Loen 119 - LAWA A BOO SONBORE

Dɛnaa Lawa a landa boon bɛ́ foo kɔɔ̃nbaa mɛn koe min la

¹ Min mɛnɛn tɔ wɔ ǹ gɔn bɛ́ pepere, ǹ nə́ tɔ we á n kɔnpii ka Dɛnaa Lawa a landa boon kɛn nɛ, Lawa á re barka diɛ bɛn ganaa.

² Min mɛnɛn bɛ́ Dɛnaa Lawa a gɔn waa ma-n sii, ǹ nə́ giɛ a din li ka ǹ foo tumaa nɛ, bɛn foo á re kɔɔ̃n koe.

³ Ǹ ba sii baraa zɛnɛɛ wa, maǹ koe Dɛnaa Lawa foo sii boon lɛ.

⁴ N din a minin doroo ǹ boon kɛn ń kɔ, man giɛ, mà ǹ bɛn tamaa sɔnbɔraanɛ.

⁵ Maa tɔ wɔ ǹ gɔn gɔ́ɔ̃ nɛ, n din ma foo taã, ma boo la ma n foo sii zɛnaa.

⁶ Bɛ lɛ n die toɛ, bɛ̀ ma á n yiri koɛ n dí-pɛn lɛn tumaa nɛ, sìi a re ma kuĩ wa.

⁷ Bɛ̀ ma á n darɛɛ n boon kɛn ganaa, n sii yɔrɔ bɔ ǹ boo peperen kɛn ganaa, ma á re barka diɛ n nɛ, ka ma foo tumaa nɛ.

⁸ N foo sii boon kɛn, masɛ á re koe bɛn lɛ. Nsɛ nyan ma daa duduu wa.

⁹ Bɛ̀ min tá tɔn ten, a n siɛ lɔn a sii-zɛnaa goã *yoreen ne? Dɛnaa, n din boo mɛn da, yǎa a n yiri koɛ bɛ li.

¹⁰ Man giɛ li, máa ma n lɛ si ka ma foo tumaa nɛ. N baran toa ma wusoo n dí-pɛn kɛn kio wa.

¹¹ Ma nə n lɛ kɔ ǹ boon kɛn tamaɛ ma foo ne, màn mɛn bɛ́ toɛ, ma baran sii la n la wa.

¹² Dɛnaa Lawa, maa barka tá n ganaa. Ma daraa n din foo sii boon kɛn ganaa.

¹³ N sii yɔrɔ bɔ ǹ boon kɛn, má ǹ tumaa pɛ ka ma lɛ nɛ.

¹⁴ Ma bɛ́ má n gɔn waa ma-n lɛ si, ma foo kɔɔ̃n kɔ á la yii ni, ka n pɛ ma gɔn màn tumaa n ma gɔn.

¹⁵ Man li man taasɛ ka n minin doroo ǹ boon kɛn nɛ, n bɛ́ zii mɛn nyɛɛ ma nɛ, man yii doa bɛ la.

¹⁶ N foo siin lɛn zɛnaa n kɔɔ̃n ma ganaa parsiini. Ma yiri a boe ka n boo kɛ-n wa.

¹⁷ N bɛ̀rɛgiĩ n ka ma nɛ, bǐɛ̃ kɔ ma ganaa. Ma yii toa koo, màn mɛn bɛ́ toɛ, ma n boo kɛ tamaa.

¹⁸ Ma yii bũ, a wɔlɔ yɛ sɔnbɔraanɛ. Sii dadaran mɛnɛn bɛ́ n landa boon kɛn nɛ, ma boo la ma bɛn yɛ.

¹⁹ Masɛ n tii lɛa kanaa kɛ gɔ́ɔ̃ nɛ, n baran n dí-pɛn kɛn duru ma ganaa wa.

²⁰ N sii yɔrɔ bɔ ǹ boon kɛn doɛ̃ n kɔɔ̃n ma ganaa. Biikoo tumaa li, ǹ sii n ma kuĩ tɛ lɛa.

²¹ Ń yoo din gole-kɔlen kɛn gialaa, ǹ bɛ́ ǹ nə́ kanaa ǹ nə́ n dí-pɛn toa walan, bɔ̀n tá re ǹ yii.

²² Ma bɛ́ má n gɔn waa ma-n lɛ si, n din sìi saa n bɔ ma la, ka yii wɔ ma la ǹ siin kɛn nɛ.

²³ Haalɛ ta kiin man kɔn yii, ǹ nə́ ma boo diɛ, n bɛ̀rɛgiĩ n ka masɛ nɛ. Masɛ nə n taasɛ ka n din foo sii boon kɛn nɛ.

²⁴ N gɔn waa ma-n boon lɛn dinin tá kɔɔ̃n ma ganaa á la yii ni. Ǹ dinin lɛn man ma doree.

²⁵ Ma á ke waa-n tán tii li palapala. A kɔnpɛ ka n da ǹ boo ne, n din wusoo n yiikoonaabaa kɔ ma la.

²⁶ Má maa sii tumaa yɔrɔ pɛ n din ni, ń ma lɛ si. N dɔ masɛ daraa n foo sii boon kɛn ganaa.

²⁷ N doree boon kɛn nyaa ma nɛ, ma ǹ giala ma. Ma á re n taasɛ ka n sii dadaran kɛn nɛ.

²⁸ Foo-ziziɛ̃ ma yii mu da bɔ ganaa. A kɔnpɛ ka n da ǹ boo ne, wusoo n pàã kɔ ma la.

²⁹ Ma kanbaa soɛ zii ganaa. N din bǐɛ̃ kɔ, n nə n landa boon kɛn dɔ̃ ǹ yiri kɔ ma la.

³⁰ Masɛ n má bɔlɔgoondɛnaabaa ǹ zii saa. Masɛ n maa wɔ toɛ n din a sii yɔrɔ bɔ lɛ ganaa.

³¹ Má n gɔn waa ma-n boon lɛn sii da ma din mìi ni. Dɛnaa Lawa, n nyan sìi da ma ganaa wa.

³² Man baa sii n dí-pɛn kɛn kio, a giala ń ma yiri bũ.

³³ Dɛnaa Lawa, n foo sii boon lɛn zii nyaa ma nɛ. Ma á re koe ǹ lɛ yǎa maa gɛ̀.

³⁴ Yiri kɔ ma la, ma boo la ma kɔ n landa boon kɛn lɛ, ma boo la ma ǹ tamaa ka ma foo tumaa nɛ.

³⁵ Ma da n dí-pɛn kɛn zii la. A giala, bɛ lɛ n kɔɔ̃n ma ganaa.

³⁶ Toa n gɔn waa ma-n boon kɛn sii goã ma ganaa. Ǹ sii ma kũ, á la ga màn li ni.

³⁷ Ma yii saa n bɔ sii kooron kɛn la. Tɔ wɔ ǹ gɔn mɛn bɛ́ kɔɔ̃nɛ n ganaa, toa ma bɛ saa.

³⁸ N nə n lɛ kɔ n nyɛ́ɛbaama-n wolen la ka màn mɛn nɛ, bɛ zɛnaa n bɛ̀rɛgiĩ ni.

³⁹ Ma bɛ́ nyɛ́ɛ biɛ sɔ mɛn nɛ, bɛ nyɛnaa n bɔ ma li. A giala, n din a sii yɔrɔ bɔn lɛn man siĩni.

⁴⁰ Sonbore, n minin doroo ǹ boon lɛn tá kɔɔ̃n ma ganaa. N din a peperebaa gɔ́ɔ̃ nɛ, yiikoonaabaa kɔ ma la.

⁴¹ Toa n kɔn-narɛɛ gole kɛ dɔ ma-a, Dɛnaa Lawa. Kirisibaa kɔ ma la, a kɔnpɛ ka n lɛ kɔ ǹ boon kɛn nɛ.

⁴² Bɛ kio, ta min nə sɔ koe ma ganaa, ma á boo yii ma da ǹ dɛnaa nɛ. A giala, ma foo n doa nɛ n din a boo kɛ ganaa.

⁴³ N dɔ ma lɛ, ma sonbore pɛ biikoo tumaa li, a giala, má waa n sii yɔrɔ bɔ ǹ boon kɛn la.

⁴⁴ Man die n landa boon kɛn tamaɛ, biikoo tumaa li, yǎa duduu.

⁴⁵ Man die tɔ we ma din foo yii li, a giala, n din a minin doroo ǹ boo kɛ n ma tá a kio.

⁴⁶ Ma á re n gɔn waa ma-n boon kɛn diɛ kiin yɔrɔ-a. Ma a re bɛa sìi koe wa.

⁴⁷ N dí-pɛn lɛn tá ma foo kɔɔ̃n koe parsiini, ǹ sii á kɔɔ̃n ma ganaa á la yii ni.

⁴⁸ Ma gɔn tá n dí-pɛn kɛn li, ma tá ǹ narɛ. Ma nə n taasɛ ka n foo sii boon kɛn nɛ.

⁴⁹ N boo mɛn da n bɛ̀rɛgiĩ ni, wusoo n nə n yiri gisĩ bɛ lɛ nɛ. Bɛa boo lɛ ma foo doa.

⁵⁰ N lɛ kɔ ǹ boo lɛ wusoo á ma yii kaa. Á ke, bɛ lɛ din nə foo-basiɛ̃ koe ma la maa nɔmaa gɔ́ɔ̃ nɛ.

⁵¹ Din gole-kɔlen kɛn nə́ ma da yaa lɛa taãn-taãnɛ, sɛnɛ, ma sã n landa kɛ a zii-a wa.

⁵² Dɛnaa Lawa, ma nə n yiri koe ka n lɛlɛ a sii yɔrɔ bɔn kɛn nɛ. Ǹsɛn lɛn man ma foo basɛ̃.

⁵³ Min babaraan mɛnɛn bɛ́ n landa boon kɛn tii, ma foo na á yoo bɛn li ka gàãn nə ma-a.

⁵⁴ Maa gùli kɔ ǹ bǎã kɛ nɛ kanaa, n foo sii boon lɛn man maa loe lɛa.

⁵⁵ Tèlò-n, ma nə n yiri koe ka n din tɔ kɛ-n, Dɛnaa Lawa. Ma nə n landa boon kɛn tamaɛ.

⁵⁶ Maa wɔ n ka kɛ nɛ, ma kɔ n doree boon kɛn lɛ.

⁵⁷ Dɛnaa Lawa, má pɛ máa maa wɔ n ka kɛ nɛ: ma n da ǹ boon kɛn tamaa.

⁵⁸ Man giɛ li ka ma foo tumaa nɛ, máa ma n foo kɔɔ̃n kɔ. Bǐɛ̃ kɔ ma ganaa, a kɔnpɛ ka n lɛ-kɔ kɛ nɛ.

⁵⁹ Má n taasɛ ka maa tɔ wɔ ǹ gɔn nɛ. Má wusoo má maa sii tele n gɔn waa ma-n boon kɛn li.

⁶⁰ Ma nə n nanaɛ ma tá n dí-pɛn kɛn tamaɛ. Ma ba n lɔloɛ ǹ li wa.

⁶¹ Min baraan kan ma kũ, sɛnɛ, n landa boon kɛn, ma yiri bɔ ǹ nɛ wa.

⁶² Man yui làan bɛ̀ ma barka da n nɛ, n sii yɔrɔ bɔ ǹ boo peperen kɛn lɛa.

⁶³ Min mɛn tumaa bɛ́ nyɛ́ɛ biɛ n nɛ, ǹ nə́ n minin doroo ǹ boon kɛn tamaɛ, masɛ n kun ka bɛn nɛ.

⁶⁴ Dɛnaa Lawa, n kɔn-narɛɛ gole kɛ kanaa pã, ma daraa n foo sii boon lɛn ganaa.

⁶⁵ Masɛ nə n bɛ̀rɛgiĩ lɛa. A kɔnpɛ ka n da ǹ boo ne, Dɛnaa Lawa, ń bǐɛ̃ zɛnaa masɛ nɛ.

⁶⁶ Yiri laanka sii-doɛ̃ kɔ ma la, a giala, ma foo n doa nɛ n dí-pɛn lɛn ganaa.

⁶⁷ Ma bɛ́ ma tɔn nɔmaa wa, man má goã siɛ̃ woe. Sɛnɛ kanna, man koe n da ǹ boon kɛn lɛ.

⁶⁸ N tá siĩni, n tá sii sonbore zɛnɛɛ. Ma daraa n foo sii boon kɛn ganaa.

⁶⁹ Din gole-kɔlen nə́ ma tɔ ziziɛ̃ ka soɛ boon ne. Sɛnɛ, masɛ n koe n doree boon kɛn lɛ, ka ma foo tumaa nɛ.

⁷⁰ Ǹ foo laa, ǹ ba li ǹ sii kɔn din giala ma wa. Sɛnɛ, n landa boon kɛn kɔmalɛ n kɔɔ̃n masɛ ganaa parsiini.

⁷¹ Maa nɔmaa kɛ din na á bǐɛ̃ baa ma ganaa. Á ke á toa má n foo siin dɔ̃.

⁷² N landa boon kɛn tá soɛ masɛ gɔn á la wɔrɔ laanka sana duu damata nɛ.

⁷³ N din gɔn na á ma zɛnaa, á ma koa lon. Yiri kɔ ma la, ma boo la man daraa n dí-pɛn kɛn ganaa.

⁷⁴ Min mɛnɛn bɛ́ nyɛ́ɛ biɛ n nɛ, bɛ̀ bɛn nə́ ma yɛ, ǹ foo yii n kɔɔ̃nɛ. A giala, ma nə n foo doɛ n da ǹ boo kɛ ganaa.

⁷⁵ Dɛnaa Lawa, ma á doɛ̃ máa n sii yɔrɔ bɔ ǹ boon lɛn tá pepere. N goã ń nɔmaa mɛn da ma mìi ni, ma á doɛ̃ máa sonbore tá n lon.

⁷⁶ N din a bɛ̀rɛgiĩ n ka masɛ nɛ. N kɔn-narɛɛ gole kɛ die a ma foo basã, ka n din bɛ́ ń nə́ n lɛ kɔ ma la lɔn.

⁷⁷ Toa n makara-doɛ̃ kɛ dɔ ma ganaa, ta ma á liɛ. A giala, n landa boon lɛn tá kɔɔ̃n ma ganaa parsiini.

⁷⁸ Din-koalin mɛnɛn nə soɛ kakaa ma la, toa sìi bɛn kũ. Masɛ, ma nə n taasɛ ka n doree boon kɛn nɛ.

⁷⁹ Min mɛnɛn bɛ́ nyɛ́ɛ biɛ n nɛ, bɛn nə da masɛ li. Ǹ tá re n gɔn waa ma-n boon kɛn doɛ̃.

⁸⁰ N dɔ ma lɛ, ma kɔ n foo sii boon kɛn lɛ, ka ma foo tumaa nɛ, màn mɛn bɛ́ toɛ, sìi baran ma kũ wa.

⁸¹ Man má n foo doa n din a da ǹ boo ganaa. Má n yii da n kirisibaa kɛ la, má nɔmaa.

⁸² N nə n lɛ kɔ ma la ka màn mɛn nɛ, má n yii da bɛ la, má nɔmaa. Bɛ lɛ-n ma á pii máa biĩ ni, n tá re ma foo basɛ̃?

⁸³ Man má goã laa-n ka mu bɔnaa bɛ́ lɔn, ǹ nə́ da tɛ li. Sɛnɛ, ma yiri bɔ ka n foo sii boon kɛn nɛ wa.

⁸⁴ N bɛ̀rɛgiĩ lɛ n die goɛ̃ kɛ gɔ́ɔ̃-n kɛnɛn yǎa biĩ? Biĩ ni, n tá re sii yɔrɔ boe maa zɔ́ɔn kɛn wɔ paǹ li?

⁸⁵ Din-koalin nə́ nyankɔrɔ fɔ̃ ma nyɛɛnɛ, bɛ din bɛ́ a kɔnpii ka n landa boon kɛn nɛ wa.

⁸⁶ N landa boon lɛn tumaa n taãn lɛa. Maǹ fuu nyɛɛ ma-n kooro, n dɔ ma lɛ.

⁸⁷ A na á goã boɛɛn nɛ, bɛ̀ maǹ die ma dii ǹ ma bɔ kanaa. Sɛnɛ, masɛ nə n doree boon kɛn tii wa.

⁸⁸ N kɔn-narɛɛ gole kɛ taman yii, toa ma la, ma boo la ma n da ǹ boon kɛn tamaa.

⁸⁹ Dɛnaa Lawa, n boo lɛ na a tan yǎa duduu. A n ka lon bɛ́ lɔn, a ba n bɔyɛɛ wa.

⁹⁰ N din nə bɔlɔgoondɛnaa lɛa biikoo tumaa li. N din nə ń tán giala koa, a dɔ́ golee.

⁹¹ Haalɛ tɔn pelo, màn tumaa na a tan, a kɔnpɛ ka n din a sii yɔrɔ bɔ nɛ. A giala, màn tumaa n dí nyɛɛ n din ni.

⁹² N landa boon kɛn nə́ ma foo kɔɔ̃n kɔ parsiini. Bɛ bie wa, nɔmaa mɛn ma yɛ, bɛ̀ á waa ma la.

⁹³ Ma yiri a die boe ka n doree boon kɛn nɛ duduu wa. A giala, n nə n yiikoonaabaa koe ma la ka bɛn lɛn nɛ.

⁹⁴ Masɛ nə n din wɔ lɛa, ma kirisibaa. Masɛ n giɛ n din a doree li, ma kɔ lɛ.

⁹⁵ Min baraan man nə́ goã kuu koe ma-a mà ǹ ma dɛ. Masɛ, man golee n too diɛ n gɔn waa ma-n boon kɛn li.

⁹⁶ Sii lɛ-piɛ̃ tumaa, má yɛ máa dan tá la, sɛnɛ, n dí-pɛn kɛn lɛ doa ǹ bǎã banban.

⁹⁷ N landa boon kɛn tá kɔɔ̃n ma ganaa parsiini. Lɛawaa tumaa li, ma nə n taasɛ ǹ nɛ.

⁹⁸ N dí-pɛn lɛn man toɛ, ma á sii doɛ̃ má la maa zɔ́ɔn manɛ. A giala, maǹ ma yiri-n miɛ̃ duduu.

⁹⁹ Min mɛnɛn nə ma daraa, má sii dɔ̃ má la bɛn manɛ. A giala, ma nə n taasɛ ka n gɔn waa ǹ boon kɛn nɛ duduu.

¹⁰⁰ Yiri tá ma lon á la min golen wɔ nɛ. A giala, man koe n din a doroo boon kɛn lɛ.

¹⁰¹ Má baraabaa ǹ zii tumaa toa walan, màn mɛn bɛ́ toɛ, ma kɔ n da ǹ boo lɛ.

¹⁰² Ma kanaa má n sii yɔrɔ bɔ ǹ boon kɛn toa walan wa. A giala, n din nə ń ma daraa ǹ ganaa.

¹⁰³ N lɛ kɔ ǹ boon lɛn tá kɔɔ̃n ma lɛ-n parsiini. Ǹ tá paparɛ ma lɛ-n ǹ nə́ la zoo ne.

¹⁰⁴ N doroo boon lɛn nə́ yiri kɔ ma la. Bɛ lɛ n ke, soɛ sii tumaa tìĩ bɔ ma nɛ.

¹⁰⁵ N da ǹ boo lɛ n bólon lɛa ma gòãn li, a n tɛ fúlu lɛa, maa zii la.

¹⁰⁶ Masɛ nə́ n lɛ kɔ, máa man die koe n sii yɔrɔ bɔ ǹ boo peperen kɛn lɛ. Ma màn mɛn pɛ, man die a lɛ piɛ̃.

¹⁰⁷ Ǹ nə́ fuu nyaa ma nɛ á la yii ni. Dɛnaa Lawa, wusoo n yiikoonaabaa kɔ ma la, ka n bɛ́ ń pɛ lɔn.

¹⁰⁸ Dɛnaa Lawa, maa barka da ǹ nyankɔ si, ma daraa, n sii yɔrɔ bɔ ǹ boon kɛn ganaa.

¹⁰⁹ Koe n ma lɛnpɛnɛ biikoo tumaa li, sɛnɛ, masɛ yiri a boe ka n landa boon kɛn nɛ wa.

¹¹⁰ Min baraan nə́ kan koa ma nɛ. Sɛnɛ, masɛ kanaa má n bɔ n doroo boon kɛn kio wa.

¹¹¹ N gɔn waa ma-n boon kɛn man maa naforo lɛa yǎa duduu. Ǹ dinin lɛn man ma foo kɔɔ̃n koe.

¹¹² A tá ma gɔ́ɔ̃ nɛ, ma kɔ n foo sii boon kɛn lɛ. Maa là n ka bɛ lɛ din ni yǎa duduu.

¹¹³ Min mɛnɛn gɔ́ɔ̃ bɛ́ paa, bɛn sii goon ba ma-a wa. Sɛnɛ, n landa boon kɛn man kɔɔ̃n ma ganaa.

¹¹⁴ N din nə masɛ a duru ǹ bǎã lɛa, n din nə ma tamaali lɛa. Ma foo n doa nɛ n da ǹ boo kɛ lɛ ganaa.

¹¹⁵ Min baraan lɛn, ka n yɔrɔ bɔyaa ka bɔ ma la, ma boo la ma maa Lawa a landa boon kɛn tamaa.

¹¹⁶ N dɔ ma lɛ, ka n bɛ́ ń nə n lɛ kɔ ma la lɔn, ta ma yii á goɛ̃ koo. N nyan toa maa yii da n la kɛ sìi baa wa.

¹¹⁷ N dɔ ma lɛ, n ma kirisibaa. Ma á re n foo sii zɛnɛɛ biikoo tumaa li.

¹¹⁸ Min mɛnɛn tumaa bɛ́ ǹ nə́ n foo sii boon kɛn toa walan, ń nə́ n piã ka bɛn nɛ. A giala, maǹ soɛ dinsɔɔ̃ boe, ǹ nə́ kɔn bebele ne.

¹¹⁹ Kanaa a min baraan kɛn, n din nə bɛn papaɛ̃ ka yisi bɛ́ lɔn. Bɛ lɛ na á toa n gɔn waa ǹ boon lɛn tá kɔɔ̃n ma ganaa.

¹²⁰ Man nyɛ́ɛ biɛ n nɛ, ma gɔ̀nɔn nə́ bìn diɛ. N sii yɔrɔ bɔ ǹ boon lɛn man nyɛ́ɛ diɛ ma ganaa.

¹²¹ Man má kɔ n sii yɔrɔ bɔ ǹ boon kɛn lɛ ka peperebaa nɛ. N nyan ma toa maa bɔ ma yii-n wolen kɛn gɔn wa.

¹²² N din nə n mìi koa n bɛ̀rɛgiĩ a yii-nyɛɛ yɛ sii li. N nyan toa din gole-kɔlen kɛn nə bɔ ma yii-n doo wa.

¹²³ Má n yii da n kirisibaa kɛ la, má nɔmaa. N din lɛ-kɔ mɛn wɔ ka peperebaa nɛ, man má goã n yii diɛ bɛ la.

¹²⁴ N bɛ̀rɛgiĩ lɛ kũ, a kɔnpɛ ka n din a kɔn-narɛɛ gole kɛ nɛ. Ma daraa n foo sii boon kɛn ganaa.

¹²⁵ N bɛ̀rɛgiĩ n ka masɛ nɛ. Yiri kɔ ma la, màn mɛn bɛ́ toɛ, ma n gɔn waa ǹ boon kɛn giala ma.

¹²⁶ Dɛnaa Lawa, biikoo dɔ, n din sii zɛnaa. Ǹ nə́ n landa lɛ ziziɛ̃.

¹²⁷ N dí-pɛn kɛn man kɔɔ̃n masɛ-a, ǹ nə́ la sana-n ma gɔn, haalɛ sana lɛ a sonbore din.

¹²⁸ Bɛ lɛ n ke ma á pii máa, n doree boon lɛn tumaa n pepere a yɔrɔ tumaa li. Soɛ sii kɔn ba kɔɔ̃n ma ganaa wa.

¹²⁹ N gɔn waa ma-n lɛ n sii gole lɛa. Bɛ lɛ n ke masɛ á koe lɛ.

¹³⁰ N boon lɛn doɛ̃ tá min yiri fúli. A tá yiri koe yiriwɛɛnaa la.

¹³¹ N boo kɛ boro n ma ganaa, ma nə n lɛ tii li banabana.

¹³² N bɔyaa, n nə n yɔrɔ da ma la, n bǐɛ̃ kɔ ma-a. Ma n zɛnɛɛ miɛ̃ n kɔɔ̃n kɔma-a wolen man haalɛ.

¹³³ Ma foo taã ka n lɛ kɔ ǹ boon kɛn nɛ, n nyan toa sii baraa kɔn boo ma la wa.

¹³⁴ Ma si minbuiinin fuu nyaa ma-n kɛ la, màn mɛn bɛ́ toɛ, ma kɔ n doree boon kɛn lɛ.

¹³⁵ N yɔrɔ bǐɛ̃ da n bɛ̀rɛgiĩ lɛ la. Ma daraa n foo sii boon ganaa.

¹³⁶ Yii mu bɔ ma yɔrɔ nɛ, a giala, ǹ ba n landa boon lɛn tamaɛ wa.

¹³⁷ Dɛnaa Lawa, n tá pepere, n sii yɔrɔ bɔ ǹ boon lɛn dɔn man ka te.

¹³⁸ N gɔn waa ma-n boon lɛn man pepere, maǹ boo taãn lɛa.

¹³⁹ Maa zɔ́ɔn lɛn yiri bɛ́ boe ka n boon kɛn nɛ, bɛ lɛ n ma kuĩ tɛ lɛa.

¹⁴⁰ N lɛ kɔ ǹ boon lɛn sii tumaa nə́ n zɛnaa. Masɛ nə n bɛ̀rɛgiĩ lɛa, ǹ sii á kɔɔ̃n ma ganaa parsiini.

¹⁴¹ A laanɛ ma a tɛ wa, ma a màn kɔn lɛa wa, ma yiri bɔ ka n doree boon kɛn nɛ wa.

¹⁴² N peperebaa lɛ n goɛ̃ yǎa duduu, n landa boon lɛn man taãn lɛa.

¹⁴³ Nɔmaa laanka foo-ziziɛ̃ ma kũ, sɛnɛ, n dí-pɛn kɛn man nə́ goã ma foo kɔɔ̃n koe.

¹⁴⁴ N gɔn waa ǹ boon lɛn man pepere biikoo tumaa li. N dɔ ma lɛ ma ǹ giala ma, ń giɛ ma yii á goɛ̃ koo.

¹⁴⁵ Dɛnaa Lawa, man lɛ diɛ n la ka ma foo tumaa nɛ. N nyəə ma la, ma á re koe n foo sii boon kɛn lɛ.

¹⁴⁶ Man lɛ diɛ n la, ma kirisibaa, ma á re n gɔn waa ǹ boon kɛn tamaɛ.

¹⁴⁷ Masɛ n yui bɛ̀ wasa tɔn bɔ wa, bɛ̀ man lɛ dɛ n din-a. Ma foo n doa nɛ n din a da ǹ boo kɛ-a.

¹⁴⁸ Man yui bɛ̀ lɛ̀ tɔn waa wa, bɛ̀ man taasɛ ka n da ǹ boo kɛ nɛ.

¹⁴⁹ Dɛnaa Lawa, n din a kɔn-narɛɛ gole lɛ taman yii, n too kɔ ma lon. Toa ma tɔ wɔ, a kɔnpɛ ka n din a sii yɔrɔ bɔ nɛ.

¹⁵⁰ Min mɛnɛn lɛn bɛ́ baa sii sii baraa kio, ǹ nə́ ke die. Ǹ nə́ n dinin wɔlɔ lui n landa boon kɛn ganaa.

¹⁵¹ Nsɛ Dɛnaa Lawa, n wɔlɔ á kunu, n dí-pɛn lɛn tumaa n taãn lɛa.

¹⁵² N gɔn waa ǹ boon kɛn, ma á doɛ̃ haalɛ bibi, máa n nə ń bɛn koa yǎa duduu.

¹⁵³ Ga maa nɔmaa kɛ ganaa, n ma bɔ a nɛ. A giala, ma yiri bɔ ka n landa boon kɛn nɛ wa.

¹⁵⁴ Bɔ ma lɛ-a, n pɛ n da ma lon. Toa ma yii goã koo, ka n bɛ́ ń nə́ n lɛ kɔ lɔn.

¹⁵⁵ Kirisibaa wɔlɔ á lui-n min baraan kɛn ganaa. A giala, ǹ ba giɛ n foo sii li, ǹ nə́ koe lɛ wa.

¹⁵⁶ Dɛnaa Lawa, n makara-doɛ̃ á gole. Toa ma tɔ wɔ a kɔnpɛ ka n din a sii yɔrɔ bɔn kɛn nɛ.

¹⁵⁷ Maa fuu nyaama-n wolen laanka maa zɔ́ɔn nə́ mɔnaa. Sɛnɛ, ma talaa má n bɔ n gɔn waa ǹ boon kɛn la wa.

¹⁵⁸ Má minin yɛ, ǹ nə́ n piã n nɛ, ǹ ba koe n da ǹ boon kɛn lɛ wa. Bɛn sii din ba ma-a wa.

¹⁵⁹ Dɛnaa Lawa, ma bɛ́ n doree boon kɛn narɛ lɔn, n din ga bɛ ganaa. N din a kɔn-narɛɛ gole lɛ taman yii, toa ma yii goã koo.

¹⁶⁰ N boo lɛ mìi n doa-n sonbore ganaa. N sii yɔrɔ bɔn lɛn tumaa n pepere. Maǹ nə́ ǹ tan dɔn yǎa duduu.

¹⁶¹ KIIN man fuu nyɛɛ ma nɛ, mìi ba la wa. Man nyɛ́ɛ biɛ n boon kɛn dininsɔɔ̃nɔn manɛ.

¹⁶² Ma nə n nyɛnyɛɛ n lɛ kɔ ǹ boon lɛn ganaa, ka min na á naforo gole yɛ.

¹⁶³ Soɛ ke, ma ba bɛ li wa, a kɔɔ̃n ma ganaa wa. N din a landa boon kɛn man kɔɔ̃n ma ganaa.

¹⁶⁴ Gunyin sɔbaa pinin goon, man loe loe ma á n tɔ boe ne, n sii yɔrɔ bɔ sonboren kɛn lɛa.

¹⁶⁵ Min mɛnɛn bɛ́ n landa boon kɛn narɛ, bɛn là nyantoro n gole. Sii kɔn ba bìn diɛ ǹ ganaa wa.

¹⁶⁶ Dɛnaa Lawa, man má goã n yii diɛ, máa n din ma kirisibaa. Bɛ lɛ n ke ma á koe n dí-pɛn kɛn lɛ.

¹⁶⁷ Má n gɔn waa ma-n boon lɛn si, ǹ tá kɔɔ̃n ma-a parsiini.

¹⁶⁸ Má n doree laanka n gɔn waa ǹ boon lɛn tamaa, n din yii tá maa zɛnaa ǹ sii tumaa ganaa.

¹⁶⁹ Dɛnaa Lawa, toa maa lɛ-dɛ dɔ n li. A kɔnpɛ ka n da ǹ boo ne, n din sii-doɛ̃ kɔ ma la.

¹⁷⁰ Toa maa gòã-kũ dɔ n li. A kɔnpɛ ka n lɛ-kɔ nɛ, ma bɔ n ma bɔ sii ni.

¹⁷¹ Toa ma loe lɔ ma n tɔ bɔ nɛ, a giala, ń ma daraa n foo sii boon ganaa.

¹⁷² Toa ma n lɛ-kɔ ǹ boon lɛn lɔ loe lɛa, a giala n dí-pɛn lɛn tumaa n pepere.

¹⁷³ N gɔn dia n nə n dɔ ma lɛ, a giala, má lɛ kɔ n doroo boon lɛn ganaa.

¹⁷⁴ Dɛnaa Lawa, man giɛ li, máa n din ma kirisibaa. N landa boon kɛn tá ma foo kɔɔ̃n koe parsiini.

¹⁷⁵ Toa ma yii goã koo, ma loe lɔ ma n tɔ bɔ nɛ, n din a sii yɔrɔ bɔ ǹ boon kɛn nə n dɔ ma lɛ.

¹⁷⁶ Ma nə n binbirin boe ka sère papaã wole bɛ́ lɔn. Masɛ nə n bɛ̀rɛgiĩ lɛa, ma basa bɔ, n ga ma li, a giala, ma yiri a boe ka n dí-pɛn kɛn nɛ wa.