Loen 102 - LAWA A BOO SONBORE

Dɛnaa Lawa bɛ́ foo-doa mɛn koe nɔmaa-wɔle la

¹ Min mɛn bɛ́ á nɔmaa, a pàã nya, bɛa nyankɔ n ke, a na a busii pii Dɛnaa Lawa nɛ.

² Dɛnaa Lawa, n too kɔ maa nyankɔ li. Toa maa lɛ-dɛ dɔ yǎa n din li.

³ N baran n dɔ̀ɔ̃ wɔ ma nɛ, maa nɔmaa biikoo kɛ gɔ́ɔ̃-n wa. N too kɔ ma lon. Bɛ̀ ma tá n bíi ǹ mɛn pinaa, n ma lɛ si fufuu.

⁴ Sonbore, maa yiikoonaabaa n ka tɛmaa bɛ́ lɔn, yui woe. Ma wen man ka tɛ nàn bɛ́ lɔn, kuĩ nyɛɛ.

⁵ Ma foo dɔ n ka buu kurii wole bɛ́ lɔn, bɛbɛnɛ. Ma yiri din nə boe ka maa màn-bii-n dinin.

⁶ Ginii babaraa gɔn, haalɛ ma ki nə naɛ ma wen ganaa.

⁷ Man ma dinsɔɔ̃, ka bàan mɛn bɛ́ á papaã, ǹ miã n-a don gɔ́ɔ̃ nɛ. Man ka kɛbɔlɔ la ǹ kɔlɔkuun bɛ́ lɔn.

⁸ Ma ba nyuù we wa, man ka bàan bɛ́ lɔn, a dinsɔɔ̃ zolon ne kala-n.

⁹ Baraabaraa, maa zɔ́ɔn man sɔ kiɛ ma la. Ǹ foo yoomaa nɛ ma li, maǹ baraa bíi minin li, ka ma tɔ nɛ, mà nɔmaa nə ǹ yɛ ka masɛ bɛ́ lɔn.

¹⁰ Man maa màn bii ka gɔ́ɔ̃ binyəə ne, man maa mu mii ka yii mu ni.

¹¹ Dɛnaa Lawa, n din foo bɛ́ á busu ma li, bɛ lɛ nɛ, n foo-yoo gɔ́ɔ̃ nɛ, ń ma kũ, ń ma zũ.

¹² Maa yiikoonaabaa n kiɛ̃ ka wúlu bɛ́ lɔn, ma din nə laɛ kəni, ka buu bɛ́ lɔn.

¹³ Sɛnɛ, nsɛ kaa, Dɛnaa Lawa nsɛ n kii lɛa yǎa duduu. Biikoo tumaa a minin man die n boo diɛ.

¹⁴ N Zeruzalɛmu kiwi lɛ narɛɛ taman yii, n die n yoo, taãn pɛ á soɛ, makara bɔ a ganaa biikoo dɔ. Sonbore, a biikoo dɔ.

¹⁵ Min mɛnɛn bɛ́ dí nyɛɛ n din ni, bɛn tá tɔn kiwi lɛ narɛ, a laanka a yui kɛ lɛ nɛ. A makara n tɔn nə ǹ kuĩ, a laanka a ziziɛ̃ lɛ nɛ.

¹⁶ Tɔrɔ kɔsɔn kɛn tá re nyɛ́ɛ biɛ Dɛnaa Lawa tɔ kɛ nɛ. Kanaa a kiin kɛn tumaa á re n nyɛnɛɛ n gugurubaa kɛ nɛ.

¹⁷ Dɛnaa Lawa bɛ́ re wusii a Zeruzalɛmu kiwi kɛ dɔ doo, a bɛ́ re wusii a n din nyaa foaãfoaã, a gugurubaa kɛ nɛ.

¹⁸ Á re n too koe a din a zaman kɛ a nyankɔ li, a ba re n piɛ̃ ka ǹ nyankɔ-n wa, a din a zaman mɛn bɛ́, ǹ nə́ goã ǹ nə́ ǹ gɔn yu ka lenlen.

¹⁹ Kɛ n siĩni, a n kiɛ̃, a n koa wɔa nɛnyaanan manɛ, ń giɛ, tɔrɔ dii tá yii a loe lɔ, a Dɛnaa Lawa tɔ bɔ nɛ.

²⁰ Dɛnaa Lawa din na á n toa lon, a giã ǹ bǎã sonbore kɛ nɛ, á n kanaa á ga. A din na á n toa lon, á ga tán ganaa.

²¹ Á n too kɔ nɔmaa-wɔlen ginii li, a n die yii da gɛ̀ la wolen nyin sii.

²² Maǹ die Dɛnaa Lawa tɔ kɛ kalɛɛ Zeruzalɛmu gɔ́ɔ̃ nɛ, maǹ die loe loe ǹ na a para pɛ nɛ.

²³ Tɔrɔn tumaa bɛ́ re n lɛ kiɛ kun, biikoo mɛn waáraa, ǹ dí nya Dɛnaa Lawa nɛ.

²⁴ Dɛnaa Lawa na á ma toa zii lɛ bii, á ma pàã nya, á ma nyin biɛ kunun kɔ.

²⁵ Bɛ lɛ nɛ, má tɔn pɛ: máa maa Lawa, n baran ma dɛ fufuu kɛnɛn wa. Dɛnaa Lawa, nsɛ nə n tan yǎa duduu.

²⁶ N din nə ń kanaa kɛ zɛnaa lɛlɛ-lɛlɛ, n din gɔn a màn zɛnaa n ka lon kɛ dɔ nɛ.

²⁷ Bɛn lɛn yii á re nyɛɛ, sɛnɛ, nsɛ n goɛ̃ yǎa duduu. Ǹ tumaa á re zizi koe ka mɔnaa bɛ́ lɔn, n tá re ǹ lonkoe ka dɔnkɛ bɛ́ lɔn, ǹ tá re kiɛ̃, ǹ nə ǹ bǎã toa.

²⁸ Sɛnɛ, nsɛ Lawa n goɛ̃ miɛ̃, n nyin ba nyɛɛ wa.

²⁹ N dí-nyalin kɛn lɛn nɛnyaanan man die die. Bɛa nɛnyaanan kɛn lɛn dɔn nɛnyaanan nə nɛnyaanan yɛ. Bɛ lɛ tumaa n die n zɛnɛɛ nsɛ yii ni.