Lawa a wúlu-bɔlen 2 - LAWA A BOO SONBORE

Lawa gɔ ǹ màn

¹ Bɛ̀ min mɛn tá li a Lawa gɔ ǹ wɔ bɔ a tán-kɔsiɛ màn nɛ, ǹ dɛnaa doamaa nɛ a *wùsu sonbore bɔ, a bii ǹ nyɔɔ kaa li, a da yon gìĩ kɔɔ̃n da la.

² A wo bɛ kɔ Aarɔn tɔrɔ wúlu-bɔlen kɛn la. Ǹ nə n gɔn pã bɛa wùsu lɛ laanka nyɔɔ lɛ kɔn nɛ, ǹ da yon gìĩ kɔɔ̃n lɛ tumaa saa. Wúlu-bɔle lɛ goon bɛa yiri gisĩ sii ni ǹ mànan lɛn tã *wúlu bɔ ǹ bǎã lɛ lalan. A n *wúlu màn tiɛ̃ lɛa, a tɛmaa gìĩ n kɔɔ̃n Dɛnaa Lawa ganaa.

³ Lawa gɔ ǹ màn lɛ a gialakun mɛn goã, bɛ n Aarɔn laanka a minin wɔ lɛa. Bɛ nə ǹ dininsɔɔ̃nɔn wɔ lɛa, a giala, Lawa gɔ ǹ wɔ mɛn lɛ bɛ́ ǹ nə́ ǹ kɔn tã, a na á bɔ bɛ nɛ.

⁴ Bɛ̀ min mɛn tá die ka Lawa gɔ ǹ màn nɛ, bɛ̀ a doamaa nɛ a n tã kùsi ni, ǹ dɛnaa doamaa nɛ, a nyɔɔ kaa wùsu sonbore li a yaa, a da, sɛnɛ, a baran yɔ bù kaa li wa. Hinlaa a baa mɔ̀mɔ lɛa, a toa nyɔɔ bɔ sɔnbɔraanɛ, sɛnɛ, yɔ bù ná a ba li wa.

⁵ Bɛ̀ Lawa gɔ ǹ màn nɛ, ǹ nə́ die tiɛ̃ màn tã ǹ fɔlɔ kɛ la, yǎa a goɛ̃ wùsu sonbore diɛ lɛ a nyɔɔ n li, sɛnɛ, yɔ bù ná a ba li wa.

⁶ A die a bɛ lɛ nana kɔn a nyɔɔ kaa la. Lawa gɔ ǹ màn nɛ.

⁷ Ta a n Lawa gɔ ǹ màn lɛa, min nə́ kɔrɛ fɔlɔ donkolon ne, ǹ doamaa nɛ, ǹ wùsu sonbore lɛ yia ka nyɔɔ nɛ.

⁸ Bɛ kio, Lawa gɔ ǹ màn lɛ, á zɛnaa ka bɛa mànan lɛn nɛ Dɛnaa Lawa wɔ lɛa, a saa a da kɔ wúlu-bɔle la, bɛ wo ne wúlu bɔ ǹ bǎã nɛ.

⁹ Wúlu-bɔle yiri gisĩ sii ni ǹ wɔ bɔ bɛ lɛ nɛ, a tã wúlu bɔ ǹ bǎã lɛ la. A n wúlu màn tiɛ̃ lɛa, a tɛmaa gìĩ n kɔɔ̃n Dɛnaa Lawa ganaa.

¹⁰ Lawa gɔ ǹ màn lɛ a gialakun mɛn goã, bɛ n Aarɔn laanka a minin wɔ lɛa. Bɛ nə ǹ dininsɔɔ̃nɔn wɔ lɛa, a giala, Dɛnaa Lawa wɔ mɛn bɛ́ ǹ nə́ ǹ kɔn tã, a na á bɔ bɛ nɛ.

¹¹ Màn mɛn tumaa bɛ́ ǹ nə́ die Dɛnaa Lawa goe ne, ǹ baran ǹ kɔn zɛnaa ka yɔ bù n li wa. Màn woo màn ǹ nə́ die tiɛ̃ Dɛnaa Lawa gɔ ǹ màn lɛ a dinin, ǹ nyan toa ǹ yɔ bù hinlaa zoo nyɔɔ kaa bɛ li duduu, ǹ tɔn zɛnaa wa.

¹² Bɛ̀ a tá bɛ lɛa, ǹ tá boe la ǹ da Dɛnaa Lawa gɔ nɛ, ǹ màn lɛ bibinaa lɛa. Sɛnɛ, ǹ doamaa bie ǹ bɛ tã wúlu bɔ ǹ bǎã kɛ nɛ, wúlu màn giĩ kɔɔ̃n lɛa wa.

¹³ Ǹ bɛ́ re die ka wúlu màn mɛn tumaa nɛ Lawa gɔ ǹ wɔ lɛa, ǹ doamaa nɛ, ǹ yìsi kaa a tumaa ganaa. Ǹ nyan toa ǹ yiri bɔ ka yìsi lɛ a kaamaa-n wa. A giala, yìsi lɛ n nyɛɛ, mà Lawa lɛ kɔ kɔn la mɛn wɔ ǹ nɛ, mà bɛ na a tan yǎa duduu. Bɛ lɛ nɛ, ǹ Lawa gɔ ǹ màn lɛ tumaa, ǹ da nɛ, yìsi ná a ganaa.

¹⁴ Bɛ̀ ǹ tá re Dɛnaa Lawa goe ka ǹ màn lɛ bibinaa nɛ, ǹ *belee sanan tã, bɛ kio, ǹ na a nàn bɔ, ǹ lɔ.

¹⁵ Ǹ nyɔɔ kaa bɛ lɛ li, ǹ da yon gìĩ kɔɔ̃n da la, ǹ tɔn da nɛ. Lawa gɔ ǹ màn nɛ.

¹⁶ Ǹ bɛ́ ǹ mɛn lɛ bíi mà yiri gisĩ sii ni ǹ màn, Lawa a wúlu-bɔle bɛ lɛ tã: belee nàn lɛ kɔn nɛ, nyɔɔ lɛ kɔn nɛ, ka da yon gìĩ kɔɔ̃n lɛ tumaa nɛ. Wúlu màn tiɛ̃ nɛ, Dɛnaa Lawa wɔ lɛa.