Lawa a wúlu-bɔlen 24 - LAWA A BOO SONBORE

Bolon koa ǹ bǎã

¹ Dɛnaa Lawa boo da ka Muizu ni á pɛ nɛ:

² A laa Izirayeli minin lɛn ganaa, mà ǹ da *olivie da kɛ a nyɔɔ sonbore kɔ n la, bolon kɛ wɔ lɛa, màn mɛn bɛ́ toɛ, a goã kuĩ miɛ̃ duduu.

³ Kion bii kuru kɔn-a ǹ mɔnaa mɛn bɛ́ n koe *lɛ kɔ kɔn la ǹ goo kɛ lɛ, Aarɔn giã bɛ lɛ kio, kɔn yɛ ǹ kion kɛ nɛ, a bolon lɛ a tɛ zɛnaa, màn mɛn bɛ́ toɛ, a kũ miɛ̃ duduu Dɛnaa Lawa yɔrɔ-a, a saa wasamiɛ̃n ganaa, a wo baayɛlɛ yaa. Bɛ n landa lɛa, ka mìi ni miɛ̃ duduu, ka tɔrɔn tumaa wɔ lɛa, a ba n bɔyɛɛ wa.

⁴ Bolon koa ǹ bǎã ke, ǹ nə́ zɛnaa ka sana nɛ, ka bolonən lɛn koa walan, ǹ kũ Dɛnaa Lawa yɔrɔ-a miɛ̃ duduu.

Lawa gɔ ǹ buuru

⁵ Ka *wùsu sonbore saa, ka buuru mìi fulupaa da nɛ, ǹ gogoonmaa a gugurubaa n doe kilo sɔrɔ.

⁶ Ka tabala mɛn lɛ zɛnaa ka sana nɛ, ka buuru lɛ kaa kɔn la bɛ lalan, pàla paa Dɛnaa Lawa yɔrɔ-a: pàla goon buuru mìi sɔrɔ.

⁷ Ka die ka da yon gìĩ kɔɔ̃n da buuru lɛ a kaa kɔn la gogoonmaa lalan. Ka bɛ lɛ tã masɛ Dɛnaa Lawa wɔ lɛa buuru lɛ bǎã nɛ, màn mɛn bɛ́ toɛ, ka yiri goã a nɛ, mà buuru lɛ n masɛ wɔ lɛa.

⁸ Bɛ̀ *susu ǹ pii dɔ lɔn, Izirayeli minin lɛn nə da bɛa buuru lɛ kaa tán Dɛnaa Lawa yɔrɔ-a. Ka doamaa nɛ ka zɛnaa miɛ̃ yǎa duduu.

⁹ Bɛa buuru lɛ n doe Aarɔn laanka a nɛgiĩn ganaa. Ka bǎã mɛn bɔ ka koa Lawa wɔ lɛa, ka doamaa nɛ ka sɔ̃ walan, a giala, màn yoren yoren ne, ǹ nə́ bɔ Dɛnaa Lawa a wúlu mànan kɛn bii, ǹ nə́ kɔ ka la. Bɛ lɛ n kaa wɔ gii lɛa yǎa duduu.

Lawa tɔ ziziɛ̃ wole a dɔlɔ

¹⁰ Ǹ kɔn pinaa, zia yoo min paa bii Izirayeli minin giã ǹ bǎã nɛ: Izirayelin lɔ goon a nɛgiĩ n ka goon ne, sɛnɛ, ǹ di n Ezipti min lɛa. Goon kɛ n Izirayeli min lɛa. Ǹ mɛn lɛ bɛ́ ǹ dan dinsɔɔ̃ n Izirayeli min lɛa, asɛ lɛ na á soo a giã ǹ bǎã nɛ, á daa n dɔ Izirayeli minin lɛn bii ǹ giã ǹ bǎã nɛ.

¹¹ A da yaa, a dɔ dan nə Izirayeli min lɛa, a tɔ n Selomiti, Dibri a nɛlɔ nɛ. Dibri lɛ n Dan tɔrɔ lɛa. Selomiti a nɛgiĩ lɛ na á Lawa tɔ ziziɛ̃, á sɔ kɔ a ganaa. Bɛ lɛ nɛ, ǹ nə́ kũ ǹ nə́ daa kɔ Muizu la.

¹² Ǹ nə́ minin koa a li, mà ǹ na a lɛduə̃ taãn-taãnɛ, bɛ̀ ǹsɛn nə baa Dɛnaa Lawa lɛ gɔ́ɔ̃ ǹ boo miɛ.

¹³ Dɛnaa Lawa tɔ́n boo da ka Muizu ni á pɛ nɛ:

¹⁴ Min mɛn nə sɔ lɛ kɔ, a bɔ giã ǹ bǎã lɛ nɛ, n soo ne. Min mɛn tumaa na a lɛ ma sɔ lɛ koe masɛ Dɛnaa Lawa ganaa, bɛn nə n gɔnɔn kaa a mìi ni, bɛ kio, Izirayeli zaman lɛ tumaa kɔlɔ kaã bɔ a ganaa, ǹ dɛ a gã.

¹⁵ N die n kɛ pɛ Izirayeli minin lɛn manɛ: Bɛ̀ min mɛn sɔ kɔ a Lawa ganaa, mà ǹ dɛnaa din doamaa nɛ, a n toɛ̃ ka a sii baraa a guĩ ni.

¹⁶ Kɛ kio, bɛ̀ min woo min Dɛnaa Lawa tɔ ziziɛ̃, ka dɛ a gã. Ta gùli ni hinlaa Izirayeli min ni, ka kɔlɔ kaã bɔ a ganaa, ka dɛ a gã, masɛ tɔ ziziɛ̃ lɛ a lɛa.

¹⁷ Bɛ̀ min nə́ ǹ miã dɛ á gã, yǎa ǹ na a dɔ dii a giɛ̃.

¹⁸ Bɛ̀ min nə́ ǹ miã a tɔɔ dɛ á gã, a doamaa nɛ a na a dòo saraa ka tɔɔ yiikoonaa nɛ.

¹⁹ Bɛ̀ min mɛn wɔ̀lɔ̀ da ǹ miã ganaa, ǹ bɛa wɔ̀lɔ̀ lɛ miã da a dɔ ganaa.

²⁰ Gù-yiɛ a saraa n ka gù-yiɛ nɛ, yii wɔ n ka yii ni, sɔ wɔ n ka sɔ nɛ. A wɔ̀lɔ̀ mɛn da ǹ miã lɛ ganaa, ǹ bɛ lɛ miã da a dɔ ganaa.

²¹ Bɛ̀ min nə́ ǹ miã a tɔɔ dɛ, a doamaa nɛ a na a dòo saraa. Bɛ̀ min nə́ ǹ miã dɛ, ǹ doamaa nɛ ǹ bɛa dɛnaa dɛ a gã.

²² Sii yɔrɔ bɔ ǹ gɔn goon doamaa nɛ a goã ka lon, ka dinin Izirayeli minin laanka gùlin wɔ paǹ li. A giala, masɛ din Dɛnaa Lawa n kaa Lawa lɛa.

²³ Muizu bɛa boo lɛn yɔrɔ pɛ Izirayeli minin manɛ. Bɛ kio, ǹ nə́ sɔ kɔ Lawa ganaa wole lɛ bɔ ǹ nə́ bɔ giã ǹ bǎã lɛ nɛ, ǹ nə́ soo ne, ǹ nə́ kɔlɔ kaã bɔ a ganaa, ǹ nə́ dɛ á gã. Dɛnaa Lawa pɛ Muizu-n lɔn, Izirayeli minin lɛn dɔn man nə́ zɛnaa miɛ̃.