Lawa a wúlu-bɔlen 9 - LAWA A BOO SONBORE

Aarɔn laanka a nɛgiĩn nə wúlu bibinaa mɛn bɔ

¹ A lɛawaa kiwisibaa ǹ wɔ pinaa kəni, Muizu Aarɔn laanka a nɛgiĩn lɛn bii, kun ka Izirayeli tɔrɔn lɛn min golen dɔn nɛ.

² Á pɛ Aarɔn nɛ: Ga diin nɛ banɛɛn laanka sère gɔ̀lɔ̀ goon li, wɔ̀lɔ̀ ná a ba ǹ kɔn ganaa wa. N die n diin nɛ banɛɛn lɛ baa sii baraa sawaa ǹ *wúlu màn lɛa, n sère gɔ̀lɔ̀ lɛ baa wúlu màn tiɛ̃ lɛa, Dɛnaa Lawa yɔrɔ-a.

³ Bɛ kio, n pɛ Izirayeli minin lɛn dɔn manɛ mà ǹ butumu goon kũ, ǹ baa sii baraa sawaa ǹ wúlu màn lɛa. Ǹ lɛ̀ goon diin nɛ laanka lɛ̀ goon sère nɛ dɔ kũ, wɔ̀lɔ̀ ná a ba ǹ kɔn ganaa wa, ǹ bɛn baa wúlu màn tiɛ̃ lɛa.

⁴ Dii gɔ̀lɔ̀ goon laanka sère gɔ̀lɔ̀ goon dɔ kũ, n nə ǹ baa barka da Lawa nɛ ǹ wúlu màn lɛa, n nə ǹ dɛ kɔn yɛ ǹ kion kɛ yɔrɔ-a. Ka da ka wùsu-diɛ dɔ nɛ nyɔɔ n li, Lawa gɔ ǹ wɔ lɛa. A giala, pelo lɛ nɛ, Dɛnaa Lawa á die n din nyɛɛ ka nɛ.

⁵ Muizu mànan mɛnɛn pɛ, ǹ nə́ daa ka bɛn nɛ, kɔn yɛ ǹ kion lɛ a kiɛnlɛ-a. Bɛ kio, zaman lɛ tumaa nə́ n zɔ̃ á dɔ, á golee Dɛnaa Lawa yɔrɔ-a.

⁶ Muizu tɔ́n pɛ: Dɛnaa Lawa màn mɛn pɛ ka nɛ, a din nə ka kɛ nɛ. Ka bɛ lɛ zɛnaa, màn mɛn bɛ́ toɛ, Dɛnaa Lawa na a gugurubaa nyaa ka nɛ.

⁷ Bɛ kio, Muizu tɔ́n pɛ Aarɔn nɛ: N zɔ̃ n dɔ *wúlu bɔ ǹ bǎã lɛ nɛ, n sii baraa sawaa ǹ wúlu màn laanka wúlu màn tiɛ̃ kɛ a tɔɔ dɛ, n nə n din laanka n zaman lɛ a sii baraan sawaa nɛ. Bɛ kio, n zaman lɛ a sii baraa sawaa ǹ wúlu bɔ ka zaman lɛ a Lawa gɔ ǹ màn kɛ nɛ, ka Dɛnaa Lawa bɛ́ á pɛ lɔn.

⁸ Aarɔn nə́ n zɔ̃ á dɔ wúlu bɔ ǹ bǎã lɛ nɛ, á diin nɛ banɛɛn lɛ bɔlɔ kuru, a din a sii baraa sawaa ǹ wúlu màn lɛa.

⁹ Aarɔn a nɛgiĩn nə́ tɔɔ lɛ a mà saa màn nɛ, ǹ nə́ dia la. Aarɔn nə́ n gòon sã li, á lɔlɔ wúlu bɔ ǹ bǎã lɛ a karan ganaa. Bɛ kio, á mà lɛ a gialakun kɛ kaa tán wúlu bɔ ǹ bǎã lɛ genli.

¹⁰ Tɔɔ lɛ a nyɔɔ ke, a dɔ̀ɔ̃ koronən kɛn laanka a foo lɛwɔn nɛ, á bɛn tã wúlu bɔ ǹ bǎã lɛ lalan, ka Dɛnaa Lawa bɛ́ á goã á pɛ Muizu-n lɔn.

¹¹ Sɛnɛ, a siĩ laanka a ki ni, a na á bɛn tã giã ǹ bǎã kɛ kio.

¹² Bɛ kio, á sère gɔ̀lɔ̀ lɛ dɛ wúlu màn tiɛ̃ lɛa. A nɛgiĩn ná a mà si ǹ nə́ kɔ la, á pɛpɛsɛ̃ wúlu bɔ ǹ bǎã lɛ wàãn tumaa ganaa.

¹³ Ǹ nə́ wúlu màn tiɛ̃ lɛ a siĩ goa a gũ lɛ yii li ǹ nə́ kɔ la, kun ka a mìi ni. Aarɔn nə́ ǹ tã wúlu bɔ ǹ bǎã lɛ lalan.

¹⁴ Á ná a nàn laanka a gòãn pii, á ǹ dɔn tã wúlu bɔ ǹ bǎã lɛ lalan, kun ka wúlu màn tiɛ̃ lɛ nɛ.

¹⁵ Bɛ kio, á zaman lɛ a Lawa gɔ ǹ mànan kɔ Lawa la. Zaman lɛ da ka butumu mɛn nɛ a sii baraa sawaa ǹ wúlu màn lɛa, á bɛ bɔlɔ kuru, á ǹ sii baraa a wúlu bɔ nɛ, ka a bɛ́ á diin nɛ banɛɛn lɛ baa lɔn bibinaa nɛ.

¹⁶ Á tɔɔ màn paa lɛ dɛ wúlu màn tiɛ̃ lɛa. Á wúlu bɔ ǹ nɛ, á kɔnpɛ ka a zɛnaa ǹ gɔn nɛ.

¹⁷ Á daa ka Lawa gɔ ǹ wùsu kɛ dɔ nɛ, á n gɔn goon pã a nɛ, á tã wúlu bɔ ǹ bǎã lɛ lalan, kun ka baayɛlɛ a wúlu màn tiɛ̃ kɛ nɛ.

¹⁸ Zaman lɛ da ka dii gɔ̀lɔ̀ laanka sère gɔ̀lɔ̀ mɛn dɔ nɛ, a barka da Lawa nɛ ǹ wúlu mànan lɛa, Aarɔn bɛn bɔlɔ kuru. A nɛgiĩn lɛn nə́ ǹ mà si ǹ nə́ kɔ la, á pɛpɛsɛ̃ wúlu bɔ ǹ bǎã lɛ wàãn tumaa ganaa.

¹⁹ Dii gɔ̀lɔ̀ lɛ laanka sère gɔ̀lɔ̀ lɛ a nyɔɔ bǎãn kɛn, a muigoã nɛ, a nyɔɔ kɛ nɛ a nàn lɛnpɛnɛ, a dɔ̀ɔ̃ koronən kɛn nɛ ka a foo lɛwɔn nɛ,

²⁰ ǹ nə́ bɛn kaa ǹ tìãbiin la, Aarɔn nə́ ǹ tã wúlu bɔ ǹ bǎã lɛ nɛ.

²¹ Ka Muizu goã á pɛ lɔn, Aarɔn tɔɔn lɛn tìãbii laanka ǹ gusin a nyàa goon a nyaa Lawa nɛ ǹ sii zɛnaa, Dɛnaa Lawa yɔrɔ-a.

²² Aarɔn bɛ́ á sii baraa sawaa ǹ wúlu lɛ bɔ á nya, wúlu màn tiɛ̃ nɛ, ka barka da Lawa nɛ ǹ wúlu mànan nɛ, á n gɔnɔn goa á ǹ dia zaman lɛ la, á barka da a ganaa. Bɛ kio, á gisĩ á n bɔ wúlu bɔ ǹ bǎã lɛ nɛ.

²³ Muizu laanka Aarɔn kaa kɔn yɛ ka Lawa nɛ ǹ kion. Bɛ kio, ǹ nə́ soo, ǹ nə́ barka da zaman lɛ ganaa. Bɛa biikoo li, Dɛnaa Lawa ná a gugurubaa nyaa zaman lɛ tumaa nɛ.

²⁴ Dɛnaa Lawa tɛ kɔn dia, á daa wúlu màn tiɛ̃ laanka màn nyɔɔn lɛn kũ a lalan. Zaman lɛ tumaa bɛ yɛ. Foo kɔɔ̃nbaa gɔn, ǹ nə́ n lɛ dɛdɛ, ǹ nə́ nana ǹ nə́ kakaa tán ǹ yɔrɔ la.