Lawa a wúlu-bɔlen 8 - LAWA A BOO SONBORE

Aarɔn laanka a nɛgiĩn koa

¹ Dɛnaa Lawa boo da ka Muizu ni á pɛ nɛ:

² Aarɔn laanka a nɛgiĩn bíi. Lawa a wúlu-bɔlen mɔnaan kɛn, ka ǹ bɔ a koa ǹ nyɔɔ kɛ nɛ, a pɛ minin manɛ, ǹ bɛn goa, ǹ da ǹ nɛ. Dii gɔ̀lɔ̀ ke sii baraa sawaa ǹ *wúlu màn lɛa, ka sère gɔ̀lɔ̀ màn paa kɛ nɛ, ǹ da ka bɛn dɔn nɛ. Kankaan ke buuru ná a nɛ, yɔ bù ná a ba li wa, ǹ da ka bɛ dɔ nɛ.

³ Bɛ kio, n zaman lɛ tumaa bíi n da ǹ nɛ kɔn yɛ ǹ kion lɛ a kiɛnlɛ-a.

⁴ Dɛnaa Lawa pɛ Muizu-n lɔn, Muizu zɛnaa miɛ̃. Zaman lɛ daa n lɛ sɔkɔn kɔn yɛ ǹ kion lɛ a kiɛnlɛ-a.

⁵ Dɛnaa Lawa dí mɛn pɛ Muizu ni, Muizu bɛ yɔrɔ pɛ zaman lɛ nɛ.

⁶ Bɛ kio, Muizu lɛ dia Aarɔn laanka a nɛgiĩn la, á landa a zoo kɛ wɔ ǹ ganaa.

⁷ Dɔnkɛ sonbore ke nyaǹ ná a ganaa, á bɛ wɔ Aarɔn ganaa, á ná a binbin yii ǹ màn kɛ da la. Bɛ kio, á dɔnkɛ sasa kɛ wɔ a ganaa, á dí nya ǹ mɔnaa kɛ da la, á bɛ lɛ gɔnɔn kũ á ǹ yii a dɔ̀ɔ̃ nɛ.

⁸ Bɛ kio, á tìãbii zéwo kɛ lɔɔ a ganaa, á Lawa dùũ dɔ̃ ǹ mànan kɛn kaa bɛ nɛ.

⁹ Á mìi yii ǹ mɔnaa gɔn kɛ yii a mìi-a, sana ke da buũ a kɔnboe lɛa, á bɛ da mɔnaa gɔn kɛ ganaa a nyanlɛ-a. Bɛ n nyɛɛ mà ǹ nə́ Aarɔn bɔ ǹ nə́ koa Dɛnaa Lawa wɔ lɛa, ka Dɛnaa Lawa bɛ́ á goã á pɛ Muizu-n lɔn.

¹⁰ Bɛ kio, Muizu bɔ a koa ǹ nyɔɔ lɛ saa. Á ǹ kɔn kaa kɔn yɛ ǹ kion kɛ laanka a gɔ́ɔ̃gɔ́ɔ̃ ǹ mànan ganaa, á ǹ baa Lawa wɔn lɛa.

¹¹ Á nyɔɔ lɛ pɛpɛsɛ̃ *wúlu bɔ ǹ bǎã kɛ laanka a mànan tumaa ganaa gunyin sɔbaa, á pɛpɛsɛ̃ *gɔ̀ bɔmaa ǹ doo kaaraa kɛ dɔ laanka a giala da ǹ bǎã ganaa, á ǹ baa Lawa wɔn lɛa.

¹² Á bɛa nyɔɔ lɛ kɔn kaa Aarɔn mìi ni, á bɔ á koa Lawa wɔ lɛa.

¹³ Bɛ kio, Muizu Aarɔn a nɛgiĩn bíi ǹ nə́ daa. Dɔnkɛ sonboren kɛn nyàn nə́ ǹ ganaa, á bɛn wɔ ǹ-a, á bii yii ǹ màn da ǹ la, á Lawa a wúlu-bɔlen bafolon kɛn wɔ ǹ gogoonmaa mìi-a, ka Dɛnaa Lawa goã á pɛ Muizu-n lɔn.

¹⁴ Bɛ kio, ǹ bɛ́ re dii gɔ̀lɔ̀ mɛn biɛ sii baraa sawaa ǹ wúlu màn lɛa, Muizu pɛ, mà ǹ bɛ baã ǹ da nɛ. Aarɔn laanka a nɛgiĩn lɛn nə́ n gɔn dada bɛa dii gɔ̀lɔ̀ lɛ mìi ni.

¹⁵ Muizu tɔ́n na a bɔlɔ kuru, a ná a mà si. Á n gòon sã bɛa mà lɛ li, karan mɛnɛn tumaa bɛ́ wúlu bɔ ǹ bǎã lɛ gùrùn ganaa, á lɔ bɛn ganaa, a wúlu bɔ ǹ bǎã lɛ baa Lawa wɔ lɛa. Á mà lɛ a gialakun kaa tán wúlu bɔ ǹ bǎã lɛ genli màn mɛn bɛ́ toɛ a Lawa wɔ baa, ǹ boo la, ǹ sii baraa sawaa ǹ wúlu bɔ la.

¹⁶ Nyɔɔ mɛn tumaa bɛ́ pɛnɛɛ-n tɔɔ lɛ nàn ganaa, Muizu bɛ waa. Á ná a foo lɛwɔn kɛ bɔ, ka a dɔ̀ɔ̃ koron màn paa kɛ laanka nyɔɔ mɛn bɛ́ doa-n bɛn ganaa, á ǹ tumaa tã wúlu bɔ ǹ bǎã lɛ lalan.

¹⁷ Dii gɔ̀lɔ̀ lɛ a paǹ gialakun ke, a ki ni, a siĩ ni, ka a nàn nɛ, ǹ nə́ bɛ tumaa tã ǹ giã ǹ bǎã kɛ kio, ka Dɛnaa Lawa goã á pɛ Muizu-n lɔn.

¹⁸ Bɛ kio, ǹ bɛ́ re sère gɔ̀lɔ̀ mɛn biɛ wúlu màn tiɛ̃ lɛa, Muizu pɛ mà ǹ bɛ baã ǹ da nɛ. Aarɔn laanka a nɛgiĩn nə́ n gɔn dada sère gɔ̀lɔ̀ lɛ mìi ni,

¹⁹ Muizu tɔ́n na a bɔlɔ kuru, a ná a mà pɛpɛsɛ̃ wúlu bɔ ǹ bǎã lɛ ganaa, á ná a lɛnpɛnɛ nɛ.

²⁰ Bɛ kio, Muizu sère gɔ̀lɔ̀ lɛ kakã a gù lɛ yii li. A mìi ni, a gùn lɛn nɛ, ka a nyɔɔ nɛ, á bɛn tã.

²¹ Muizu tɔɔ lɛ a nàn laanka a kèrèn pii, á ná a tumaa tã wúlu bɔ ǹ bǎã kɛ lalan. A n wúlu màn tiɛ̃ lɛa, a tɛmaa gìĩ n kɔɔ̃n Dɛnaa Lawa ganaa, á n tã a wɔ lɛa, ka a din bɛ́ á goã á pɛ Muizu-n lɔn.

²² Bɛ kio, á pɛ ǹ nɛ, mà ǹ da ka sère gɔ̀lɔ̀ paabaa ǹ wɔ kɛ nɛ, min koa wúlu-bɔle lɛa ǹ wɔ lɛa. Aarɔn laanka a nɛgiĩn nə́ n gɔn dada bɛa sère gɔ̀lɔ̀ lɛ mìi ni.

²³ Muizu tɔ́n tɔɔ lɛ bɔlɔ kuru, a ná a mà si á lɔ Aarɔn too lɛwɔn ganaa, á ǹ kɔn lɔ a gusin a gɔn a gòon mìi gole ganaa, á ǹ kɔn lɔ a gusin a gòã a gòon mìi gole ganaa.

²⁴ Bɛ kio, Muizu Aarɔn a nɛgiĩn bíi á daa ǹ nɛ. Á mà lɛ kɔn lɔ ǹ dɔn gusin a too lɛwɔnɔn ganaa, á ǹ kɔn lɔ ǹ gusin a gɔn a gòon mìi golen ganaa, á ǹ kɔn lɔ ǹ gusin a gòã a gòon mìi golen ganaa. Bɛ kio kəni, á mà lɛ a gialakun kɛ pɛpɛsɛ̃ wúlu bɔ ǹ bǎã lɛ ganaa, a ná a lɛnpɛnɛ nɛ.

²⁵ Tɔɔ lɛ a paǹan mɛnɛn bɛ́ nyɔɔ lɛa, Muizu bɛn goa: a muigoã nɛ, nyɔɔ mɛn tumaa bɛ́ a gɔ́ɔ̃ nɛ, a foo lɛwɔn nɛ, a dɔ̀ɔ̃ koron màn paa kɛ laanka nyɔɔ mɛn bɛ́ doa-n kɔn, ka a gusin a nyàa nɛ.

²⁶ Yɔ bùbaã buuru kaa ǹ kankaan mɛn bɛ́ koa-n Dɛnaa Lawa yɔrɔ-a, á buuru kɔn bɔ walan: ǹ mɛn bɛ́ yɔ bù ná a ba li wa, ǹ mɛn dɔ bɛ́ ǹ nə́ zɛnaa ka nyɔɔ nɛ, ka mɔ̀mɔ kɔn nɛ, á ǹ kaa tɔɔ lɛ a nyɔɔ bǎãn laanka a gusin a nyàa lɛ lalan.

²⁷ Á ná a tumaa kaa Aarɔn laanka a nɛgiĩn lɛn gɔn tisi bii, á pɛ ǹ nɛ: Ka a kɔ Lawa la ǹ sii zɛnaa Dɛnaa Lawa yɔrɔ-a.

²⁸ Muizu wusoo á bɛa mànan lɛn si ǹ la, á ǹ tã wúlu bɔ ǹ bǎã kɛ nɛ, kun ka wúlu màn tiɛ̃ kɛ nɛ. Min koa wúlu-bɔle lɛa ǹ wúlu màn nɛ, á n tã Dɛnaa Lawa wɔ lɛa, a tɛmaa gìĩ n kɔɔ̃nɛ a ganaa.

²⁹ Muizu tɔɔ lɛ a tìãbii saa, a ná a kɔ Lawa la ǹ sii zɛnaa Dɛnaa Lawa yɔrɔ-a. Min bɔ a koa wúlu-bɔle lɛa ǹ sère lɛ tìãbii n Muizu wɔ gii lɛa, ka Dɛnaa Lawa bɛ́ á goã á pɛ Muizu-n lɔn.

³⁰ Bɛ kio, Muizu bɔ a koa ǹ nyɔɔ kɛ laanka mà kɔn saa màn nɛ, wúlu bɔ ǹ bǎã kɛ lalan. A ǹ pɛpɛsɛ̃ Aarɔn laanka a mɔnaan ganaa, á ǹ pɛpɛsɛ̃ a nɛgiĩn lɛn dɔn laanka ǹ mɔnaan ganaa. A na á zɛnaa miɛ̃ á Aarɔn laanka a mɔnaan baa Lawa wɔn lɛa, á ná a nɛgiĩn lɛn dɔn laanka ǹ mɔnaan baa Lawa wɔn lɛa.

³¹ Muizu tɔ́n pɛ Aarɔn laanka a nɛgiĩn lɛn manɛ: Ka sère gɔ̀lɔ̀ paabaa ǹ wɔ lɛ a siĩ kɔrɛ kɔn yɛ ǹ kion kɛ a kiɛnlɛ-a. Ka ǹ sɔ̃ walan kun ka buuru kɛ nɛ, ka ǹ kaa kankaan nɛ, min koa wúlu-bɔle lɛa lɛ taman yii. N din Aarɔn laanka n nɛgiĩn ni, ka dininsɔɔ̃nɔn doamaa nɛ, ka bɛa siĩ lɛ sɔ̃. Ma pɛ ka-n lɔn, ka zɛnaa miɛ̃.

³² Siĩ lɛ a mɛn laanka buuru lɛ a mɛn bɛ́ á goã, ka bɛ tã.

³³ Ka giã kɔn yɛ ǹ kion lɛ a kiɛnlɛ-a lɛawaa sɔbaa gɔ́ɔ̃ nɛ, ka n ka a woe bǎã-n wa, yǎa koa wúlu-bɔle lɛa ǹ landa lɛ a nya pinaa. A giala, ka koa wúlu-bɔle lɛa ǹ landa lɛ a dí nə n nyɛɛ yǎa lɛawaa sɔbaa.

³⁴ Wɔ zɛnaa lɔn pelo ke lɛn, Dɛnaa Lawa na á pɛ mà a n zɛnaa miɛ̃, màn mɛn bɛ́ toɛ, a kaa sii baraan toa ka nɛ.

³⁵ Ka giã kɔn yɛ ǹ kion lɛ a kiɛnlɛ-a, baayɛlɛ laanka tèlò ne, yǎa lɛawaa sɔbaa. Dɛnaa Lawa dí mɛn kɔ ka la, ka bɛ nya, màn mɛn bɛ́ toɛ, a baran ka dɛ wa. Dɛnaa Lawa dí mɛn pɛ ma nɛ, a din ni ka kɛ nɛ.

³⁶ Dɛnaa Lawa dí mɛn tumaa pɛ Muizu ni, mà a pɛ Aarɔn laanka a nɛgiĩn lɛn manɛ, Aarɔn laanka a nɛgiĩn lɛn ná a tumaa nya, ka Muizu bɛ́ á pɛ ǹ nɛ lɔn.