Lawa a wúlu-bɔlen 19 - LAWA A BOO SONBORE

Min mɛnɛn bɛ́ boe la ǹ dí nya Lawa nɛ

¹ Dɛnaa Lawa boo da ka Muizu ni á pɛ nɛ:

² Boo da ka Izirayeli zaman lɛ tumaa nɛ, n pɛ ǹ nɛ: Ka goã min *yoreen lɛa ka ma dinmaa bɛ́ yoreen lɔn, masɛ Dɛnaa Lawa din nə kaa Lawa lɛa.

³ Kaa min gogoonmaa doamaa nɛ, a na a náa laanka a díi guguru kɔ, a masɛ a susu ǹ piin kɛn tamaa. Masɛ din Dɛnaa Lawa n kaa Lawa lɛa.

⁴ Ka baran dìn guguru kɔ wa. Ka baran màn nyín zɛnaa, ka bɛ baa kaa Lawa lɛa wa. Masɛ din Dɛnaa Lawa n kaa Lawa lɛa.

⁵ Bɛ̀ ka tá barka da ǹ wúlu boe Dɛnaa Lawa wɔ lɛa, a n zɛnaa a yɔrɔ li, màn mɛn bɛ́ toɛ Dɛnaa Lawa lɛ kɔ a ganaa.

⁶ Ka tá boe la ka wúlu bɔ ǹ siĩ lɛ sɔ̃ wúlu lɛ a bɔ pinaa, ka a lɛawaa nɛ. Bɛ̀ ǹ mɛn nə́ n si á goã bɛ kio, a lɛawaa sɔɔbaa ǹ wɔ pinaa, ka bɛ da tɛ-n, ka tã lenlen.

⁷ A lɛawaa sɔɔbaa ǹ wɔ pinaa, bɛ̀ min mɛn nə́ n tã la á sɔ̃, Lawa a bɛa dɛnaa lɛ sii wa. A giala, a *wúlu màn lɛ na á ziziɛ̃.

⁸ Wúlu mɛn bɛ́ ǹ nə́ bɔ Dɛnaa Lawaa wɔ lɛa, bɛ̀ min mɛn bɛa siĩ baa siĩ kooro lɛa á sɔ̃, bɛa dɛnaa a sii baraa a dɔlɔ na a din mìi ni. Bɛa dɛnaa kɛ lɛ dɔ, ka loo, ka bɔ Izirayeli tɔrɔn bii.

⁹ Bɛ̀ ka tá kaa màn kuri kaa wurun ni, ka baran kaa wuru lɛkoro lɛ-a wɔn kɛn kuru wa. Ka baran n bɔyaa dɔn, mà ka n die màn lɛ a bún boe wa.

¹⁰ Bɛ̀ ka kaa *rezɛ̃ da nɛ na, nɛ gogoon mɛn bɛ́ goɛ̃ la, ka baran bɛ na wa, a nɛ mɛn dɔ kaa tán, ka baran bɛ goa wa. Ka bɛ toa doobaan laanka gùlin manɛ. Ma din Dɛnaa Lawa n kaa Lawa lɛa.

¹¹ Ka baran wurumu baa wa, ka baran kɔn yiri sã wa, ka baran soɛ dɔ bɔ kɔn nɛ wa.

¹² Ka baran n liɛ soɛ la ka masɛ tɔ-n wa. Bɛ̀ ka bɛ zɛnaa, ka n die ka dinin Lawa tɔ kɛ biɛ màn kooro lɛa. Ma din Dɛnaa Lawa n má pɛ.

¹³ Min baran mɛnaa ǹ miã la wa, min dɔ baran ǹ miã koã wa. Min kɔn nyan toa dí-nyali a saraa lɛ̀ waa a gɔn wa.

¹⁴ Min baran boo baraa da too tere-a ganaa wa, min baran màn da tán yii tere-a nyɛɛn wa. Ka bɛ lɛ zɛnaa ka nyɛ́ɛ baa kaa Lawa nɛ. Ma din nə Dɛnaa Lawa lɛa.

¹⁵ Kiri-kuriin gɔ́ɔ̃ nɛ, ka nyan mɛnaa min la wa. Ka nyan pɛ ka kaa pàãwɛɛnaa lon a pàãwɛɛnaabaa taman yii wa, ka nyan nyɛ́ɛ baa pàãma dɔ yii ni a pàãmabaa taman yii wa. Sɛnɛ, ka ka miãn kiri wɔ ka peperebaa nɛ.

¹⁶ Ka baran n bibiə̃ ka ka dɔɔ̃nɔn tɔ ziziɛ̃ wa. Min dɔ baran ǹ miã zɛ̀rɛ baa kooro, n kiɛ̃ n minin yaa dii wa. Ma din nə Dɛnaa Lawa lɛa.

¹⁷ Min kɔn baran ǹ dɔɔ̃n da a gɔ́ɔ̃-n wa. Sɛnɛ, bɛ̀ n dɔɔ̃n sii la, n baran toa wa, a zɛ̀rɛ baa, màn mɛn bɛ́ toɛ, a sii baraa lɛ a guĩ baran goã nsɛ mìi-n wa.

¹⁸ N baran dòo bɔ wa, min dɔ baran sii koa a gɔ́ɔ̃ nɛ, ǹ miã wɔ paǹ li wa. N miã kɔsɔ dɔ narɛ ka n bɛ́ n din narɛ lɔn. Masɛ din nə Dɛnaa Lawa lɛa.

¹⁹ Ka n doa, ka masɛ a landan kɛn dɔn tamaa: N tɔɔn bii, n nyan toa n tɔɔ tɔrɔ tɔtɔ paa kaa dii kɔn la ganaa wa. N wuru-n, n nyan toa n màn tɔrɔ tɔtɔ paa da a-n wa. Ka nyan toa ka mɔnaa tã ka gɛ̀sɛ tɔrɔ tɔtɔ màn paa nɛ, ka wɔ wa.

²⁰ Bɛ̀ giĩ mɛn giã kun ka lɔ nɛ, bɛ̀ lɔ lɛ n bɛ̀rɛlɔ lɛa, ǹ nə́ die koe min kɔsɔ la, sɛnɛ, bɛ̀ á daa yaa, ǹ tɔn na a mìi si ǹ giɔ̀mɔ saraa, ǹ nə́ bɔ ǹ nə́ bɔ bɛ̀rɛbaa-n wa, yǎa ǹ dɛnaa màn sarɛɛ. Ka baran giĩ lɛ laanka lɔ lɛ dɛ wa, a giala, ka lɔ lɛ bɔ ka bɔ bɛ̀rɛbaa-n wa.

²¹ Giĩ lɛ da ka sère gɔ̀lɔ̀ nɛ, kɔn yɛ ǹ kion kɛ a kiɛnlɛ-a, a baa wúlu màn lɛa, a n zɛ̀rɛ si Dɛnaa Lawa la.

²² A sii baraa mɛn zɛnaa, bɛ̀ Lawa a wúlu-bɔle sii baraa sawaa ǹ wúlu bɔ kɔn yɛ ǹ kion kɛ yɔrɔ-a ka sère gɔ̀lɔ̀ lɛ nɛ, zɛ̀rɛ si Lawa la ǹ wúlu màn lɛa, bɛa sii baraa lɛ á die n toɛ nɛ.

²³ Bɛ̀ ka wɔ gána lɛ nɛ ǹ mɛn waáraa, da woo da, ǹ ná a nɛ bii, bɛ̀ ka bɛ zumu, bɛ̀ á nɛ kɔ, ka baran a nɛ wɔ ka lɛ-n wa. Ka ga a nɛ lɛ ganaa màn gɔgɔrɛ lɛa, màn gɔgɔrɛ lɛa ka dinin wɔ paǹ li, yǎa lɛ̀ sɔɔ.

²⁴ A lɛ̀ siibaa ǹ wɔ, da lɛ a nɛ tumaa doamaa nɛ a n kɔ masɛ Dɛnaa Lawa la, barka da masɛ nɛ ǹ zɔ́n kɛ a pinaa.

²⁵ A lɛ̀ soorobaa ǹ wɔ kəni, ka á boe la ka na, ka na a nɛ bii. Bɛ̀ ka zɛnaa miɛ̃, bɛ lɛ n die toɛ, màn nə mɛ kaa da a nɛ kɔ li a woo. Masɛ din Dɛnaa Lawa n kaa Lawa lɛa.

²⁶ Ka baran tɔɔ kɔn a siĩ sɔ̃ ka a mà ná a-n wa. Ka baran wɔ-kũlibaa ǹ sii laanka boobaa ǹ sii zɛnaa wa.

²⁷ Ka baran n mìi lɛgon bɔ luuriini wa, ka baran n lɛtoro ka kuru a wàãn ganaa wa.

²⁸ Ka baran wɔ̀lɔ̀ da ka dinin ganaa gere a lɛa wa. Ka baran nyaǹ dɔ kiɛ̃ ka dinin ganaa wa. Masɛ din nə Dɛnaa Lawa lɛa.

²⁹ Ka baran kaa nɛlɔn kaa kɔrɔbaa ganaa landa zii la, ka ǹ baa màn kooron lɛa ka ǹ kaa bii-a wa. Bɛ̀ ka bɛ zɛnaa, ka n die gána minin lɛn kiɛ kɔrɔbaa ganaa, gána lɛ n die piɛ̃ ka kɔrɔbaa nɛ.

³⁰ Ma lɛawaan mɛnɛn koa *susu ǹ pii lɛa, ka bɛn tamaa, ka gugurubaa wɔ maa kion kɛa sii ni. Masɛ din nə Dɛnaa Lawa lɛa.

³¹ Ka baran boobaa ǹ sii zɛnaa wa, ka baran wo kaa sii ni boon kion wa. Bɛ̀ ka bɛ zɛnaa, bɛ lɛ n *gɔ̀ diɛ ka ganaa. Masɛ din Dɛnaa Lawa n kaa Lawa lɛa.

³² Ka min gole guguru kɔ, ka yoo ka bǎã kɔ la. Ka zɛnaa miɛ̃ ka nyaa, mà ka tá nyɛ́ɛbiɛ masɛ Lawa yii ni. Masɛ din Dɛnaa Lawa n má pɛ.

³³ Bɛ̀ min daa gùli kɔ ka li kaa gána lɛ nɛ, ka baran bɔ a yii-n wa.

³⁴ Bɛa gùli kɛ lɛ giã nɛ ka li, ka kũ ka ka dinin goon bɛ́ lɔn. Ka narɛ ka ka bɛ́ ka dinin narɛ lɔn. A giala, ka dɔn man ka goã gùlin lɛa Ezipti gána nɛ. Masɛ din Dɛnaa Lawa n ka Lawa lɛa.

³⁵ Bɛ̀ ka tá màn zoɛ̃ ka n giɛ a sasabaa ganaa, a gugurubaa hinlaa a gigiãbaa ganaa, ka nyan mɛnaa kɔn la wa.

³⁶ Màn zɔɔ̃ ka kilo taãn nɛ, ka litiri taãn nɛ. Masɛ din Dɛnaa Lawa n kaa Lawa lɛa. Ma din ni má ka waa, má ka bɔ Ezipti gána nɛ.

³⁷ Ka maa landa boon kɛn tumaa laanka maa sii yɔrɔ bɔ ǹ boon kɛn tumaa tamaa. Ma bɛ́ màn mɛn pii, ka bɛ zɛnaa. Masɛ din nə Dɛnaa Lawa lɛa.