Lawa a wúlu-bɔlen 6 - LAWA A BOO SONBORE

Boo mɛn nə n pɛ wúlu-bɔlen manɛ Wúlu màn tiɛ̃

¹ Dɛnaa Lawa boo da ka Muizu ni á pɛ nɛ:

² Sii nyaa ǹ zii kɛ pɛ Aarɔn laanka a nɛgiĩn manɛ: *Wúlu màn tiɛ̃ lɛ a bɔ ǹ gɔn nə́ ke: A bɛ́ n wúlu màn tiɛ̃ lɛa, a doamaa nɛ a goã *wúlu bɔ ǹ bǎã lɛ a tɛ la, a saa tèlò ganaa a wo baayɛlɛ yaa, tɛ n kuĩ a ganaa miɛ̃.

³ Baayɛlɛ, Lawa a wúlu-bɔle na a dí nya ǹ mɔnaa laanka bɛ̀rɛ̀ guguru sonbore kɛ wɔ. Á bɛn lɛn toa a ganaa, ǹ wúlu màn mɛn tã wúlu bɔ ǹ bǎã lɛ la, á ton baa, á bɛ goa á kaa tán wúlu bɔ ǹ bǎã lɛ genli.

⁴ Bɛ kio, a na a mɔnaan lɛn waa, a mɔnaa kɔsɔn wɔ, a ton lɛ goa, a soo a n bɔ giã ǹ bǎã kɛ nɛ, a wo kaa tán wúlu bɔ ǹ bǎã kɛa ton kaa ǹ bǎã nɛ.

⁵ Tɛ mɛn sɛ á ke wúlu bɔ ǹ bǎã lɛ lalan, bɛ doamaa nɛ a goã kuĩ miɛ̃, a na a nimi wa. Baraabaraa baayɛlɛ, wúlu-bɔle lɛ wusoo bɛ̀ a gɔn kaa a nɛ, a wúlu màn tiɛ̃ lɛ da bɛ lalan. Barka da Lawa nɛ ǹ wúlu mànan kɛn nyɔɔ ke, a bɛ tã a lalan.

⁶ Tɛ doamaa nɛ a goã kuĩ wúlu bɔ ǹ bǎã lɛ lalan miɛ̃, a ná a nimi duduu wa.

Lawa gɔ ǹ màn

⁷ Lawa gɔ ǹ màn lɛ a bɔ ǹ gɔn nə́ ke: Aarɔn a nɛgiĩ wúlu-bɔlen kɛn doamaa nɛ, ǹ golee wúlu bɔ ǹ bǎã lɛ yɔrɔ-a, ǹ wúlu màn lɛ kɔ Dɛnaa Lawa la.

⁸ A wúlu bɔ ǹ *wùsu sonbore kɛ a gɔn yii goon bɔ, ka a nyɔɔ kɛ a gɔn yii goon ne, ka da yon gìĩ kɔɔ̃n kɛ tumaa-n la, a tã wúlu bɔ ǹ bǎã kɛ lalan. Yiri gisĩ sii ni ǹ màn nɛ, a tɛmaa gìĩ n kɔɔ̃n Dɛnaa Lawa ganaa.

⁹ Ǹ mɛn bɛ́ goɛ̃, Aarɔn laanka a nɛgiĩn kɛn tá boe la ǹ bɛ bii. Sɛnɛ, yɔ bù doamaa bie a goã li wa. Ǹ bǎã mɛn bɔ ǹ nə́ koa Lawa wɔ lɛa, ǹ doamaa nɛ ǹ bii walan, kɔn yɛ ka Lawa nɛ ǹ kion kɛ a sumu-n.

¹⁰ A ba n zɛnɛɛ ka yɔ bù n li wa. Ǹ wɔ gii n ka bɛ lɛ nɛ, masɛ á koe ǹ la. A n boe wúlu mànan kɛn nɛ, bɛ̀ ǹ nə ǹ tã masɛ Dɛnaa Lawa wɔn lɛa. Bɛ na a gɔrɔn masɛ Dɛnaa Lawa wɔ lɛa, goon ka màn mɛn bɛ́ boe sii baraa sawaa ǹ wúlu màn hinlaa zɛ̀rɛ si ǹ wɔ kɛ nɛ, bɛ̀ a dɔ ǹ ganaa.

¹¹ Aarɔn a nɛgiĩn lɛn dininsɔɔ̃nɔn man boe la ǹ bii. Ǹ bɛ́ wúlu mànan mɛnɛn tiɛ̃ Dɛnaa Lawa wɔ lɛa, ǹ bɔ bɛn lɛn nɛ miɛ̃ duduu, bɛ̀ ǹ kɔ ǹ la. Ǹ wɔ gii n ka bɛ lɛ-n miɛ̃ duduu. Bɛ lɛ nɛ, bɛ̀ min mɛn kɔsɔ woo a wɔlɔ li, a dɔlɔ á re n boe a ganaa.

¹² Dɛnaa Lawa wusoo á boo da ka Muizu ni á pɛ nɛ:

¹³ Bɛ̀ ka nyɔɔ kaa Aarɔn laanka a nɛgiĩn lɛn mìi ni, ka ǹ bɔ ka ǹ koa wúlu-bɔle lɛa ǹ mɛn pinaa, ka doamaa nɛ ka Dɛnaa Lawa gɔ ka kɛ nɛ: wùsu nɔnɔɔ kilo sɔɔ, ka bɛ kɔ Dɛnaa Lawa la miɛ̃ duduu. Ka a talɛɛ kɔ la baayɛlɛ, ka a talɛɛ kɔ la wasamiɛ̃nɛ.

¹⁴ Ka doamaa nɛ ka nyɔɔ kaa wùsu lɛ li ǹ yia, ka tɔn bɛ lɛ da fɔlɔ donkolon ne. Bɛ kio, ka tɔn kukuru kɔn ka da nɛ Lawa gɔ ǹ màn lɛa, a gìĩ n kɔɔ̃n Dɛnaa Lawa ganaa.

¹⁵ Ka bɛ́ re nyɔɔ kiɛ Aarɔn a nɛgiĩ lɛ mɛn mìi ni, ka bɔ ka koa a bǎã nɛ wúlu-bɔle lɛa, bɛ dɔ doamaa nɛ, a zɛnaa miɛ̃. A zɛnaa ǹ gɔn lɛ n ka bɛ lɛ nɛ miɛ̃ duduu. Ka a tumaa tã lenlen Dɛnaa Lawa wɔ lɛa.

¹⁶ A giala, Lawa a wúlu-bɔle a wúlu màn tumu doamaa nɛ, a n tã lenlen. Ka doamaa bie ka màn kɔn bii a-n wa.

Sii baraa sawaa ǹ wúlu màn

¹⁷ Dɛnaa Lawa wusoo á boo da ka Muizu ni á pɛ nɛ:

¹⁸ A pɛ Aarɔn laanka a nɛgiĩn manɛ: Sii baraa sawaa ǹ wúlu lɛ a bɔ ǹ gɔn nə́ ke: Ǹ doamaa nɛ ǹ sii baraa sawaa ǹ wúlu lɛ a tɔɔ dɛ kɔn yɛ ka Lawa nɛ ǹ kion kɛ yɔrɔ-a, wúlu màn tiɛ̃ kɛ a tɔɔ dɛ ǹ bǎã nɛ. Dɛnaa Lawa dinsɔɔ̃ a màn nɛ.

¹⁹ Lawa a wúlu-bɔle mɛn bɛ́ re bɛa wúlu lɛ boe, bɛ á boe la, a na a siĩ sɔ̃. Ǹ bɛ́ ǹ nə́ bǎã mɛn bɔ ǹ nə́ koa Lawa wɔ lɛa, a doamaa nɛ a n sɔ̃ walan, kɔn yɛ ka Lawa nɛ ǹ kion kɛ a sumu-n.

²⁰ Bɛ̀ màn hinlaa min kɔsɔ woo a siĩ wɔlɔ li, bɛ na á n din bɔ. Bɛ̀ a mà dɔ́ parɛ á kaa mɔnaa mɛn ganaa, ǹ bǎã mɛn bɔ ǹ nə́ koa Lawa wɔ lɛa, ǹ wo a mà bǎã lɛ pii walan.

²¹ Ǹ bɛ́ re wúlu màn lɛ kɔrɛɛ tii donkolon mɛn nɛ, bɛ̀ ǹ nə́ nya, ǹ bɛ yu. Sɛnɛ, bɛ̀ zan donkolon ne, ǹ bɛ gɔ́ɔ̃ pii, ǹ koosa mu li.

²² Wúlu-bɔlen lɛn kion minin mɛnɛn bɛ́ giĩn lɛa, bɛn dininsɔɔ̃nɔn man boe la, ǹ bɛa siĩ lɛ sɔ̃. A giala, bɛ na a gɔrɔn masɛ Dɛnaa Lawa wɔ lɛa.

²³ Sɛnɛ, tɔɔ mɛn tumaa bɛ́ sii baraa sawaa ǹ wúlu màn lɛa, ǹ nə́ die we ka a mà nɛ kɔn yɛ ka Lawa nɛ ǹ kion kɛ nɛ, ǹ sii baraa sawaa ǹ wúlu bɔ nɛ Lawa a bǎã sonbore kɛ nɛ, bɛa tɔɔ lɛ kɔn siĩ doamaa bie a n sɔ̃ wa. A doamaa nɛ, a n tã lenlen.