Loen 139 - LAWA A BOO SONBORE

Lawa a sii tumaa doɛ̃ loe

1 LOE-saalin goledɛnaa loe mɛn lɔ. Davida a loe n ke.

¹ LOE-saalin goledɛnaa loe mɛn lɔ. Davida a loe n ke. Dɛnaa Lawa, n din nə ń ma gɔ́ɔ̃ gɔsɛ, n maa sii tumaa dɔ̃.

² N tá maa waa tán laanka maa yoo doɛ̃. N din nə n toɛ sɔsɔɔ n tá maa taasiɛ doɛ̃.

³ Ta man kanaa, ta man waa-n tán kion, n din yii n ma ganaa. N tá maa nya ǹ dín tumaa doɛ̃.

⁴ Ma laan bɛ̀ ma boo bɔ ma lɛ-n ma da, bɛ̀ nsɛ din dɔ̃ gɔrɔ, Dɛnaa Lawa.

⁵ N din nə ma kio, n din nə ma nyɛɛnɛ, n tá ma tamaɛ. N din nə n gɔn koe ma lɛ.

⁶ N din a ma dɔ̃ kɛnɛn ke, kaãbaa ǹ sii ni, á kiɛ̃ maa sii-doɛ̃ la. Á la yii ni, ma ba a giala miɛ wa.

⁷ Man die woe maa, ma wɔlɔ tɔn lui n ganaa? Man die baa sii ma wo maa, n nə́ n ba ma yii wa?

⁸ Bɛ̀ má dii má woo lon, n bɛ́ walan. Bɛ̀ má gisĩ tán geren piɛ, ń ke!

⁹ Bɛ̀ má yoo má woo haalɛ lɛ̀giala-n, hinlaa bɛ̀ má woo giã haalɛ lɛ̀nyɛɛnɛ,

¹⁰ haalɛ walan dɔ nɛ, n din nə ma kuĩ ma gɔn ganaa, n din nə ma kuĩ ka kaka.

¹¹ Bɛ̀ má pɛ máa wɔlɔ tì sɛ nə n kuməə ma lɛ, ma bɛ́ lɛawaa mɛn gɔ́ɔ̃ nɛ, bɛ nə́ n bɔyaa á tèlò baa,

¹² haya, wɔlɔ bɛ́ a ba tì koe nsɛ ganaa wa. Tèlò n foaã nɛ ka lɛawaa nɛ, wɔlɔ tì n ka tɛ fúlu bɛ́ lɔn n yii li.

¹³ N din nə ń ma gɔ́ɔ̃ zɛnaa, ń ma gùn wɔwɔ kɔn lɛ ma dan gɔ́ɔ̃ nɛ.

¹⁴ Dɛnaa Lawa, ma á barka diɛ n nɛ. N ma zɛnaa ka yɔrɔ mɛn nɛ, kaãbaa ǹ sii ni. Ma á doɛ̃ taãn-taãnɛ, n zɛnaa ǹ siin lɛn tá kaãbaa diɛ.

¹⁵ Ma wen ba durii ni n ganaa wa. A giala n din nə ń ma zɛnaa bǎã durii ni, ń ma gùn wɔwɔ kɔn lɛ maa náa gɔ́ɔ̃ nɛ.

¹⁶ Ma laan bɛ̀ ma yɛ, bɛ̀ n yii tá ma ganaa. Lɛawaan mɛnɛn nə n kɔ ma la, má n die zɛnɛɛ kanaa, ń bɛn tumaa kiɛ̃ n sɛ́wɔ kɛ nɛ, bɛ̀ ǹ tɔn nə n giala kɔ wa.

¹⁷ E Lawa! N bɛ́ siin mɛnɛn taasɛ, ǹ doɛ̃ á kaka ma ganaa. Ǹ nə́ mɔnaa ǹ nə́ la yii ni.

¹⁸ Má goã máa ma nə ǹ nimii, sɛnɛ, ǹ nə́ mɔnaa ǹ nə́ la nyɔɔsɔ̃ nɛ. Haalɛ ta má ǹ nimi má nya, ma ba re n sii giala miɛ ma nya wa.

¹⁹ Lawa, n die n min baraan kɛn dɛ. Gɛ̀-dɛlen kɛn loo n nə ǹ bɔ ma ganaa.

²⁰ N zɔ́ɔn man minin bebele ka n din tɔ nɛ, maǹ sii baraa zɛnɛɛ ka n din tɔ nɛ.

²¹ Min mɛnɛn bɛ́ n biɛ zɔ́ɔ, masɛ dɔ n bɛn biɛ zɔ́ɔ. Min mɛnɛn bɛ́ zia diɛ n ganaa, bɛn tìĩ n boe-n ma dɔ nyin ni.

²² Má ǹ baa zɔ́ɔ á kiɛ̃ a bǎã la, má ǹ baa ma din a zɔ́ɔn lɛa.

²³ Lawa, ma gɔsɛ, n ma gɔ́ɔ̃ dɔ̃. N da ma gɔ́ɔ̃ li, n maa taasiɛ dɔ̃.

²⁴ N din ga a ganaa bɛ̀ má zii baraa saa. N din ma da n zii kɛ la yǎa duduu.