Loen 108 - LAWA A BOO SONBORE

Ga Lawa a tamaa li ǹ loe

¹ LOE. Davida a loe goon ne.

² Ma foo á doa nɛ, Lawa, ma foo á doa nɛ, man die loe loe, man tɔ bɔ nɛ. Haya ma foo, yoo.

³ Ka dɔn nə yoo tùtun lɛn, masɛ n die yui wasa nyɛɛnɛ.

⁴ Man die barka diɛ n nɛ tɔrɔn bii, Dɛnaa Lawa, man die loe loe, man tɔ bɔ tɔrɔ kɔsɔn bii.

⁵ A giala, n kɔn-narɛɛ gole kɛ n yui yǎa lon mìi la, n bǐɛ̃ duduu kɛ dɔ n doe labaran ganaa.

⁶ Lawa, n golebaa kɛ nyaa, n golebaa mɛn bɛ́ á la lon ne. Toa n gugurubaa kɛ yɛ. Toa a yɛ kanaa paǹ tumaa ganaa.

⁷ Wɔ kirisibaa ka n din pàã gole kɛ nɛ, n maa nyankɔ si, ń giɛ, n bɛ́ wɔsɛn mɛnɛn narɛ, wɔ á kirisibaa yii.

⁸ Lawa boo da á bɔ a kion sonbore kɛ nɛ, gɔ̀lɔ̀baa n ma din wɔ lɛa. Ma á re Sisɛmu kiwi kɛ talɛ kɔn minin bii, ma á re Sukɔti bǎã kɛ gii.

⁹ Galaati n ma din wɔ lɛa, Manaasee dɔ n ma din wɔ lɛa. Ma mìi ganaa ǹ bafolo n ka Efrayimu ni, maa kii bàlà n ka Zudaa nɛ.

¹⁰ Haalɛ kaa zɔ́ɔn gánan kɛn, maǹ ma din wɔn lɛa. Moabu n maa zoo ǹ mu kaa ǹ màn lɛa. Ma din gòã n Edɔmu la. Man ziabaa ǹ lɛ wuu boe Filisiti gána gialaa.

¹¹ Die n die woe ma-n yǎa Edɔmu gána nɛ? Die n die a kiwi kaka kɛ kuĩ, a kɔ ma la,

¹² bɛ̀ n din Lawa bie wa? Sɛnɛ, ń wɔ daa, n ba wɔa zia-baalin diɛ zii doo wa.

¹³ Da n dɔ wɔ lɛ, n yoo wɔa zɔ́ɔn gialaa, a giala, minbuiinin dɔmalɛ lɛ ba a taãn lɛa wa.

¹⁴ Kun ka Lawa nɛ, wɔ á re gɔ̀lɔ̀ biɛ. A giala, asɛ n boe wɔa zɔ́ɔn la, a ǹ tɔ tán.