Loen 135 - LAWA A BOO SONBORE

Dɛnaa Lawa tɔ a goã yǎa duduu boo

¹ Aleluya, ka Dɛnaa Lawa tɔ bɔ! Ka Dɛnaa Lawa tɔ bɔ, Lawa a bɛ̀rɛn lɛn, ka Dɛnaa Lawa tɔ bɔ,

² kasɛn mɛnɛn bɛ́ golee Dɛnaa Lawa a Kion, kasɛn mɛnɛn bɛ́ golee wɔa Lawa a Kion kɛa sumu-n.

³ Ka Dɛnaa Lawa tɔ bɔ. A giala, á siĩni. Ka a tɔ bɔ ǹ loe lɔ. A giala, a sii á kɔɔ̃nɛ.

⁴ A din na á Zakɔba tɔrɔn bɔ a wɔn lɛa, a din na á Izirayeli tɔrɔn baa a din a minin lɛa.

⁵ Sonbore, má dɔ̃ máa Dɛnaa Lawa á gole. Minbuiinin bɛ́ màn mɛn tumaa guguru koe, wɔsɛn Dɛnaa lɛ á gole á la bɛn tumaa nɛ.

⁶ Sii mɛn tumaa bɛ́ kɔɔ̃n Dɛnaa Lawa ganaa, a n bɛ zɛnɛɛ, lon ka kanaa gɔ́ɔ̃ nɛ, kɔ̀ mu li, mu zuzulu tumaa giulun.

⁷ A din nə labaran goɛ lon kanaa gùrù goon ganaa, a la da tɛ-pɛ ganaa, màn mɛn bɛ́ toɛ la kaa. A din nə piɛ̃ boe a bǎã nɛ, a da bɔ ganaa.

⁸ A din na á gɔn binaan nɛn dɛ Ezipti, minbuiinin wɔn nɛ, ka tɔɔn wɔn nɛ.

⁹ Á kɔlɔnbaa ǹ siin laanka kaãbaa ǹ siin zɛnaa kaa piɛ, kasɛn Ezipti minin lɛn! Á yoo Eziptin kii laanka a kiodɛnan tumaa gialaa.

¹⁰ Tɔrɔn mɛnɛn nə mɔnaa, a din na á bɛn dɛ, pàã bɛ́ kiin mɛnɛn lon, á bɛn nyin nya:

¹¹ Amɔɔrɔn kii Sihɔn nɛ, Basan kii Ɔgu ni, ka Kanaan kiin tumaa nɛ.

¹² Á ǹ gána baa kíɛ̃ lɛa, á kɔ Izirayeli minin la kíɛ̃ lɛa, a din a minin lɛn.

¹³ Dɛnaa Lawa, n tɔ kɛ a papaɛ̃ duduu wa, Dɛnaa Lawa, minbuiinin yiri a boe n ne wa.

¹⁴ A giala, Dɛnaa Lawa din tá re a minin sii yɔrɔ boe, min mɛnɛn bɛ́ dí nyɛɛ nɛ, á re makara boe bɛn-a.

¹⁵ Tɔrɔ kɔsɔn bɛ́ mànan mɛnɛn guguru koe, maǹ nə́ ǹ zɛnaa ka wɔrɔ nɛ, ka sana nɛ. Minbuiin nɛ gɔn na á ǹ zɛnaa.

¹⁶ Lɛ tá ǹ lon, sɛnɛ, ǹ ba boo diɛ wa, yiin tá ǹ lon, sɛnɛ, ǹ ba wɔlɔ yii wa,

¹⁷ toon tá ǹ lon, sɛnɛ, ǹ ba boo miɛ wa, fɔfoã kɔn ba soe ǹ ne wa.

¹⁸ Min mɛnɛn nə ǹ zɛnaa, min mɛn tumaa bɛ́ n foo doɛ ǹ ganaa, toa ǹ dɔn nə n baa ka ǹ bɛ́ lɔn.

¹⁹ Izirayeli tɔrɔn lɛn, ka barka da Dɛnaa Lawa nɛ. Aarɔn tɔrɔ wúlu-bɔlen, ka barka da Dɛnaa Lawa nɛ.

²⁰ *Levii tɔrɔn lɛn, ka barka da Dɛnaa Lawa nɛ. Kasɛn mɛnɛn bɛ́ nyɛ́ɛ biɛ Dɛnaa Lawa nɛ, ka barka da Dɛnaa Lawa nɛ.

²¹ Ka n toa *Siɔn, ka barka da Dɛnaa Lawa nɛ, asɛ mɛn bɛ́ giã-n Zeruzalɛmu. Aleluya, ka Dɛnaa Lawa tɔ bɔ!