Loen 138 - LAWA A BOO SONBORE

Barka da Lawa nɛ ǹ loe

1 Davida a loe.

¹ Davida a loe. Dɛnaa Lawa, man barka diɛ n nɛ, ka ma foo tumaa nɛ. Man die loe loe ma n tɔ bɔ nɛ, lon màn pàãdɛnan kɛn yɔrɔ-a.

² Man die n musin koɛ tán, ma yɔrɔ nə́ n kion sonbore kɛ la, ma barka da n nɛ, n kɔn-narɛɛ gole kɛ laanka n bǐɛ̃ duduu kɛ a lɛa. A giala, n kɔ n da ǹ boo lɛ, wɔ yiri din bɛ́ a ba màn mɛn-a wa, ń bɛ zɛnaa wɔ nɛ.

³ Ma bɛ́ má lɛ dia n la ǹ mɛn pinaa, ń nə́ n nyəə ma la. Ń ma foo taã, ń màn da ma pàã li.

⁴ Bɛ̀ kanaa a kiin nə́ n lɛ gɔ́ɔ̃ ǹ boo ma, ǹ tumaa á re barka diɛ n nɛ, Dɛnaa Lawa.

⁵ Ǹ tá re n nya ǹ dín lɛn kalɛɛ ka loe ne: Dɛnaa Lawa a gugurubaa la yii ni.

⁶ Ta Dɛnaa Lawa din nə lon sɔsɔɔ lɔn, a yii tá minbuiin tumaa a kiɛɛrɛdɛnaa ganaa, a nə n toɛ sɔsɔɔ, a din gole-kɔlen dɔ̃.

⁷ Ta man nɔmaa bii, n din nə ma kanbiɛ, n tá maa zɔ́ɔn kɛn foo-busii toɛ ǹ gɔ́ɔ̃ nɛ. N din tá re ma kirisibiɛ, ka n din pàã nɛ.

⁸ Dɛnaa Lawa á re sii tumaa bǐɛ̃ koe, a kɔ ma la. Dɛnaa Lawa, n kɔn-narɛɛ gole kɛ a nyɛɛ duduu wa. N din gɔn na á wɔ zɛnaa, n nyan wɔ daa bii-a wa.