Loen 115 - LAWA A BOO SONBORE

Lawa goon toto boo

¹ A ba wɔsɛn wɔ lɛa wa, Dɛnaa Lawa, gugurubaa ba wɔsɛn wɔ lɛa wa. Sɛnɛ, n kɔn-narɛɛ gole kɛa lɛa, n bǐɛ̃ duduu kɛ dɔ a lɛa, gugurubaa da n din tɔ la.

² Wàa na á baa tɔrɔ kɔsɔn tá pii, mà wɔa Lawa lɛ á maa?

³ Wɔsɛn Lawa lɛ n lon. A bɛ́ sii mɛn li, a n bɛ zɛnɛɛ.

⁴ Ǹ dìn kɛn, wɔrɔ lɛa ka sana nɛ, minbuiin nɛ gɔn na á ǹ zɛnaa.

⁵ Lɛ tá ǹ lon, sɛnɛ, ǹ ba boo diɛ doɛ̃ wa. Yiin tá ǹ lon, sɛnɛ, ǹ ba màn kɔn yii wa.

⁶ Toon tá ǹ lon, sɛnɛ, ǹ ba boo miɛ wa. Nyin tá ǹ lon, sɛnɛ, a ba gìĩ miɛ̃ wa.

⁷ Gɔnɔn tá ǹ lon, sɛnɛ, ǹ ba boe la ǹ màn kũ wa. Gòãn tá ǹ lon, sɛnɛ, ǹ ba tɔ we wa. Boo lɛn kɔn ba boe ǹ bɔlɔ yala-n wa.

⁸ Toa ǹ zɛnaalin lɛn nə n baa ka ǹ bɛ́ lɔn. Min mɛn tumaa bɛ́ n foo doɛ ǹ ganaa, toa ǹ nə́ n baa ka dìn lɛn dinin bɛ́ lɔn.

⁹ Izirayeli tɔrɔn lɛn, ka n foo doa Dɛnaa Lawa ganaa. A din nə n doe ka lɛ, á n ka tamaɛ.

¹⁰ Lawa a wúlu-bɔlen lɛn, ka n foo doa Dɛnaa Lawa ganaa. A din nə n doe ka lɛ, á n ka tamaɛ.

¹¹ Kasɛn mɛnɛn dɔn bɛ́ nyɛ́ɛ biɛ Dɛnaa Lawa nɛ, ka n foo doa Dɛnaa Lawa ganaa. A din nə n doe ka lɛ, á n ka tamaɛ.

¹² Dɛnaa Lawa tá n yiri koɛ wɔ li, á re barka diɛ wɔ ganaa. Á re barka diɛ Izirayeli tɔrɔn ganaa, á re barka diɛ Lawa a wúlu-bɔlen, Aarɔn tɔrɔn kɛn ganaa,

¹³ á re barka diɛ a nyɛ́ɛbaama-n wolen ganaa, a bɔnboɛɛnɛn nɛ, ka a dadaran nɛ.

¹⁴ Dɛnaa Lawa die a kaa sumu giala bɔ li, ka dinin wɔ laanka kaa nɛnyaanan wɔ nɛ.

¹⁵ Dɛnaa Lawa die a barka da ka ganaa, asɛ mɛn bɛ́ á lon laanka tán zɛnaa.

¹⁶ Lon nə Dɛnaa Lawa wɔ lɛa. Sɛnɛ, tán ke, a na á bɛ kɔ minbuiin nɛn la.

¹⁷ Geren bie Dɛnaa Lawa tɔ boe wa, min mɛn tumaa wo geren piɛ, bɛn bie a tɔ boe wa.

¹⁸ Sɛnɛ, wɔsɛn tá barka diɛ Dɛnaa Lawa nɛ, a saa kanna ganaa yǎa duduu. Aleluya, ka Dɛnaa Lawa tɔ bɔ!