peperen tá re n tɔ guguru koe. Min mɛnɛn gɔ́ɔ̃ bɛ́ fu, bɛn tá re giɛ̃ n yɔrɔ-a.