Loen 111 - LAWA A BOO SONBORE

Barka n Lawa ganaa a dí sonboren lɛa

¹ Aleluya, ka Dɛnaa Lawa tɔ bɔ. Ka ma foo din tumaa nɛ, man die barka diɛ Dɛnaa Lawa nɛ, zaman gole kɛ bii, kun ka gɔ́ɔ̃ fudɛnan kɛn nɛ.

² Dɛnaa Lawa a nya ǹ dín lɛn man dadara. Min mɛnɛn tumaa bɛ́ ǹ narɛ, bɛn manə n taasɛ ǹ ganaa.

³ Á dí woo dí nyɛɛ, a tumaa n siĩn sɔnbɔraanɛ. A din a peperebaa kɛ n goɛ̃ yǎa duduu.

⁴ A n giɛ li, mà ǹ nə n yiri koa ka asɛ a nya ǹ dí dadaran kɛn nɛ. Dɛnaa Lawa lɛ á bǐɛ̃ zɛnɛɛ, á makara doɛ̃.

⁵ A din na a nyɛ́ɛbaa ma yii-n wolen toe. A yiri a boe ka a lɛ kɔ kɔn la kɛ-n duduu wa.

⁶ Dɛnaa Lawa ná a boo sii la ǹ pàã kɛ nyaa a din a minin kɛn manɛ. Á tɔrɔ kɔsɔn gána si, á kɔ ǹ la.

⁷ A nya ǹ dín lɛn man taãnɛ, ǹ nə́ pepere. A dí-pɛn kɛn kɔn ba n bɔyɛɛ wa.

⁸ Ǹ ba n bɔyɛɛ duduu wa, a giala, maǹ taãnɛ, ǹ nə́ pepere.

⁹ Dɛnaa Lawa din na á ná a minin si sii la, á lɛ kɔ kɔn la wɔ ǹ nɛ yǎa duduu. Dɛnaa Lawa tɔ lɛ n siĩni, a n gole.

¹⁰ Sii-doɛ̃ nə n giala koe ka nyɛ́ɛ baa Dɛnaa Lawa yii-n ni. Min mɛnɛn tumaa bɛ́ zɛnɛɛ miɛ̃, bɛn man sii-dɔ̃li taãnan lɛa. Gugurubaa n Dɛnaa Lawa wɔ lɛa yǎa duduu.