Lawa a wúlu-bɔlen 23 - LAWA A BOO SONBORE

Izirayeli minin zɔ́nɔn

¹ Dɛnaa Lawa boo da ka Muizu ni á pɛ nɛ:

² Boo da ka Izirayeli minin lɛn nɛ n pɛ ǹ nɛ: Masɛ Dɛnaa Lawa lɛawaa dadaran mɛnɛn koa, ka doamaa nɛ, ka n lɛ sɔkɔn bɛa lɛawaan lɛn li, ka ma guguru kɔ. Maa lɛawaa dadaran lɛn man ka kɛn nɛ:

Susu ǹ pii

³ Lɛawaa sɔrɔ gɔ́ɔ̃ nɛ, ka kaa dín nya. Sɛnɛ, lɛawaa sɔbaabaa ǹ wɔ kɛ n *susu ǹ pii lɛa. Ka doamaa bie ka dí kɔn nya bɛa pinaa wa. Ka doamaa nɛ, ka n lɛ sɔkɔn, ka masɛ guguru kɔ. Ta ka n bǎã mɛn nɛ, ka susu ǹ pii pinaa lɛ koa, masɛ Dɛnaa Lawa wɔ lɛa.

⁴ Masɛ Dɛnaa Lawa lɛawaa dadaran mɛnɛn lɛn koa, bɛ̀ ǹ mɛn a biikoo dɔ, ka lɛ dia kɔn la, ka n lɛ sɔkɔn, ka masɛ guguru kɔ. Bɛa lɛawaan lɛn kɔsɔn man ka kɛn nɛ.

Kiɛ̃mala ǹ zɔ́n laanka yɔ bùbaã buuru zɔ́n

⁵ Mui bibinaa a lɛawaa fulusiibaa ǹ wɔ pinaa, wasa a yii siɛ̃ waáraa, Dɛnaa Lawa a *kiɛ̃mala ǹ zɔ́n nɛ.

⁶ A din mui lɛ a lɛawaa fulusoorobaa ǹ wɔ pinaa, *yɔ bùbaã buuru zɔ́n nə n giala koe, masɛ Dɛnaa Lawa tɔ bɔ a lɛa. Lɛawaa sɔbaa gɔ́ɔ̃ nɛ, ka bɛ́ re buuru mɛn soɛ̃, yɔ bù nyan goã li wa.

⁷ Lɛawaa bibinaa pinaa, ka n lɛ sɔkɔn, ka masɛ guguru kɔ. Ka bɛ́ dín mɛnɛn nyɛɛ babaraa, ka nyan toa ka bɛ kɔn nya bɛa pinaa wa.

⁸ Lɛawaa sɔbaa lɛ a gogoonmaa li, ka wúlu mànan dɛ, ka ǹ tã Dɛnaa Lawa wɔ lɛa. A lɛawaa sɔbaabaa ǹ wɔ pinaa, ka n lɛ sɔkɔn, ka masɛ guguru kɔ. Ka bɛ́ dín mɛnɛn nyɛɛ babaraa, ka nyan toa ka bɛ kɔn nya bɛa pinaa wa.

Wuru màn lɛ bibinaa kuru ǹ zɔ́n

⁹ Dɛnaa Lawa boo da ka Muizu ni á pɛ nɛ:

¹⁰ Boo da ka Izirayeli minin lɛn nɛ, n pɛ ǹ nɛ: Masɛ bɛ́ gána mɛn lɛ koe ka la, bɛ̀ ka wɔ a nɛ ǹ mɛn waáraa, bɛ̀ ka tá kaa wuru màn kuri, ka da a gɔn sara yii bibinaa kɔ Lawa a wúlu-bɔle la, kaa wuru gɔ́ɔ̃ màn kurii bibinaa lɛa.

¹¹ Wúlu-bɔle lɛ gɔn sara yii lɛ a nyaa masɛ Dɛnaa Lawa nɛ nɛ ǹ sii zɛnaa *wúlu bɔ ǹ bǎã kɛ yɔrɔ-a, màn mɛn bɛ́ toɛ, ma bǐɛ̃ kɔ ka ganaa. A bɛ zɛnaa susu ǹ pii a lɛawaa.

¹² A din pinaa lɛ dɔ nɛ, lɛ̀ goon sère nɛ mɛn bɛ́ wɔ̀lɔ̀ ná a ba a ganaa wa, ka bɛ kɔ masɛ Dɛnaa Lawa la *wúlu màn tiɛ̃ lɛa.

¹³ Mànan mɛnɛn bɛ́ n tii bɛ ganaa Lawa gɔ ǹ wɔn lɛa, bɛn nə́ ke: *wùsu sonbore kilo sɔrɔ. Ka bɛ yia ka nyɔɔ nɛ, ka kɔ masɛ la wúlu màn lɛa, a tɛmaa gìĩ n kɔɔ̃n masɛ ganaa, kun ka duvɛ̃ litiri goon ka talɛɛ nɛ.

¹⁴ Kaa wuru màn dii lɛ a buuru ni, a tiɛ̃ nɛ ka a burun ni, ka nyan bɛ kɔn wɔ ka lɛ-n, bɛ̀ a kɔ masɛ la ǹ lɛawaa taãn kɛ ná a dɔ wa. Kɛ n landa lɛa, ka doamaa nɛ ka kɔ lɛ biikoo tumaa li, ta ka n giã-n bǎã mɛn nɛ.

Kaa-piɛ ǹ zɔ́n

¹⁵ Ka bɛ́ re die gɔn sara yiin lɛn nyɛɛ masɛ Dɛnaa Lawa nɛ ǹ mɛn pinaa, susu ǹ pii a lɛawaa nɛ. A saa bɛa pinaa lɛ ganaa, ka piizii sɔbaa lɛpiɛ̃ nimi.

¹⁶ Susu ǹ pii lɛ a sɔbaabaa ǹ wɔ a lɛawaa nə n biɛ a lɛawaa posoorobaa ǹ wɔ lɛa. Bɛa pinaa kəni, ka da kaa màn-kurii dii lɛ a kɔn kɔ masɛ Dɛnaa Lawa la wúlu màn lɛa.

¹⁷ Ta ka n giã-n bǎã mɛn nɛ, ka soo ka buuru mìi paa nɛ walan, ka da ǹ nyaa masɛ nɛ ǹ sii zɛnaa. Ka yɔ bù kaa *wùsu sonbore kilo sɔɔ li, ka bɛa buuru lɛ da nɛ. Ka bɛ́ re kaa wuru gɔ́ɔ̃ mànan mɛnɛn kuri bibinaa nɛ, bɛn lɛn man masɛ Dɛnaa Lawa wɔn lɛa.

¹⁸ Ka da ka lɛ̀ goon sère nɛ sɔbaa nɛ, wɔ̀lɔ̀ ná a ba ǹ ganaa wa, ka dii gɔ̀lɔ̀ goon laanka sère gɔ̀lɔ̀ paa nɛ, ka ǹ ti buuru lɛ ganaa. Ka bɛa tɔɔn lɛn kɔ masɛ Dɛnaa Lawa la, wúlu màn tiɛ̃ lɛa. Ka doamaa bɛ́ nɛ ka wùsu laanka duvɛ̃ mɛn kɔ masɛ la wúlu màn lɛa, ka bɛn kaa kun ni. Ka die ka bɛa mànan lɛn tã wúlu màn lɛa, a tɛmaa gìĩ n kɔɔ̃n masɛ Dɛnaa Lawa ganaa.

¹⁹ Ka butumu goon dɔ dɛ sii baraa sawaa ǹ wúlu màn lɛa, ka lɛ̀ goon sère nɛ paa dɛ barka da Lawa nɛ ǹ wúlu màn lɛa.

²⁰ Wúlu-bɔle lɛ wúlu mànan lɛn nyaa Dɛnaa Lawa nɛ ǹ sii zɛnaa: sère nɛ màn paa lɛ laanka màn-kurii bibinaa lɛ a buuru ni. Bɛa mànan lɛn man doe Lawa a wúlu-bɔle ganaa, a giala, maǹ nə́ ǹ kɔ Dɛnaa Lawa la.

²¹ Bɛa pinaa kɛ lɛ nɛ, ka kɔn bii, ka n lɛ sɔkɔn, ka masɛ guguru kɔ. Ka bɛ́ dín mɛnɛn nyɛɛ babaraa, ka nyan toa ka bɛ kɔn nya bɛa pinaa wa. Bɛ lɛ n landa lɛa, ka mìi ni miɛ̃ duduu, ka tɔrɔn tumaa wɔ lɛa, a ba n bɔyɛɛ wa, ta ka n giã-n bǎã mɛn nɛ.

²² Bɛ̀ ka tá màn kuri kaa wurun ni, ka baran wuru lɛkoro lɛ-a wɔn kɛn kuru wa. Ka baran n bɔyaa dɔn, mà ka n die màn lɛ a bún boe wa. Ka bɛ toa doobaan laanka gùlin manɛ. Masɛ din Dɛnaa Lawa n kaa Lawa lɛa.

Bɛnɛn pɛ ǹ zɔ́n

²³ Dɛnaa Lawa boo da ka Muizu ni, á pɛ nɛ:

²⁴ Boo da ka Izirayeli minin lɛn nɛ, n pɛ ǹ nɛ: mui sɔbaabaa ǹ wɔ a lɛawaa bibinaa ke, ka bɛ koa kaa susui pinaa lɛa. Ka bɛnɛn pɛpɛ bɛa pinaa lɛ nɛ, ka n lɛ sɔkɔn ka masɛ guguru kɔ, a giala, ma yiri tá ka nɛ.

²⁵ Ka bɛ́ dín mɛnɛn nyɛɛ babaraa, ka nyan toa ka bɛ kɔn nya bɛa pinaa wa. Ka wúlu mànan tã masɛ Dɛnaa Lawa wɔ lɛa.

Sii baraa sawaa ǹ lɛawaa gole

²⁶ Dɛnaa Lawa boo da ka Muizu ni á pɛ nɛ:

²⁷ A din mui sɔbaabaa ǹ wɔ lɛ a lɛawaa fùbaa ǹ wɔ pinaa, bɛ n sii baraa sawaa ǹ wúlu bɔ ǹ lɛawaa gole lɛa. Ka n lɛ sɔkɔn bɛa pinaa, ka n lɛ sɔɔ, ka wúlu mànan tã masɛ Dɛnaa Lawa wɔ lɛa, ka ma guguru kɔ.

²⁸ A pinaa taãn ke, ka nyan toa ka dí kɔn nya wa. A giala, sii baraa sawaa ǹ lɛawaa gole ne. A din pinaa lɛ nɛ, ka tá re sii baraa sawaa ǹ wúlu boe kaa lɛa, kaa Lawa, Dɛnaa Lawa yɔrɔ-a.

²⁹ Bɛ̀ min mɛn nə́ n piã sɛn, a ná a n lɛ sɔɔ bɛa lɛawaa kɛ lɛ miã li wa, ka bɛa dɛnaa bɔ ka bɔ kun ka a tɔrɔ minin ni.

³⁰ Min mɛn dɔ dí woo dí nya bɛa lɛawaa kɛ lɛ mɛn li, ma á re bɛa dɛnaa dii ma bɔ kun ka a tɔrɔ minin ni.

³¹ Ka nyan toa ka dí kɔn nya a pinaa wa. Bɛ n landa lɛa, ka mìi ni miɛ̃ duduu, ka tɔrɔn tumaa wɔ lɛa, a ba n bɔyɛɛ wa, ta ka n giã-n bǎã mɛn nɛ.

³² Ka bɛ baa kaa susu ǹ lɛawaa lɛa, ka n susu bɛa pinaa, ka n lɛ sɔɔ. A saa mui lɛ a manangɔrɔbaa ǹ wɔ a wasamiɛ̃n ganaa, a wo a lɛawaa a wasamiɛ̃n yaa, ka bɛa susu ǹ lɛawaa lɛ a susui wɔ.

Giã siã giulun zɔ́n

³³ Dɛnaa Lawa boo da ka Muizu ni, á pɛ nɛ:

³⁴ Boo da ka Izirayeli minin lɛn nɛ, n pɛ ǹ nɛ: mui sɔbaabaa ǹ wɔ a lɛawaa fulusoorobaa ǹ wɔ n ke, bɛ n *giã siã giulun zɔ́n giala kɔ pinaa lɛa. A nə n zɛnɛɛ yǎa lɛawaa sɔbaa, ka masɛ Dɛnaa Lawa guguru kɔ nɛ.

³⁵ A lɛawaa bibinaa pinaa, ka n lɛ sɔkɔn, ka masɛ guguru kɔ. Ka bɛ́ dín mɛnɛn nyɛɛ babaraa, ka nyan toa ka bɛ kɔn nya bɛa pinaa wa.

³⁶ Lɛawaa sɔbaa lɛ gɔ́ɔ̃ nɛ, ka wúlu mànan tã masɛ Dɛnaa Lawa wɔ lɛa babaraa. A lɛawaa kiwisibaa ǹ wɔ pinaa, ka n lɛ sɔkɔn ka masɛ guguru kɔ, ka wusoo ka wúlu mànan tã masɛ wɔ lɛa doo. Zɔ́n lɛ a nya pinaa n ka bɛ nɛ. Ka bɛ́ dín mɛnɛn nyɛɛ babaraa, ka nyan toa ka bɛ kɔn nya bɛa pinaa wa.

³⁷ Ka doamaa bɛ́ nɛ, ka zɔ́n dadaran mɛnɛn zɛnaa, ka masɛ tɔ bɔ nɛ, ǹ dinin lɛn man ka bɛn nɛ. Bɛ̀ ǹ tá ǹ zɛnɛɛ, ka lɛ dia kɔn la, ka n lɛ sɔkɔn, ka masɛ guguru kɔ, ka wúlu mànan kɔ masɛ la: wúlu màn tiɛ̃ nɛ, Lawa gɔ ǹ wɔ nɛ, barka da ǹ wɔ nɛ, ka duvɛ̃ nɛ. Zɔ́n gogoonmaa laanka a landa nɛ.

³⁸ Ka bɛ́ re wúlu mànan mɛnɛn koe masɛ la, kɛn dɔn tá kun ni: susu ǹ pii pinaa wɔn kɛn, ǹ nə n koe Dɛnaa Lawa la, ka bɛ́ bǐɛ̃ biɛ la ka ǹ mɛnɛn nɛ, ǹ mɛn tumaa bɛ́ lɛ kɔ Lawa la ǹ wɔn lɛa, hinlaa foo kɔɔ̃nbaa ǹ wɔ lɛa.

³⁹ Mui sɔbaabaa ǹ wɔ a lɛawaa fulusoorobaa ǹ wɔ pinaa, bɛ á die yiɛ, bɛ̀ ǹ nə́ kaa piɛ. Ka a giala kɔ bɛ lɛ a pinaa, ka zɔ́n zɛnaa ka masɛ tɔ bɔ nɛ, yǎa lɛawaa sɔbaa. A lɛawaa bibinaa laanka a kiwisibaa ǹ wɔ kɛ n susui pinaa lɛa.

⁴⁰ A lɛawaa bibinaa pinaa, ka da nɛ sonboren goa ka gɔn, sèwo luu ni, da gùrùn ni, luu nə́ ǹ ganaa ka kɛkɛ, ka tà lɛ-a ǹ dan kɛn gùrùn ni. Ka n nyɛnyɛɛ Dɛnaa Lawa, kaa Lawa lɛ yɔrɔ-a, yǎa lɛawaa sɔbaa.

⁴¹ Lɛ̀ woo lɛ̀ a mui sɔbaabaa ǹ wɔ, ka bɛa zɔ́n lɛ zɛnaa lɛawaa sɔbaa gɔ́ɔ̃ nɛ ka masɛ Dɛnaa Lawa tɔ bɔ nɛ. Bɛ n landa lɛa ka mìi ni miɛ̃ duduu, ka tɔrɔn tumaa wɔ lɛa a ba n bɔyɛɛ wa.

⁴² Bɛa lɛawaa sɔbaa lɛ gɔ́ɔ̃ nɛ, ka dinin mɛnɛn tumaa bɛ́ Izirayeli minin lɛa, ka doamaa nɛ ka giã siãn giulun,

⁴³ màn mɛn bɛ́ toɛ, kaa nɛnyaanan dɔn nə dɔ̃, mà masɛ bɛ́ má Izirayeli minin lɛn waa má ǹ bɔ Ezipti gána nɛ, mà masɛ n má ǹ kaa giã siã giulun ganaa. Masɛ din Dɛnaa Lawa n kaa Lawa lɛa.

⁴⁴ Izirayeli minin lɛn doamaa bɛ́ nɛ ǹ zɔ́n dadaran mɛnɛn zɛnaa ǹ Dɛnaa Lawa tɔ bɔ nɛ, Muizu bɛn lɛn tumaa a sii yɔrɔ nyaa ǹ nɛ.