Loen 106 - LAWA A BOO SONBORE

Dɛnaa Lawa a bǐɛ̃baa gole a zaman kɔkɔrɔ kɛ wɔ paǹ li

¹ Aleluya, ka Dɛnaa Lawa tɔ bɔ! Ka Dɛnaa Lawa guguru kɔ, a giala a sii á kɔɔ̃nɛ, a kɔn-narɛɛ gole kɛ n goɛ̃ yǎa duduu.

² Die n boe la, a Dɛnaa Lawa a nya ǹ dí dadaraan kɛn pɛ, a ǹ nya? Die n boe la, a na a tɔ bɔ a zii li?

³ Min mɛnɛn bɛ́ dí-pɛn tamaɛ, ǹ nə́ sii pepere zɛnɛɛ biikoo tumaa li, Lawa á re barka diɛ bɛn ganaa.

⁴ Bɛ̀ ń daa n yɔrɔ bǐɛ̃ da n zaman la kaa, Dɛnaa Lawa, n yiri koa ma nɛ. Bɛ̀ n tá re sii bɛ̀rɛbaa kɛ la, toa n ga masɛ dɔ a sii walan.

⁵ N toa man din a yii gɔgoɛ̃ wolen yii-nyɛɛ kɛ yɛ, man nyɛnyɛɛ kun ka n zaman kɛ nɛ, ma maa wɔ gii yɛ n din a minin nyaǹ bɔ kɛ nɛ.

⁶ Wɔ dɔn nə́ sii baraa zɛnaa, ka wɔ digolon bɛ́ lɔn, wɔ́ kanaa wɔ́ zii toa, zɛ̀rɛ wɔ kũ.

⁷ Wɔ digolon nə goã, ǹ nə́ màn kɔn giala ma, n kaãbaa ǹ siin kɛn zɛnaa gɔ́ɔ̃ nɛ Ezipti wa. Ǹ yiri bɔ ka bǐɛ̃ gigiã kɛ nɛ, ń zɛnaa ǹ nɛ. Ǹ bɛ́ ǹ nə́ dɔ Sawɛɛ tà kɛ lɛ-a, ǹ nə́ n gɔ́ɔ̃ tii Lon a Lawa gole kɛ ganaa.

⁸ Sɛnɛ, á ǹ kirisibaa a din tɔ kɛa lɛa, a ná a din a Pàãyiidɛnaabaa nyaa.

⁹ Á paraa Sawɛɛ tà lɛ li, á laa. Á toa ǹ nə́ tɔ wɔ nyankɔrɔ zuzulun ni, ka n pɛ mà don gɔ́ɔ̃ nɛ.

¹⁰ Lawa wɔ digolon lɛn kanbaa ǹ zɔ́ɔ babaraan ganaa, á ǹ tamaa ǹ zɔ́ɔn ganaa.

¹¹ Ezipti minin mɛnɛn nə goã ǹ gialaa, mu bɛn kũ, ǹ goon din goã wa.

¹² Bɛ́ toa Izirayeli minin lɛn nə́ golee Lawa a boon kɛn li. Ǹ nə́ goã loe loe a tɔ boe.

¹³ Bɛ kio doo boɛɛn nɛ, ǹ yiri bɔ ka Lawa a dín lɛn nɛ. Ǹ nə n yii da la, a na a sii yɔrɔ boe kɛ zɛnaa wa.

¹⁴ Don lɛ gɔ́ɔ̃ nɛ, màn mɛn bɛ́ á goã ǹ nyaabiɛ, ǹ yii bɔ bɛ li babaraanɛ. Ǹ nə́ n da Lawa gɔ́ɔ̃ li, bɛa bǎã kɛ lɛ nɛ.

¹⁵ Ǹ goã màn mɛn li, Lawa bɛ lɛ kɔ ǹ la, á kɔ ǹ la dinin, á kiɛ̃ ǹ nyankɔ lɛ la.

¹⁶ Ǹ giã ǹ bǎã lɛ nɛ, ǹ nə́ n zɔɔ̃ kɔn ka Muizu ni, ka Aarɔn dɔ nɛ, Dɛnaa Lawa din a min boe kɛ lɛ.

¹⁷ Bɛ lɛ nɛ, tán nə́ n lɛ bũ á Daatan mui, á n kuməə Abiramu laanka a lɛ kaa kun wolen kɛn ganaa.

¹⁸ Tɛ kɔn dɔ gisĩ ǹ minin lɛn la, á ǹ kũ, tɛ lɛ bɛa min baraan kɛn lɛn ziziɛ̃.

¹⁹ Izirayeli minin lɛn bɛ́ Orɛbu kele lɛ li, ǹ nə́ diin nɛ nyín zɛnaa. Ǹ nə́ kaa tán, ǹ nə́ fɔlɔ màn kooro guguru kɔ.

²⁰ Ǹ nə́ ǹ Lawa Guguru kɛ toa walan, ǹ nə́ dii nyín da a bǎã nɛ, bɛa tɔɔ buu-sɔ̃li kooro kɛ lɛ.

²¹ Ǹ yiri bɔ ka ǹ kirisibaali Lawa kɛ nɛ, Lawa mɛn goã á sii dadaran zɛnaa Ezipti,

²² kaãbaa ǹ siin manɛ, á goã á ǹ zɛnaa walan, Kaamu tɔrɔn kɛn bii. Nyɛ́ɛ da ǹ wɔn manɛ, á ǹ zɛnaa Sawɛɛ tà lɛ-a.

²³ Bɛ lɛ nɛ, Lawa pɛ mà a n die ǹ dii, a ǹ nya. Sɛnɛ, Lawa din a min boe Muizu yoo, á woo Lawa yɔrɔ-a, á ná a nyankɔ á kurəə, mà a baran ǹ dɛ, a foo-yoo lɛ gɔ́ɔ̃ nɛ, a ǹ nya wa.

²⁴ Bɛ lɛ tumaa kio doo, ǹ nə́ n piã ka gána sonbore kɛ nɛ, Lawa kɔ ǹ la, ǹ golee a boo li wa.

²⁵ Ǹ nə́ zuuzuũ si ǹ mɔnaa kionən ne, ǹ nə n too kɔ Dɛnaa Lawa lon wa.

²⁶ Bɛ lɛ taman yii, Lawa nə́ n gɔn saa lon, á n liɛ, mà asɛ n die ǹ dii don gɔ́ɔ̃ nɛ, ǹ gã.

²⁷ Á n liɛ dɔn, mà asɛ n die ǹ nɛnyaanan sasawɛɛ bǎã tumaa-n, gánan gɔ́ɔ̃ nɛ, a toa ǹ gã tɔrɔ kɔsɔn bii.

²⁸ Ǹ bɛ́ ǹ nə́ dɔ Pewɔrɔ gána dɔ nɛ, ǹ nə́ woo ǹ dinin kɔ bɛ dɔ a dì kɛ la, a tɔ n *Baali. Ǹ nə́ geren zɔ́n wúlu mànan sɔ̃ walan.

²⁹ A zɛnaa miɛ̃ kɛ Dɛnaa Lawa foo busu parsiini. Bɔ̀n gole daa mɛnaa ǹ la.

³⁰ Sɛnɛ, Pinaasi yoo, á sii lɛ yɔrɔ bɔ doɛ̃, bɔ̀n lɛ golee.

³¹ Dɛnaa Lawa lɛ kɔ Pinaasi ganaa min pepere lɛa, á pɛ mà a n die goɛ̃ miɛ̃ biikoo tumaa li, yǎa duduu.

³² Izirayeli minin lɛn nə́ Lawa foo busu, bɛ̀ ǹ bɛ́ Meribaa mu gienli. Ǹ dinin zɛnaa ǹ sii na á bɔ̀n da Muizu ganaa.

³³ Ǹ ná a yiri lɔlɔkɔn á la yii ni, haalɛ a boo la á n taasɛ, á tɔn boo da wa.

³⁴ Dɛnaa Lawa na á pɛ dɔn, mà ǹ Kanaan gána minin dɛ ǹ gã, ǹ bɛ dɔ zɛnaa wa.

³⁵ Ǹ nə́ woo ǹ sii kaa kun ka tɔrɔ kɔsɔn nɛ, ǹ nə́ n daraa ǹ landa siin ganaa.

³⁶ Ǹ nə́ ǹ dìn guguru kɔ. Bɛa dìn kɛn lɛn nə́ kan baa Lawa a zaman lɛ gòã li.

³⁷ Ǹ nə́ ǹ nɛgiĩn laanka ǹ nɛlɔn kɔ nɔ̀ɔnɔn la, wúlu mànan lɛa.

³⁸ Ǹ nə́ zɛ̀rɛbaa᷉naan mà kaa, ǹ nɛgiĩn laanka ǹ nɛlɔn kɛn lɛn mà kɛ lɛ. Ǹ dinin man nə́ bɛa nɛnyaanan lɛn dɛ wúlu mànan lɛa, Kanaan gána a dìn ganaa. Ǹ nə́ gána lɛ tii ka bɛa mà damata kɛ nɛ.

³⁹ Ǹ sii zɛnaa miɛ̃ kɛ *gɔ̀ da ǹ ganaa. Ǹ nə́ lɛ-tiilin baa ka lɔ kɔrɔn bɛ́ lɔn.

⁴⁰ Bɛ lɛ nɛ, Dɛnaa Lawa foo busu a zaman lɛ li parsiini. A din wɔn lɛn tìĩ bɔ nɛ.

⁴¹ Á ǹ wɔ tɔrɔ kɔsɔn gɔn, ǹ zɔ́ɔn nə́ boo ǹ la.

⁴² Ǹ zɔ́ɔn lɛn nə́ fuu nyaa ǹ nɛ, ǹ nə́ ǹ kaa ǹ pàã giulun.

⁴³ Gunyin gigiã, Dɛnaa Lawa nə́ ǹ si bɛa siin kɛn la. Sɛnɛ, wɔ digolon lɛn dinin nə́ n too kaka kɔ, ǹ Lawa lɛ tii lɛ gɔ́ɔ̃ nɛ, ǹ nə́ woo nyɛɛnɛ ka ǹ sã nɛ.

⁴⁴ Ka bɛ yii ni, Dɛnaa Lawa ga ǹ nɔmaa ganaa, á ǹ lɛ dɛ ma.

⁴⁵ Á n yiri koa a din a lɛ kɔ kɔn la kɛ lɛ nɛ, á doa kɔn-a ǹ nɛ. A kɔn-narɛɛ gole gole kɛ taman yii, á wusoo a busii lɛ kio.

⁴⁶ Min mɛnɛn nə goã pàã nyɛɛ ǹ nɛ, ka kòso-nɛn manɛ, á toa bɛn nə́ wusoo ǹ nə́ ǹ makara dɔ̃.

⁴⁷ Wɔ si sii la, Dɛnaa Lawa wɔa Lawa, wɔ sɔkɔn wɔa gána nɛ, n wɔ bɔ tɔrɔ kɔsɔn bii. Bɛa biikoo li, wɔ á re barka diɛ n nɛ, wɔ n tɔ sonbore kɛ kalaa, wɔ wɔ dinin koa n gugurukɔ gɔ́ɔ̃ nɛ.

⁴⁸ Barka Dɛnaa Lawa, Izirayeli a Lawa. Barka nə n wɔ lɛa duduu yǎa duduu. Zaman tumaa pɛ: Hiĩ, a n miɛ̃! Aleluya, ka Dɛnaa Lawa tɔ bɔ!