Lawa a wúlu-bɔlen 22 - LAWA A BOO SONBORE

Lawa a wúlu màn-bii

¹ Dɛnaa Lawa boo da ka Muizu ni á pɛ nɛ:

² A pɛ Aarɔn laanka a nɛgiĩn lɛn manɛ: Izirayeli minin lɛn bɛ́ re die masɛ guguru koe ka *wúlu màn sonboren mɛnɛn nɛ, mà ǹ nə n bɔ bɛn wɔlɔ li, màn mɛn bɛ́ toɛ, ǹ baran masɛ tɔ sonbore kɛ ziziɛ̃ wa. Ma din ni Dɛnaa Lawa lɛa.

³ A pɛ ǹ nɛ mà biikoo woo biikoo, bɛ̀ *gɔ̀ tá wúlu-bɔlen lɛn min mɛn ganaa, Izirayeli minin lɛn bɛ́ re die Dɛnaa Lawa guguru koe ka wúlu màn sonboren mɛnɛn nɛ, bɛ̀ ǹ dɛnaa nə́ n mɔrɔ bɛn ganaa, ǹ bɔ ǹ bɔ masɛ a dí ni. Ma din ni Dɛnaa Lawa lɛa.

⁴ Aarɔn tɔrɔn lɛn, bɛ̀ gɔ̀nɔn ki busu babaraa hinlaa kii mu a da a din li ǹ busu tá ǹ mɛn ganaa, bɛ̀ ka gɔ̀ bɔ ǹ dɛnaa-a wa, a doamaa bie a wúlu màn sonboren kɛn wɔ a lɛ-n wa. Gɔn da gere ganaa bɛ́ á gɔ̀ da min mɛn-a, bɛ̀ min mɛn nə́ n gɔn da bɛa dɛnaa ganaa, bɛa min lɛ nɛ, ka min mɛn giulun bɛ́ á pisəə, a din sii goon nə bɛn dɔn mìi ni.

⁵ Màn baaran hinlaa min mɛn a gɔn dama-a bɛ́ min gɔgɔrɛ koe, ta gɔgɔrɛbaa lɛ a tɔrɔ mɛn nɛ, bɛ̀ min mɛn dɔ nə́ n gɔn da bɛ mɛn ganaa, a din sii goon lɛ n bɛa dɛnaa dɔ mìi ni.

⁶ Bɛ̀ min mɛn nə́ n gɔn da bɛa mànan lɛn ganaa, ǹ dɛnaa n goɛ̃ gɔ̀dɛnaa lɛa yǎa wasa woe miɛ̃. Ǹ dɛnaa a boe la a wúlu màn sonboren kɛn wɔ a lɛ-n, bɛ̀ a ná a n zoo bɔrɔ wa.

⁷ Bɛ̀ wasa mɛ lɔn gɔrɔ, ǹ dɛnaa na á *yoreen kɔ. Á boe la kəni, a wúlu màn sonboren lɛn bii, a giala, a wɔ gii ni.

⁸ Bɛ̀ màn gã a din li, hinlaa don mànan man nə́ wɔwoɛ̃ kɔn, Lawa a wúlu-bɔle doamaa bie a bɛ sɔ̃, a gɔ̀ da a din ganaa-n wa. Ma din ni Dɛnaa Lawa lɛa.

⁹ Man gɔn waa ka nɛ ka boon mɛnɛn nɛ, ka kɔ bɛn lɛ, màn mɛn bɛ́ toɛ, ka baran sii baraa saa ka da ka dinin mìi ni, màn-bii sii wɔ paǹ li wa. Bɛ̀ ka masɛ a boo tii bɛa sii lɛ gɔ́ɔ̃ nɛ, ka á re giɛ̃. Masɛ Dɛnaa Lawa din ni má ka bɔ, má ka koa maa dí mìi la.

¹⁰ Wúlu màn mɛn bɛ́ ǹ nə́ kɔ Lawa wɔ lɛa, min tɔrɔ kɔsɔ doamaa bie a wɔ a lɛ-n wa. Min mɛn bɛ́ á daa tii baa, wúlu-bɔle a kion, hinlaa ta a n dí nyɛɛ a lon á n sarɛɛ, bɛ kɔn doamaa bie a bɛa màn lɛ bii wa.

¹¹ Sɛnɛ, bɛ̀ wúlu-bɔle mɛn bɛ̀rɛ pii ka a paa nɛ, bɛa bɛ̀rɛ lɛ á boe la a bii, ka dí-nyali kɛ dɔ wɔ bɛ́ lɔn, ǹ mɛn bɛ́ á yɛ a kion. Bɛn tá boe la ǹ na a màn bii.

¹² Bɛ̀ Lawa a wúlu-bɔle a nɛlɔ wɔ min kɔsɔ li, a ná a wúlu-bɔle tɔrɔ lɛa wa, ǹ bɛ́ màn mɛn boe wúlu mànan kɛn nɛ ǹ nə́ koe wúlu-bɔlen la, nɛlɔ lɛ doamaa bie a bɛ wɔ a lɛ-n doo wa.

¹³ Bɛ̀ wúlu-bɔle mɛn a nɛlɔ ǹ zuũ gã, hinlaa bɛ̀ a nɛlɔ lɛ zuũ loo, bɛ̀ nɛ ba a gɔn wa, yǎa a n bɔyaa á woo giã ǹ di kion, ka a nɛniɛmaa waáraa wɔ bɛ́ lɔn, á boe la a ǹ di lɛ a màn bii, haalɛ ta á daa yaa, min kɔsɔ tɔrɔ ná a boe la á bii wa.

¹⁴ Bɛ̀ min tɔrɔ mɛn kɔsɔ sã á bii, yǎa a ǹ miã sarɛɛ wúlu-bɔle lɛ la, a na a talakɔn sooro goon tii a ganaa.

¹⁵ Izirayeli minin lɛn bɛ́ wúlu màn sonboren mɛnɛn boe bɛ̀ ǹ nə ǹ kɔ Dɛnaa Lawa la, wúlu-bɔlen lɛn baran toa ǹ bɛn sonborebaa ziziɛ̃ wa.

¹⁶ Bɛ̀ ǹ nə́ wúlu màn sonboren lɛn bii, a da yaa gɔ̀ nə́ ǹ dininmaan ganaa, maǹ die zɛ̀rɛ siɛ ǹ kɔ Izirayeli minin lɛn la, yǎa bɛn nə màn boe, ǹ nə n zɛ̀rɛ sii Lawa la nɛ. A giala, masɛ Dɛnaa Lawa din ni má wúlu-bɔlen lɛn bɔ, má ǹ koa maa dí mìi la.

Tɔɔ màn mɛn bɛ́ boe la a wúlu màn baa

¹⁷ Dɛnaa Lawa boo da ka Muizu ni, á pɛ nɛ:

¹⁸ Boo da ka Aarɔn laanka a nɛgiĩn lɛn nɛ, ka Izirayeli minin tumaa nɛ, n pɛ ǹ nɛ: Min woo min, á n Izirayeli min lɛa, hinlaa á n gùli lɛa Izirayeli minin lɛn bii, bɛ̀ a tá li, á boe la a da ka tɔɔ nɛ wúlu màn tiɛ̃ lɛa, ka kɛn bɛ́ lɔn, ǹ nə́ goɛ̃ bɛ̀ ǹ da ǹ kɔ Dɛnaa Lawa la, lɛ kɔ la ǹ wúlu màn lɛa, hinlaa foo kɔɔ̃nbaa ǹ wúlu màn lɛa.

¹⁹ Sɛnɛ, bɛ̀ ka tá li ma ka lɛ si, ka da ka tɔɔ lɛ a gɔ̀lɔ̀ nɛ, wɔ̀lɔ̀ ná a ba a ganaa wa: ta dii ni, ta sère ne, ta bòe ne.

²⁰ Ka nyan da ka tɔɔ kɔn nɛ, wɔ̀lɔ̀ ná a ganaa wa. Bɛ̀ ka daa ka bɛ miã nɛ, masɛ a die ka lɛ sii wa.

²¹ Bɛ̀ min tá barka da ǹ wúlu màn koe masɛ Dɛnaa Lawa la, a lɛ kɔ masɛ la ǹ màn lɛa, hinlaa a din a foo kɔɔ̃nbaa ǹ wɔ lɛa, á boe la a da ka tɔɔ gole ne, hinlaa ka tɔɔ boɛɛn nɛ. Sɛnɛ, bɛ̀ ǹ dɛnaa tá li masɛ na a lɛ si, yǎa tɔɔ lɛ goɛ̃ a din yii lɛa, wɔ̀lɔ̀ goon ná a ba a ganaa wa.

²² Tɔɔ mɛn yii bɛ́ á tã, ǹ mɛn gù bɛ́ á yiɛ, ǹ bɛ́ ǹ nə́ ǹ màn lɛ da ǹ mɛn paǹ kɔn ganaa, ǹ mɛn paǹ kɔn bɛ́ nyiǹ boe, ka gɔ̀nɔn ki busu babaraa bɛ́ ǹ mɛn ganaa, ka nyan toa ka da ka bɛ-n wa. Ka nyan da ka bɛ miã kɔn nɛ Dɛnaa Lawa wɔ lɛa wa. Ka nyan bɛ miã kɔn a siĩ da *wúlu bɔ ǹ bǎã kɛ lalan, mà ka n tiɛ̃ Dɛnaa Lawa wɔ lɛa wa.

²³ Dii ni, sère ne ka bòe ne, ta ǹ mɛn paǹ mɛn na a siĩn wa, hinlaa a gùn man nə́ nyaabaa kɔn ganaa, min tá boe la, a foo kɔɔ̃nbaa ǹ wúlu bɔ nɛ. Sɛnɛ, bɛ̀ lɛ kɔ Lawa la ǹ wúlu màn nɛ, Lawa a lɛ koe a ganaa wa.

²⁴ Tɔɔ mɛn bɛ́ ǹ ná a lòe dɛ, hinlaa ǹ nə́ yɔyɔrɛ, ǹ nə́ bɔ hinlaa maǹ nə́ kuru, ka nyan toa ka da bɛ miã kɔ masɛ Dɛnaa Lawa la wúlu màn lɛa wa. Bɛ̀ ka dɔ kaa gána lɛ nɛ, ka nyan toa ka bɛ miã zɛnaa wa.

²⁵ Ka baran bɛa tɔɔn kɛn lɛn miã pii tii lon, mà ka n koe masɛ Lawa la wúlu màn lɛa wa. Bɛa tɔɔn lɛn paǹ mɛn nə n kuru, bɛ lɛ n wɔ̀lɔ̀ lɛa ǹ ganaa. Bɛ lɛ na á toa, ma a re lɛ koe ǹ ganaa wa.

²⁶ Dɛnaa Lawa wusoo á boo da ka Muizu ni, á pɛ nɛ:

²⁷ Diin nɛ nɛ, sère nɛ nɛ ka bòe nɛ nɛ, bɛ̀ ǹ mɛn yɛ, a doamaa nɛ a goã kun ka ǹ dan nɛ, yǎa lɛawaa sɔbaa. A kũ a yɛ lɛawaa kiwisibaa ǹ wɔ ganaa, bɛ̀ min tá li a da ǹ mɛn kɔ masɛ Dɛnaa Lawa la wúlu màn tiɛ̃ lɛa, ma á lɛ koe a ganaa.

²⁸ Dii dan nɛ, sère dan nɛ ka bòe dan nɛ, ka nyan toa ka bɛ kɔn laanka a nɛ dɛ pinin goon wa.

²⁹ Bɛ̀ ka tá barka da ǹ wúlu màn dii masɛ Dɛnaa Lawa wɔ lɛa, ka zɛnaa doɛ̃, màn mɛn bɛ́ toɛ, ma lɛ kɔ a ganaa:

³⁰ Ka a siĩ sɔ̃ a din pinaa, ka baran a paǹ kɔn koa lɛ̀ waa a ganaa wa. Masɛ din ni Dɛnaa Lawa lɛa.

³¹ Ka maa gɔn waa ǹ boon kɛn tamaa, ka bɛ́ màn mɛn pii, ka bɛ zɛnaa. Masɛ din ni Dɛnaa Lawa lɛa.

³² Ka nyan toa ka masɛ tɔ sonbore kɛ ziziɛ̃ wa. Man giɛ li, ka dinin Izirayeli minin lɛn nə masɛ a Lawabaa kɛ dɔ̃. Masɛ Dɛnaa Lawa din ni má ka bɔ, má ka baa ma din a minin lɛa.

³³ Min mɛn nə ka waa á ka bɔ Ezipti gána nɛ, màn mɛn bɛ́ toɛ a goã kaa Lawa lɛa, masɛ din Dɛnaa Lawa nɛ.