Loen 103 - LAWA A BOO SONBORE

Dɛnaa Lawa a kɔn-narɛɛ loe

1 Davida a loe n ke.

¹ Davida a loe n ke. Man kɔnboe ma barka da Dɛnaa Lawa nɛ, ka ma foo tumaa nɛ. Maa barka tá a ganaa taãn-taãnɛ!

² Man barka diɛ Dɛnaa Lawa nɛ, ka ma foo tumaa nɛ, ma yiri ná a boe a bǐɛ̃-zɛnaa kɛ goon ganaa wa.

³ A din nə maa sã ǹ siin tumaa toɛ ma nɛ, a din nə maa busun tumaa nyɛɛ.

⁴ A n ma sii gɛ̀ la. A n kɔn-narɛɛ gole laanka makara-doɛ̃ nyɛɛ ma nɛ.

⁵ A din nə ma toe ka màn sonboren ne, á n ma biɛ min ten lɛa, pàã n ma lon, ka giogialatã bɛ́ lɔn.

⁶ Dɛnaa Lawa n peperebaa ǹ siin zɛnɛɛ, ǹ bɛ́ boe min mɛnɛn tumaa yii ni, a din nə bɛn kiri we, a sonbore kɔ ǹ la.

⁷ A ná a dí nya ǹ gɔnɔn nyaa Muizu ni, á sii dadara zɛnaan nyaa Izirayeli a zaman nɛ.

⁸ Dɛnaa Lawa tá min makara doɛ̃, a nə n yiri koɛ wɔ li, a foo a yui fufuu wa, kɔn-narɛɛ ná a foo pã.

⁹ Dɛnaa Lawa a min zɛ̀rɛ biɛ biikoo tumaa li wa. A sii koɛ a gɔ́ɔ̃ nɛ a ná a ba nyɛɛ wa.

¹⁰ A ba wɔ kuĩ wɔa sii baraan li wa, a ba gɛ̀ dòo boe wɔ ganaa, a kɔnpɛ ka wɔa sãn nɛ wa.

¹¹ Min mɛnɛn bɛ́ nyɛ́ɛ biɛ nɛ, a kɔn-narɛɛ gole mɛn nyaa bɛn nɛ, lɛ-doa ba la wa, a n ka lon laanka tán bii bɛ́ lɔn.

¹² Lɛ̀giala laanka lɛ̀nyɛɛn wɔlɔ bɛ́ lui-n kɔn ganaa lɔn, a n wɔa sã ǹ siin lɛn wɔlɔ lui wɔ ganaa miɛ̃.

¹³ Min bɛ́ a nɛnyaanan makara doɛ̃ lɔn, Dɛnaa Lawa dɔ na a nyɛ́ɛbaaman wolen makara doɛ̃ miɛ̃.

¹⁴ A din tá wɔ zɛnaa ǹ màn doɛ̃, á doɛ̃ mà wɔ n tán tii lɛa.

¹⁵ Minbuiin nɛ a tá kanaa n ka buu bɛ́ lɔn, a n gole koe siĩn sɔnbɔraan ka da buũ bɛ́ lɔn.

¹⁶ Sɛnɛ, bɛ̀ piɛ̃ bɔ, a n papaɛ̃, a bǎã n goɛ̃ ka a bin tɔn buu pã wa.

^17-18 Min mɛnɛn bɛ́ nyɛ́ɛ biɛ Dɛnaa Lawa nɛ, a kɔn-narɛɛ a nyɛɛ bɛn wɔ paǹ li wa. A n bɛn narɛ miɛ̃ biikoo tumaa li. Min mɛnɛn bɛ́ a lɛ kɔ kɔn la kɛ tamaɛ, ǹ ná a dí-pɛn tamaɛ, á die a bǐɛ̃baa kɛ nyɛɛ bɛn nɛnyaanan nɛnyaanan wɔ paǹ li.

¹⁹ Dɛnaa Lawa ná a kii dankan koa lon, a n kii lɛa màn tumaa mìi la.

²⁰ Kasɛn lon a dia dí-a wolen lɛn, ka barka da Dɛnaa Lawa nɛ. Lon màn pàãdɛnan mɛnɛn bɛ́ a dí-pɛ tamaɛ, bɛ̀ á boo da lɔn, ka a bɔlɔ si, ka barka da nɛ.

²¹ Dɛnaa Lawa a zaman mɛn tumaa bɛ́ lon, kasɛn mɛnɛn bɛ́ walan a foo sii zɛnɛɛ, ka barka da nɛ.

²² Dɛnaa Lawa kasɛn mɛnɛn tumaa zɛnaa, a bɛ́ bǎã mɛn tumaa mìi la, ka barka da Dɛnaa Lawa nɛ. Man kɔnboe ma barka da Dɛnaa Lawa nɛ, ka ma foo tumaa nɛ.